ପାଟଣା,୨୩।୫(ସ୍ବ. ପ୍ର.): କେନ୍ଦୁଝର ଜିଲା ପାଟଣା ଥାନା କୁଣ୍ଡଳା ଗ୍ରାମର ଝାଟିଆଳି ସାହିର ମନୋଜ କୁମାର ଦଣ୍ଡପାଟ ଗଣିତ ଅଧ୍ୟାପକ ଭାବେ ନିଯୁକ୍ତି ପାଇଛନ୍ତି। ଓଡିଶା ଷ୍ଟେଟ ସିଲେକ୍ସନ ବୋର୍ଡ ଦ୍ୱାରା ହୋଇଥିବା ଅଧ୍ୟାପକ ପରୀକ୍ଷାରେ ଅନୁସୂଚିତ ଜାତି ବର୍ଗ ର଼୍ୟାଙ୍କ-୧ରେ ରହି କୃତକାର୍ଯ୍ୟ ହୋଇଛନ୍ତି। ଗତ ମଙ୍ଗଳବାର ମୁଖ୍ୟମନ୍ତ୍ରୀ ନବୀନ ପଟନାୟକ, ଉଚ୍ଚ ଶିକ୍ଷା ମନ୍ତ୍ରୀ ଅରୁଣ ସାହୁ, ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ର ଲୋକ ସେବା ଭବନ ଭୁବନେଶ୍ୱରରେ ତାଙ୍କୁ ଏହି ନିଯୁକ୍ତି ପତ୍ର ପ୍ରଦାନ କରିଛନ୍ତି।
ବ୍ୟାସନଗର ସ୍ବୟଂଶାସିତ ମହାବିଦ୍ୟାଳୟରେ ଗଣିତ ଅଧ୍ୟାପକ ଭାବେ ଯୋଗ ଦାନ କରିବେ। ମାତ୍ର ଅଷ୍ଟମ ଶ୍ରେଣୀ ବେଳୁ ମନୋଜ ତାଙ୍କ ବାପା ଡାକ୍ତର ଦଣ୍ଡପାଟଙ୍କୁ ହରାଇଥିଲେ। କିନ୍ତୁ ଅଧ୍ୟବସାୟ ଓ କଠିନ ପରିଶ୍ରମ ବଳରେ ସେ ତାଙ୍କ ମାମୁ ମଙ୍ଗଳା ନାଏକଙ୍କ ପ୍ରତ୍ସାହନରେ ଆଉ କେବେ ପଛକୁ ଫେରି ଚାହିଁ ନାହାନ୍ତି। ତାଙ୍କ ସଫଳତାର ଶ୍ରେୟ ସେ ତାଙ୍କ ମାମୁ, ବିଦ୍ୟାଳୟ ଶିକ୍ଷକ ଓ ମହାବିଦ୍ୟାଳୟର ଅଧ୍ୟାପକଙ୍କୁ ଦେଇଛନ୍ତି। ମନୋଜ ମିରିଖୋଜି କୁଣ୍ଡଳା ହାଇସ୍କୁଲରେ ମାଟ୍ରିକ ପାସ କଲା ପରେ ଭୁବନେଶ୍ୱରରେ ପାଠ ପଢ଼ି ୯୪.୬ ପ୍ରତିଶତ ମାର୍କ ରଖି ଉତ୍ତୀର୍ଣ୍ଣ ହୋଇଥିଲେ। ଯୁକ୍ତ ୩ ରେ ତାଙ୍କର ସଫଳତା ପାଇଁ ତାଙ୍କୁ ଗୋଲ୍ଡ ମେଡାଲ ମଧ୍ୟ ମିଳିଥିଲା। ପରେ ସେ କିଟ ବିଶ୍ୱ ବିଦ୍ୟାଳୟ ରେ ଗଣିତରେ ଏମଏସସିରେ ୯୪.୧ ପ୍ରତିଶତ ନମ୍ବର ରଖିକୃତ କାର୍ଯ୍ୟ ହୋଇଥିଲେ।