ମହାକାଳପଡ଼ା,୧୭ା୩ (ଡି.ଏନ.ଏ.): ଜଗତ୍ସିଂହପୁର ଜିଲା ଶିଳ୍ପାଞ୍ଚଳରୁ ନିର୍ଗତ ଧୂଆଁର ପ୍ରଭାବ ପଡ଼ୋଶୀ କେନ୍ଦ୍ରାପଡ଼ା ଜିଲା ମହାକାଳପଡ଼ା ଅଞ୍ଚଳରେ ଦେଖିବାକୁ ମିଳିଛି। ଧୂଆଁ ଯୋଗୁ ତାପମାତ୍ରା ବଢ଼ି ଚାଲିଛି ବୋଲି ସ୍ଥାନୀୟ ଅଞ୍ଚଳବାସୀ ଅଭିଯୋଗ କରିଛନ୍ତି। ଶିଳ୍ପାଞ୍ଚଳର ନିର୍ଗତ ଧୂଆଁ ଯୋଗୁ ଉପକୂଳ ଅଞ୍ଚଳରେ ଛୋଟ ଛୋଟ ଶିଶୁଙ୍କ ଶରୀରରେ କୁଣ୍ଡେଇ ହେବା ସହ ଆଲର୍ଜି, ଜ୍ୱର ହେଉଛି ବୋଲି ବତୀଘର ଅଞ୍ଚଳର ଅବନୀ ମଣ୍ଡଳ, କ୍ଷୀତିଶ ବାଇନ, ଦିଲୀପ ଦାସ, ଅନୁକୂଳ ମଣ୍ଡଳ ପ୍ରମୁଖ ଅଭିଯୋଗ କରିଛନ୍ତି। ଏହା କେଉଁ କାରଣରୁ ହେଉଛି ତାହା ଜଣା ନ ପଡ଼ିଲେ ମଧ୍ୟ ବାୟୁମଣ୍ଡଳରେ ପ୍ରଦୂଷଣର ମାତ୍ରା ବୃଦ୍ଧି ଯୋଗୁ ହେଉଛି ବୋଲି ସେମାନେ କହୁଛନ୍ତି। ଅପରପକ୍ଷେ ଖରା ପ୍ରଭାବରେ ତାପମାତ୍ରା ବୃଦ୍ଧି ଯୋଗୁ ଜନଜୀବନ ଅସ୍ତବ୍ୟସ୍ତ ହୋଇପଡୁଛି। ସ୍ଥାନୀୟ ଅଞ୍ଚଳର ଗାଡିଆ, ପୋଖରୀ, ଚୁଆ, କୂପ, ଖାଲପାଟ, ଯୋରି ଆଦି ଶୁଖିଗଲାଣି। ଗୋ ମହିଷାଦି ପାଣି ମୁନ୍ଦେ ପାଇଁ ଡହଳ ବିକଳ ହେଉଛନ୍ତି। ଖରା ଯୋଗୁ ଦିନ ୧୦ଟା ପରେ ଘରୁ ବାହାରିବା ଅସହ୍ୟ ହୋଇପଡୁଛି। ମହାକାଳପଡ଼ା ବ୍ଲକର ବତୀଘର, ଜମ୍ବୁ, ସୁନିତି, ନାଞ୍ଜୁରା, ଖରିନାସୀ, ରାମନଗର ଆଦି ଅଞ୍ଚଳ ସମେତ ବିଭିନ୍ନ ଗଁାରେ ତାପମାତ୍ର ବୃଦ୍ଧି ପାଇଛି। ଅପରପକ୍ଷେ ଶିଳ୍ପ ସଂସ୍ଥାଗୁଡିକରୁ ନିର୍ଗତ ଧୂଆଁ ଓ ଗ୍ୟାସ୍ ଯୋଗୁ ସ୍ଥାନୀୟ କୋଚିଳା, କେନ୍ତିଆ, ପଲ୍ଲିଗଡ଼, ପିତାପାଟ ଆଦି ଗଁାର ଲୋକେ ଅଣନିଃଶ୍ୱାସୀ ହୋଇପଡୁଛନ୍ତି ବୋଲି ହରି ଗୋଚ୍ଛାୟତ, ନାଥ କୁମାର ଭୋଳ, ଲୋକନାଥ ସ୍ବାଇଁ ପ୍ରମୁଖ କହିଛନ୍ତି। ଏମାନଙ୍କ କହିବା କଥା, ସପ୍ତାହେ ହେଲା ଭୀଷଣ ତାପମାତ୍ରା ବୃଦ୍ଧି ପାଇଛି। ଫଳରେ ଘରୁ ବାହାରକୁ ବାହାରିବା କଷ୍ଟ ହୋଇପଡୁଛି। ଖରାଦିନ ଆରମ୍ଭରୁ ତାପମାତ୍ରା ବୃଦ୍ଧି ଯୋଗୁ ଜନଜୀବନ ଅସ୍ତବ୍ୟସ୍ତ ହୋଇପଡୁଛି।