ପାଟନା,୯।୧୦: ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସମର୍ଥକଭାବେ ଜଣାଶୁଣା ଅତ୍ୟନ୍ତ ପଛୁଆ ବର୍ଗ (ଇବିସି)ଙ୍କ ପ୍ରତି ବିହାର ମୁଖ୍ୟମନ୍ତ୍ରୀ ନୀତୀଶ କୁମାର ଅଣଦେଖା କରୁଥିବା ବରିଷ୍ଠ ଭାଜପା ନେତା ତଥା ପୂର୍ବତନ ଉପମୁଖ୍ୟମନ୍ତ୍ରୀ ସୁଶୀଲ କୁମାର ମୋଦି ଅଭିଯୋଗ କରିଛନ୍ତି। ପୌର ନିର୍ବାଚନରେ ଓବିସି ଏବଂ ଇବିସିଙ୍କ ପାଇଁ ଦିଆଯାଇଥିବା କୋଟାକୁ ପାଟନା ହାଇକୋର୍ଟ ବେଆଇନ ଘୋଷଣା କରିଥିଲେ। ଏଭଳି ପ୍ରତିକୂଳ ରାୟ ପାଇଁ ସୁଶୀଲ ମୁଖ୍ୟମନ୍ତ୍ରୀ ନୀତୀଶଙ୍କୁ ଦାୟୀ କରିବା ସହ ତାଙ୍କ ଇସ୍ତଫା ଦାବି କରିଛନ୍ତି। ଏଭଳି କୋଟା ପାଇଁ ସୁପ୍ରିମକୋର୍ଟଙ୍କ ତିନୋଟି ପରୀକ୍ଷା ନିୟମ ଧାର୍ଯ୍ୟ କରିଥିଲେ। ଏଥିପାଇଁ କମିଶନ ଗଠନ ନିମନ୍ତେ ଆଡଭୋକେଟ ଜେନେରାଲ ଲଳିତ କିଶୋର ରାଜ୍ୟ ସରକାରଙ୍କୁ ଜଣାଇଥିଲେ। ଏହା ଉପରେ ରାଜ୍ୟ ନିର୍ବାଚନ କମିଶନ ମାର୍ଚ୍ଚ ୨୨ ଓ ମେ’ ୧୧ରେ ସରକାରଙ୍କ ପରାମର୍ଶ ଲୋଡ଼ିଥିଲେ। ଅନୁସୂଚିତ ଜାତି, ଜନଜାତି ଏବଂ ଓବିସିଙ୍କ ପାଇଁ ଆସନ ସଂରକ୍ଷଣ ୫୦ ପ୍ରତିଶତରୁ ଅଧିକ ହୋଇପାରିବ ନାହିଁ। ତେଣୁ ଓବିସିମାନଙ୍କ ପଛୁଆପଣର ତଥ୍ୟ ସଂଗ୍ରହ ଲାଗି କମିଶନ ଗଠନ କରିବାକୁ କୁହାଯାଇଥିଲା। ମୁଖ୍ୟମନ୍ତ୍ରୀଙ୍କ ଅନାଗ୍ରହ ଯୋଗୁ ଆଡଭୋକେଟ ଜେନେରାଲ ମତ ବଦଳାଇଥିବାବେଳେ ରାଜ୍ୟ ନିର୍ବାଚନ କମିଶନ ୩ ପରୀକ୍ଷା ନିୟମରେ ଅଟଳ ରହିଥିଲେ। ସେମାନଙ୍କର ପରସ୍ପର ବିରୋଧୀ ଆଭିମୁଖ୍ୟ ଯୋଗୁ ଗତ ୪ ତାରିଖରେ ହାଇକୋର୍ଟ କୋଟା ଆବେଦନକୁ ଖାରଜ କରିଦେଇଥିଲେ ବୋଲି ସୁଶୀଲ କହିଛନ୍ତି। ଇବିସିମାନେ ପ୍ରଧାନମନ୍ତ୍ରୀଙ୍କ ସମର୍ଥନ ହୋଇଥିବାରୁ ନୀତୀଶ ଜାଣିଶୁଣି ଏଭଳି କରିଥିବା ସେ ଅଭିଯୋଗ କରିଛନ୍ତି।
ଅନ୍ୟପକ୍ଷରେ ବିହାରରେ ଜନ ସୁରାଜ ପଦଯାତ୍ରା ଚଳାଇଥିବା ନିର୍ବାଚନ ରଣନୀତିକାର ପ୍ରଶାନ୍ତ କିଶୋର ମୁଖ୍ୟମନ୍ତ୍ରୀ ନୀତୀଶଙ୍କୁ ସମାଲୋଚନା କରିଛନ୍ତି। ଜେଡିୟୁ ନେତା ଭ୍ରମର ଶିକାର ହେବା ସହ ରାଜନୈତିକ କ୍ଷେତ୍ରରେ ଏକଘରିକିଆ ହୋଇଗଲେଣି। ବୟସାଧିକ୍ୟ ଯୋଗୁ ନୀତୀଶ କହିବାବେଳେ ହଡ଼ବଡ଼େଇ ଯାଉଛନ୍ତି ଓ ତାଙ୍କ କଥାବାର୍ତ୍ତାରୁ ଭୟ ବାରିହେଉଛି ବୋଲି ପ୍ରଶାନ୍ତ କହିଛନ୍ତି।