ବ୍ରିଷ୍ଟଲ,୧୮ା୬: ଲେଡି ସେହ୍ବାଗ ଭାବେ ମହିଳା କ୍ରିକେଟରେ ଜଣାଶୁଣା ଟିମ୍ ଇଣ୍ଡିଆର ଓପନର ଶେଫାଳି ବର୍ମା ପଦାର୍ପଣ ଟେଷ୍ଟରେ ଇତିହାସ ରଚିଛନ୍ତି। ୧୭ ବର୍ଷୀୟା ବ୍ୟାଟ୍ସଓମେନ କ୍ୟାରିୟରର ପ୍ରଥମ ଟେଷ୍ଟ ମ୍ୟାଚ୍ର ଉଭୟ ପାଳିରେ ଖେଳିଛନ୍ତି ଅର୍ଦ୍ଧଶତକୀୟ ଇନିଂସ। ବିଶ୍ୱର ଚତୁର୍ଥ ମହିଳା କ୍ରିକେଟର ଭାବେ ଶେଫାଳି ଏହି ରେକର୍ଡର ଅଧିକାରୀ ହୋଇଛନ୍ତି। ପ୍ରଥମ ଇନିଂସରେ ସେ ମାତ୍ର ୪ ରନ୍ରେ ଶତକରୁ ବଞ୍ଚିତ ହୋଇଥିଲେ। ଦ୍ୱିତୀୟ ଇନିଂସରେ ବର୍ଷା ବାଧକ ସାଜିବା ବେଳକୁ ଶେଫାଳି ୫୫ ରନ୍ କରି ଅପରାଜିତ ଅଛନ୍ତି। ଉଲ୍ଲେଖଯୋଗ୍ୟ, ପ୍ରଥମ ପାଳିରେ ଇଂଲଣ୍ଡ ୩୯୬ ରନ୍ କରିଥିବାବେଳେ ୨୩୧ ରନ୍ରେ ଅଲଆଉଟ୍ ହୋଇଥିଲା ଭାରତ। ଫଳରେ ଫଲୋଅନ୍ ଭୋଗିଥିବା ଭାରତ ଦ୍ୱିତୀୟ ଇନିଂସରେ ଏପର୍ଯ୍ୟନ୍ତ ଏକ ଉଇକେଟ ହରାଇ ୮୩ ରନ୍ କରିଛି। ଇନିଂସ ପରାଜୟ ଏଡ଼ାଇବା ଲାଗି ଟିମ୍ ଇଣ୍ଡିଆକୁ ଆହୁରି ୮୨ ରନ୍ ଆବଶ୍ୟକ ଥିବାବେଳେ ହାତରେ ୯ ଉଇକେଟ ବାକି ଅଛି।
ଅନ୍ତର୍ଜାତୀୟ ମହିଳା ଟେଷ୍ଟ କ୍ରିକେଟରେ ୧୯୮୬ରେ ଇଂଲଣ୍ଡର ଲେସଲି କୁକ୍ (ଭାରତ ବିପକ୍ଷରେ ୭୨ ଓ ୧୧୭) ପ୍ରଥମ ବ୍ୟାଟ୍ସଓମେନ ଭାବେ ଉଭୟ ଇନିଂସରେ ଅର୍ଦ୍ଧଶତକ ହାସଲ କରିଥିଲେ। ତାଙ୍କ ପରେ ଶ୍ରୀଲଙ୍କାର ବନିସା ବୋବେନ (୧୯୯୮) ଓ ଅଷ୍ଟ୍ରେଲିଆର ଜେଫ ଜନସେନ (୨୦୨୧) ଏହି ସଫଳତା ପାଇଥିଲେ।