ନୂଆଦିଲ୍ଲୀ, ୧୨ା୫ (ପି.ଟି.)-ଜୁଲାଇରେ ଶ୍ରୀଲଙ୍କା ବିପକ୍ଷ ହ୍ବାଇଟ-ବଲ୍ ଟୁର୍ ପାଇଁ ଶ୍ରେୟାସ ଆୟାର ଯଦି ଫିଟ୍ ନ ରୁହନ୍ତି ତେବେ ଭେଟେରାନ ଓପନର ଶିଖର ଧାଓ୍ବନ କିମ୍ବା ଅଲରାଉଣ୍ଡରରୁ ସ୍ପେଶାଲିଷ୍ଟ ବ୍ୟାଟ୍ସମ୍ୟାନ ବନିଥିବା ହାର୍ଦ୍ଦିକ ପାଣ୍ଡ୍ୟାଙ୍କ ମଧ୍ୟରୁ ଜଣେ କେହି ଅଧିନାୟକତ୍ୱ ଭାର ଗ୍ରହଣ କରିବେ। ଜୁଲାଇ ମାସ ଦ୍ୱିତୀୟ ଭାଗରେ ହେବାକୁ ଥିବା ଟୁର୍ରେ ଭାରତର ସୀମିତ ଓଭର ସ୍ପେଶାଲିଷ୍ଟମାନେ ଶ୍ରୀଲଙ୍କାରେ ତିନୋଟି ଅନ୍ତର୍ଜାତୀୟ ଟି୨୦ ଓ ସମାନ ସଂଖ୍ୟକ ଅନ୍ତର୍ଜାତୀୟ ଟି୨୦ ଖେଳିବ। ବିରାଟ କୋହଲି ଓ ରୋହିିତ ଶର୍ମାଙ୍କ ଭଳି ଷ୍ଟାର ଖେଳାଳି ୫ ମ୍ୟାଚ ବିଶିଷ୍ଟ ଟେଷ୍ଟ ସିରିଜ ଖେଳିବା ଲାଗି ସେତେବେଳେ ଇଂଲଣ୍ଡରେ ଥିବେ। ଶ୍ରୀଲଙ୍କା ଟୁର୍ ବେଳକୁ ଶ୍ରେୟାସ ଫିଟ୍ ଥିବେ କି ନା ଏ ପର୍ଯ୍ୟନ୍ତ ତାହା ସ୍ପଷ୍ଟ ହୋଇନାହିଁ। ଆଘାତପ୍ରାପ୍ତ ଶ୍ରେୟାସଙ୍କ କାନ୍ଧରେ ଅସ୍ତ୍ରୋପଚାର ହୋଇଛି। ସେ ରିହାବିିଲିଟେଶନରେ ଅଛନ୍ତି। ଶ୍ରୀଲଙ୍କା ଟୁର୍ ବେଳକୁ ଯଦି ଶ୍ରେୟାସ ଉପଲବ୍ଧ ହୁଅନ୍ତି ତେବେ ସେ ଅଧିନାୟକ ହେବା ସ୍ବାଭାବିକ ବୋଲି ବିସିସିଆଇର ଜଣେ ବରିଷ୍ଠ କର୍ମକର୍ତ୍ତା ନାମ ଗୋପନ ସର୍ତ୍ତରେ ପ୍ରକାଶ କରିଛନ୍ତି। ତାତ୍ତ୍ୱିକ ଦୃଷ୍ଟିକୋଣରୁ ଅଧିନାୟକ ପଦବୀ ପାଇଁ ଦୁଇ ପ୍ରାର୍ଥୀଙ୍କ ମଧ୍ୟରୁ ୩୫ବର୍ଷୀୟ ଧାଓ୍ବନ ମୁଖ୍ୟ ଦାବିଦାର। ଗତ ଦୁଇଟି ସିଜନରେ ଆଇପିିଏଲ୍ରେ ତାଙ୍କ ପ୍ରଦର୍ଶନ ପ୍ରଭାବୀ ରହିଛି। ଅନ୍ୟପକ୍ଷରେ ଜୁନିୟର ପାଣ୍ଡ୍ୟାଙ୍କୁ ଅନ୍ୟତମ ସଫଳ ମ୍ୟାଚ ବିଜୟୀ ଖେଳାଳି ବିବେଚନା କରାଯାଉଛି। ସିଲେକ୍ସନ ପାଇଁ ଉପଲବ୍ଧ ସମସ୍ତ ଖେଳାଳିଙ୍କ ମଧ୍ୟରେ ଧାଓ୍ବନ ସବୁଠାରୁ ସିନିୟର। ଭାରତ ପାଇଁ ସେ ସବୁଠାରୁ ଭଲ ପ୍ରଦର୍ଶନ କରି ଆସୁଛନ୍ତି। ଅନ୍ୟପକ୍ଷରେ ଜଣେ ହ୍ବାଇଟ୍ ବଲ୍ ମ୍ୟାଚ ବିଜୟୀ ଭାବେ ହାର୍ଦ୍ଦିକ ପାଣ୍ଡ୍ୟାଙ୍କୁ ଏଡାଇ ଦେଇହେବ ନାହିଁ। ତାଙ୍କର ଲମ୍ବା ଭବିଷ୍ୟତ ଅଛି। ଅତିରିକ୍ତ ଦାୟିତ୍ୱ ଦିଆଗଲେ ହୁଏତ ସେ ଅଧିକ ଭଲ ପ୍ରଦର୍ଶନ କରିବାକୁ ଚେଷ୍ଟା କରିପାରନ୍ତି। ଇଂଲଣ୍ଡ ଟୁର୍କୁ ଲକ୍ଷ୍ୟ ରଖି ପାଣ୍ଡ୍ୟାଙ୍କୁ ଇଂଲଣ୍ଡ ବିପକ୍ଷ ୪ ମ୍ୟାଚ ବିଶିଷ୍ଟ ଘରୋଇ ସିରିଜରେ ଖେଳାଯାଇଥିଲା। ଏହାଦ୍ୱାରା ତାଙ୍କ ବୋଲିଂ ଓ୍ବାର୍କଲୋଡ୍ ବୃଦ୍ଧିପାଇବ ବୋଲି ଆଶା କରାଯାଇଥିଲା। କିନ୍ତୁ ଯାହା ଦେଖାଗଲା ସେ ନିକଟ ଭବିଷ୍ୟତରେ ଟି୨୦ ଅବା ଦିନିକିଆ ଫର୍ମାଟରେ ଗୋଟିଏ କିମ୍ବା ଦୁଇ ଓଭରରୁ ଅଧିକ ବୋଲିଂ କରିବାରେ ସକ୍ଷମ ହେବେ ନାହିଁ। ପିଠିରେ ଅସ୍ତ୍ରୋପଚାର ପରଠାରୁ ହାର୍ଦ୍ଦିକ ଆଉ ପୂର୍ବଭଳି ବୋଲିଂ କରିପାରୁନାହାନ୍ତି। ଇଞ୍ଜୁରି ପୂର୍ବରୁ ସେ ମିଡିୟମ ଫାଷ୍ଟ ବୋଲର ଥିଲେ। କିନ୍ତୁ ବର୍ତ୍ତମାନ ଲଗାତର ଘଣ୍ଟାପ୍ରତି ୧୩୫ କିଲୋମିଟର ବେଗରେ ବୋଲିଂ କରିବା ତାଙ୍କ ପକ୍ଷେ ସମ୍ଭବପର ନୁହେଁ। କାରଣ ଏହାଦ୍ୱାରା ତାଙ୍କ ପିଠିରେ ଯନ୍ତ୍ରଣା ହୋଇପାରେ। ତେଣୁ ସେ ବର୍ତ୍ତମାନ ମ୍ୟାଚ୍ ପିନିଶିଂ ଦାୟିତ୍ୱ ତୁଲାଇବା ଉପରେ ବିଶେଷ ଧ୍ୟାନ ଦେବେ।
