ନିଜକୁ ସୁସ୍ଥ ରଖିବା ଲାଗି ଆମେ ସୁଷମ ତଥା ଭିଟାମିନ୍ଯୁକ୍ତ ଖାଦ୍ୟ ଖାଇବା ଦରକାର। ଗରିଷ୍ଠ ତଥା ଅପାଚ୍ୟ ଖାଦ୍ୟ ଖାଇବା ସହ ପାଣି ପିଇବାରେ ଏପଟ ସେପଟ ହେଲେ ଅଜୀର୍ଣ୍ଣ ସମସ୍ୟା ସୃଷ୍ଟି ହୋଇଥାଏ। ଏହି ସମସ୍ୟା ଗୁରୁତର ହେଲେ ହସ୍ପିଟାଲରେ ଆଡ୍ମିଶନ ହୋଇ ଚିକିତ୍ସିତ ହେବାକୁ ପଡିଥାଏ। ଯଦି ଆପଣ ଅଜୀର୍ଣ୍ଣ ସମସ୍ୟାର ସମ୍ମୁଖୀନ ହେଉଛନ୍ତି ତେବେ କେତୋଟି ଘରୋଇ ଉପଚାର ମାଧ୍ୟମରୁ ଏଥିରୁ ଉପଶମ ଲାଭ କରିପାରିବେ। ଏଥିପାଇଁ ପ୍ରଥମେ ଖାଦ୍ୟପେୟ ପ୍ରତି ସତର୍କ ହୁଅନ୍ତୁ। କେଉଁ ଖାଦ୍ୟ ଖାଇଲେ ଅଜୀର୍ଣ୍ଣ ସମସ୍ୟା ସୃଷ୍ଟି ହେବାର ଆଶଙ୍କା ରହିଛି ତାହା ଜାଣିବା ଦରକାର। ଗୁରୁପାକଜାତୀୟ ଖାଦ୍ୟ ଯେତେ ନ ଖାଇବେ ତାହା ସେତେ ଭଲ। ଆଉ ଏକ କଥା-ଠିକ ସମୟରେ ଖାଦ୍ୟ ଖାଆନ୍ତୁ। ଅର୍ଥାତ୍, ନିଜର ଖାଦ୍ୟପେୟ ତାଲିକା ଏବଂ ସମୟ ନିର୍ଘଣ୍ଟ ପ୍ରସ୍ତୁତ କରିବା ସହ ତାହାକୁ ଠିକ୍ ଭାବରେ ଅନୁସରଣ କରନ୍ତୁ। ରାତିରେ ଶୋଇବାର ଦୁଇ ଘଣ୍ଟା ପୂର୍ବରୁ ରାତ୍ର ଭୋଜନ ଶେଷ କରନ୍ତୁ। ତା’ସହ ରାତ୍ରଭୋଜନ ପରେ କିଛି ସମୟ ଚଲାବୁଲା କରନ୍ତୁ, ଯାହା ଖାଦ୍ୟକୁ ଠିକ୍ ଭାବରେ ହଜମ କରିବାରେ ସାହାଯ୍ୟ କରିଥାଏ। କଦାପି ତରତର ହୋଇ ଖାଆନ୍ତୁ ନାହିଁ। ଖାଦ୍ୟକୁ ଭଲ ଭାବରେ ଚୋବାଇ ଖାଆନ୍ତୁ, ଯାହାଦ୍ୱାରା ଏହା ସହଜରେ ହଜମ ହୋଇଥାଏ।