କେନ୍ଦୁଝର,୧୭ା୯(ସ୍ବ.ପ୍ର.): ଖଣିଖାଦାନ ଓ ଶିଳ୍ପ ବହୁଳ କେନ୍ଦୁଝର ଜିଲାରେ ବିଶ୍ୱକର୍ମା ପୂଜା ଫିକା ପଡ଼ିଛି। କରୋନା ପରେ ଚଳିତ ବର୍ଷ ଧୂମ୍ଧାମରେ ପ୍ରଭୁ ବିଶ୍ୱକର୍ମାଙ୍କ ପୂଜା ପାଳନ ହେବା ନେଇ ସମସ୍ତେ ଆଶା ରଖିଥିଲେ। ମାତ୍ର ଖଣିଖାଦାନ ଓ ଶିଳ୍ପ ବନ୍ଦ ସହିତ ଟ୍ରକ ଚଳାଚଳ ବନ୍ଦ ଯୋଗୁ ପୂଜା ମାନ୍ଦା ପଡ଼ିଛି। ବିଶେଷ କରି ଖଣି ଓ ଶିଳ୍ପ ବଢ଼ିଲେ ଏହା ଉପରେ ପ୍ରତ୍ୟକ୍ଷ ଓ ପରୋକ୍ଷ ଭାବରେ ନିର୍ଭରଶୀଳ ଶ୍ରମିକ ଓ କର୍ମଚାରୀଙ୍କ ବ୍ୟତୀତ ଟ୍ରକ୍ ମାଲିକ,କର୍ମଚାରୀ, ଢାବା, ଗ୍ୟାରେଜ, ମୋଟର ପାର୍ଟ ଦୋକାନ ଆଦି ନିର୍ଭରଶୀଳ। ବେକାରୀ ସମସ୍ୟା ଗୁରୁତର ହୋଇପଡ଼ିଛି। ଏଭଳି ପରିସ୍ଥିତିରେ ଲୋକଙ୍କ ହାତରେ ପଇସା ନାହିଁ। ଅନେକ ଟ୍ରକ କାମ ନ ପାଇ ରାସ୍ତା କଡ଼ରେ ମାସ ମାସ ଧରି ଛଡ଼ା ହୋଇଥିବା ବେଳେ ଗ୍ୟାରେଜ, ଢାବା ଆଦି ବନ୍ଦ ରହିଛି। ଫଳରେ ବଞ୍ଚିବା ପାଇଁ ସଂଗ୍ରାମ କରୁଥିବା ଲୋକମାନେ ଖୁସି ମନାଇ ପାରୁନାହାନ୍ତି। ଜିଲାରେ ପାଖାପାଖି ୭୦ ଖଣି ବନ୍ଦ ରହିଥିବା ବେଳେ ବହୁ ଶିଳ୍ପ ବନ୍ଦ ରହିଛି। ସେହିପରି ଖଣିରୁ ବିଭିନ୍ନ କାରଣରୁ ଲୁହାପଥର ପରିବହନ ବନ୍ଦ ରହିଥିବାରୁ ହଜାର ହଜାର ଟ୍ରକ୍ ରାସ୍ତା କଡ଼ରେ ଠିଆ ହୋଇ ରହୁଛନ୍ତି। ଫଳରେ ଲକ୍ଷାଧିକ ପରିବାର ଆର୍ଥିକ ସଙ୍କଟରେ ରହିଥିବା ବେଳେ ଜିଲାର ଅର୍ଥନୈତିକ ଅବସ୍ଥା ସଙ୍କଟରେ ରହିଛି। ଏକ୍ସାସାଇଜ ଡ୍ୟୁଟି ବୃଦ୍ଧି ଯୋଗୁ ସ୍ପଞ୍ଜ, ଷ୍ଟିଲ ମାର୍କେଟରେ ମଧ୍ୟ ମାନ୍ଦାବସ୍ଥା ରହିଛି। ଉତ୍ପାଦନ ମୂଲ୍ୟ ବଢିଯାଉଥିବା ଏବଂ ଲାଭ ହେଉ ନ ଥିବାରୁ ଶିଳ୍ପ ସଂସ୍ଥାଗୁଡ଼ିକ ଲୁହାପଥର କିଣିବା ଏବଂ ଉତ୍ପାଦନରେ କାଟଛାଣ୍ଟ କରୁଛନ୍ତି।
ଆଗରୁ ବିଶେଷ ବିଶ୍ୱକର୍ମା ପୂଜା ଅନେକ ସ୍ଥାନରେ ବଡ଼ଆଡମ୍ବରରେ ହୋଇ ଆସୁଥିଲ। କରୋନା ପରେ ଷ୍ଟିଲ ବଜାରରେ ମାନ୍ଦାବସ୍ଥା ଯୋଗୁ ଏହାର ପ୍ରଭାବ ସିଧାସଳଖ କେନ୍ଦୁଝର ଜିଲାର ଅର୍ଥନୀତି ଉପରେ ପଡ଼ିଛି। ଏଣୁ ଚଳିତ ବର୍ଷ ଲୋକଙ୍କ ମଧ୍ୟରେ ସେଭଳି ଉତ୍ସାହ ଉଦ୍ଦୀପନା ଦେଖିବାକୁ ମିଳୁନାହିଁ ବୋଲି ବରିଷ୍ଠ ନାଗରିକ ଅଲେଖ ଚନ୍ଦ୍ର ପାତ୍ର କହିଛନ୍ତି।
ଜିଲାର ଅନେକ ଲୋକ ଟ୍ରକ୍ ବ୍ୟବସାୟ କରି ଚଳନ୍ତି। ନିଯୁକ୍ତି ସୁଯୋଗ ନ ଥିବାରୁ ଶିକ୍ଷିତ ଯୁବକମାନେ ମଧ୍ୟ ଖଣ୍ଡେ ଖଣ୍ଡେ ଟ୍ରକ କିଣି ପରିବାର ଚଳାଉଛନ୍ତି। ଏବେ ଲୁହାପଥର ପରିବହନ ବନ୍ଦ ଥିବାରୁ ଟ୍ରକ ସବୁ ଠିଆ ହୋଇଛି। କାଁଭାଁ ଟ୍ରକ୍ କାମ ପାଉଛନ୍ତି। ସମସ୍ତେ ଆର୍ଥିକ ସଙ୍କଟରେ ରହିଛନ୍ତି। ଏଣୁ ଏଭଳି ପରିସ୍ଥିତିରେ ଉତ୍ସବ ମନାଇବା ପାଇଁ ଆଗ୍ରହ ନାହିଁ ବୋଲି କହିଛନ୍ତି ଟ୍ରକ୍ ମାଲିକ ସୁବ୍ରତ ମହାନ୍ତି।
ଟ୍ରକ୍, ଖଣିଖାଦାନ ଓ ଶିଳ୍ପ ବ୍ୟବସାୟ ଉପରେ କେନ୍ଦୁଝରର ଅର୍ଥନୀତି ନିର୍ଭର କରିଥାଏ। ଏସବୁରେ ମାନ୍ଦାବସ୍ଥା ଦେଖାଦେଇଥିବାରୁ ଜିଲାରେ ପୂଜାପାର୍ବଣର ଉତ୍ସାହ ସବୁ ଫିକା ପଡୁଛି ବୋଲି କହିଛନ୍ତି ପୂର୍ବତନ ବିଧାୟକ ସୁବର୍ଣ୍ଣ ନାୟକ।