ଓଡ଼ାପଡ଼ା, ୩୧ା୧୦ କରୋନା ଆତଙ୍କ ଯୋଗୁ ସତେ ଯେମିତି କେଉଁଠି ଅଟକିଯାଇଛି ପୃଥିବୀ। ପ୍ରଭାବିତ ହୋଇଛନ୍ତି ମଣିଷ। ଅସ୍ତବ୍ୟସ୍ତ ହୋଇଛି ଜୀବନଯାତ୍ରା। ସବୁଠୁ ବେଶି ପ୍ରତିକୂଳ ପ୍ରଭାବ ପଡ଼ିଛି ହୋଇଛି କଳା, ସଂସ୍କୃତି ଏବଂ ଶିକ୍ଷା ଉପରେ। ଗଣେଶପୂଜା, ଦଶହରା ପରେ ଏବେ ପ୍ରସିଦ୍ଧ ଲକ୍ଷ୍ମୀପୂଜା ଉପରେ ଘୋଟିଛି କୋଭିଡ୍ କଳାବାଦଲ। ତେଣୁ ଚଳିତବର୍ଷ ବିଷ୍ଣୁପୁରୀ ପାଲଟିବନି ଇନ୍ଦ୍ରପୁରୀ (ଇନ୍ଦିପୁର), ଯାହାକୁ ନେଇ ପୂଜା କମିଟି, ଶ୍ରଦ୍ଧାଳୁ ଏବଂ ଗ୍ରାମବାସୀଙ୍କ ମନରୁ ମରିଯାଇଛି ସରାଗ।
ଢେଙ୍କାନାଳ ପରେ ଓଡ଼ାପଡା ବ୍ଲକ ଇନ୍ଦିପୁରର ଲକ୍ଷ୍ମୀପୂଜାର ସ୍ବତନ୍ତ୍ର ମହତ୍ତ୍ୱ ରହିଛି। ଦୀର୍ଘଦିନରୁ ଏଠାରେ ମହାମାୟାଙ୍କ ଆବାହନ କରାଯାଉଛି। ଗଣପର୍ବ ଲକ୍ଷ୍ମୀପୂଜାକୁ ଶ୍ରଦ୍ଧାର ସହ ପାଳନ କରାଯାଉଥିବାବେଳେ ସାଂସ୍କୃତିକ କାର୍ଯ୍ୟକ୍ରମ, ବନ୍ଧୁବାନ୍ଧବଙ୍କ ଭିଡ଼, ଯାତ୍ରା ବୁଲାରେ ଗଁାରେ ସୃଷ୍ଟି ହୋଇଥାଏ ସହରର ଭ୍ରମ। ସତେଯେମିତି ଇନ୍ଦିପୁର ପାଲଟିଯାଏ ବିଷ୍ଣୁପୁରୀ। ତେବେ ଚଳିତ ବର୍ଷ ସବୁକିଛି ଫିକା କରିଦେଇଛି କରୋନା। ଅନ୍ୟପଟେ ଗ୍ରାମର ୨୪ ମଣ୍ଡପରେ ଶୁକ୍ରବାର ସନ୍ଧ୍ୟାରୁ ନିରାଡମ୍ବର ଭାବେ ପୂଜା ଆରମ୍ଭ ହୋଇଛି। କେବଳ ବିଧି ପାଳନକୁ ଛାଡ଼ିଦେଲେ ଆଉ ସବୁକୁ ନା’ କରାଯାଇଛି। କୌଣସି ସାଜସଜ୍ଜା, ସାଂସ୍କୃତିକ କାର୍ଯ୍ୟକ୍ରମ କି ଆକର୍ଷଣୀୟ ଭସାଣି ଶୋଭାଯାତ୍ରା ମଧ୍ୟ ହେବନାହିଁ। କୋଭିଡ୍ ନିୟମକୁ କଡ଼ାକଡ଼ି ପାଳନ କରାଯାଇ ପୂଜା ଆୟୋଜନ କରାଯିବ। ସେହିପରି ଚଳିତବର୍ଷ ପୂଜାକୁ ୯ଦିନ ପରିବର୍ତ୍ତେ ୫ ଦିନରେ ସୀମିତ ରଖାଯାଇଛି। ୪ ତାରିଖରେ ମା’ଙ୍କୁ ମେଲାଣି ଦିଆଯିବ ବୋଲି ପୂଜା କମିଟି ମିଳିତ ନିଷ୍ପତ୍ତି ନେଇଛନ୍ତି।
କୋଭିଡ୍ ନିୟମ ପାଳନ ହେବ
ସବୁ ପୂଜା କମିଟି, ସ୍ଥାନୀୟ ପ୍ରଶାସନ ଏବଂ ପୋଲିସ ଅଧିକାରୀଙ୍କ ସହ ଆଲୋଚନା କରାଯାଇ କୋଭିଡ୍ ନିୟମ ପାଳନ ସହ ପୂଜା ଅନୁଷ୍ଠିତ ହେବ ବୋଲି ନିଷ୍ପତ୍ତି ହୋଇଛି। ଭସାଣି ଉତ୍ସବ ହେବନାହିଁ। କେବଳ ବିଧିରକ୍ଷା ପାଇଁ ରୁଦ୍ଧ ମଣ୍ଡପରେ ପୂଜା ଅନୁଷ୍ଠିତ ହେବ।
-ରାଜକିଶୋର ସାହୁ
ସରପଞ୍ଚ, ଇନ୍ଦିପୁର
୯ ଦିନ ବଦଳରେ ୫ଦିନ ପୂଜା
କରୋନା ଭୟରେ ପୂଜା ବ୍ୟତୀତ ଆଉ କୌଣସି କାର୍ଯକ୍ରମ ହେବନାହିଁ। ପୂଜାମଣ୍ଡପକୁ ଚାରିପଟୁ ଘୋଡ଼େଇ ଦିଆଯାଇଛି। କେବଳ ପୂଜକ ଏବଂ କର୍ତ୍ତାଙ୍କ ବ୍ୟତୀତ କାହାରିକୁ ଭିତରକୁ ଛଡ଼ା ଯିବ ନାହିଁ। ୯ଦିନ ବଦଳରେ ୫ଦିନ ପୂଜା ପାଇଁ ମିଳିତ ନିଷ୍ପତ୍ତି ହୋଇଛି।
-ସୁବାସ ପ୍ରଧାନ,
ସମ୍ପାଦକ, ବଡ଼ଦାଣ୍ଡସାହି ପୂଜା କମିଟି
ପରଦା ଆଢୁଆଳରେ ବିରାଜିବେ ମା’
କରୋନା ଯୋଗୁ ପରଦା ଆଢୁଆଳରେ ମା’ଙ୍କର ପୂଜା ଅନୁଷ୍ଠିତ ହେବ। ସମସ୍ତଙ୍କ ମଙ୍ଗଳ ପାଇଁ କଟକଣାକୁ ମାନିବାକୁ ପଡ଼ିବ। ପ୍ରଶାସନର ନିୟମ ମାନି ପୂଜାର୍ଚ୍ଚନା ଆୟୋଜନ କରିବାକୁ ନିଷ୍ପତ୍ତି ନିଆଯାଇଛି।
-କାମାକ୍ଷା ପ୍ରସାଦ ବେହେରା,
ସଭାପତି, ସାରସ୍ବତ ମା’ଲକ୍ଷ୍ମୀ ପୂଜା ଅନୁଷ୍ଠାନ
କେବଳ ନୀତି ସମ୍ପନ୍ନ ହେବ
କରୋନା ପାଇଁ ସବୁ ବନ୍ଦ। ହେଲେ ମା’ଙ୍କ ପୂଜା ବନ୍ଦ ହେବନାହିଁ। ଯଥାସାଧ୍ୟ ନୀତି ସମ୍ପନ୍ନ ହେବ। ସେଥିପାଇଁ କମିଟି ପକ୍ଷରୁ ସବୁ ବ୍ୟବସ୍ଥା କରାଯାଇଛି। ପୂଜା ବ୍ୟତୀତ ଅନ୍ୟ ସବୁ କାର୍ଯ୍ୟକ୍ରମ ବନ୍ଦ ରଖାଯାଇଛି।
-ଗଣେଶ୍ୱର ମହାରଣା,
ସଭାପତି, କଲେଜ ଛକ ପୂଜା କମିଟି
କାହାରି ମନରେ ଉତ୍ସାହ ନାହିଁ
କରୋନା କଟକଣା ଯୋଗୁଁ କାହା ମନରେ ଉତ୍ସାହ ନାହିଁ। ସମସ୍ତେ ଭୟ ଭିତରେ ଅଛନ୍ତି। ମା’ଙ୍କ ପୂଜା ପାଇଁ କେବଳ ବିଧି ପାଳନ ହେବ। ସରକାରୀ ନୀତିନିୟମ ମାନି କେବଳ ବିଧିରକ୍ଷା ବ୍ୟବସ୍ଥା କରାଯାଇଛି।
-ସୁଶୀଲ କୁମାର ନାୟକ, ସମ୍ପାଦକ,
ସାରସ୍ବତ ମା’ ଲକ୍ଷ୍ମୀ ପୂଜା ଅନୁଷ୍ଠାନ