ଛତ୍ରପୁର,୧୪।୮(ଡି.ଏନ୍.ଏ): ଗଞ୍ଜାମ ଜିଲା ଛତ୍ରପୁର ସବ୍ଡିଭିଜନରେ କରୋନା ଅକ୍ରାନ୍ତଙ୍କ ସଂଖ୍ୟା କମୁଛି। ୮୧ ପ୍ରତିଶତ ଲୋକ କରୋନାରୁ ସୁସ୍ଥ ହେବା ସହ ଆକ୍ରାନ୍ତଙ୍କ ମଧ୍ୟରୁ କେବଳ ୧.୦୪ ପ୍ରତିଶତଙ୍କ ମୃତ୍ୟୁ ଘଟିଛି । କୋଭିଡ୍ ନିୟନ୍ତ୍ରଣ ପାଇଁ ସଚେତନତା କାର୍ଯ୍ୟକ୍ରମ, ଟେଷ୍ଟ ବୃଦ୍ଧି ଓ ଏନ୍ଫୋର୍ସମେଣ୍ଟ କଡାକଡି ଉପରେ ଅଧିକ ଗୁରୁତ୍ୱ ଦିଆଯାଉଥିବା ଶୁକ୍ରବାର ଛତ୍ରପୁର ଉପଜିଲାପାଳଙ୍କ କାର୍ଯ୍ୟାଳୟ ଠାରେ ଅନୁଷ୍ଠିତ ଖବରଦାତା ସମ୍ମିଳନୀରେ ରାଜ୍ୟ ସରକାରଙ୍କ ଦ୍ୱାରା ନିଯୁକ୍ତ ସ୍ବତନ୍ତ୍ର ଏଡିଏମ୍ ପାରୁଲ ପଟୱାରୀ କହିଛନ୍ତି ।
କରୋନା ରୋଗୀମାନଙ୍କ ନିକଟକୁ ଯାଇ ସ୍ବାସ୍ଥ୍ୟ ଯାଞ୍ଚ ସହ ଡାକ୍ତରମାନେ କଲ୍ କରି ଏବଂ ଦିନେ ଛଡା ଦିନେ ଜୁମ୍ ଭିସି ଦ୍ୱାରା ସେମାନଙ୍କ ସ୍ବାସ୍ଥ୍ୟବସ୍ଥା ବୁଝୁଥିବା ଏଡିଏମ୍ ସୂଚନା ଦେଇଛନ୍ତି । ବର୍ତ୍ତମାନ ସୁଦ୍ଧା କରୋନା ରୋଗୀଙ୍କ ନିକଟକୁ ୧୩ ହଜାର ୪୩୬ କଲ୍ ଗଲାଣି । ଏଥିସହ କରୋନାରୁ ସୁସ୍ଥ ୮୧ ଜଣ କୋଭିଡ୍ ବନ୍ଧୁ ମଧ୍ୟ କରୋନା ରୋଗୀ ମାନଙ୍କୁ କାଉନସିଲିଂ କରୁଛନ୍ତି । କୋଭିଡ୍ ମନିଟର ମଧ୍ୟ ପରିଚାଳନାରେ ସହଯୋଗ କରୁଛନ୍ତି । କରୋନାରେ ଛତ୍ରପୁର ସବ୍ଡିଭିଜନ ୪୧ ଜଣଙ୍କ ମୃତ୍ୟୁ ହୋଇଛି। ଏହି ସବ୍ଡିଭିଜନରେ ୭୪୧ ଗାଁ (୭୮ ପ୍ରତିଶତ) ଓ ସହରାଞ୍ଚଳର ୬୯ ଟି ୱାର୍ଡ (୫୧ ପ୍ରତିଶତ) ଗ୍ରୀନ୍ ଜୋନ୍ରେ ରହିଛି । କବିସୂର୍ଯ୍ୟନଗର, ପୁରୁଷୋତମପୁର ଓ ଛତ୍ରପୁର ରେ ୩ଟି ଲେଖାଏ ଏବଂ ହିଞ୍ଜିଳିରେ ୨ ଟି ଅଞ୍ଚଳ କଣ୍ଟେନମେଣ୍ଟ ଜୋନ୍ରେ ଅଛି । ଏହି ସବ୍ଡିଭିଜନ ଅଧିନ ଉଭୟ ଗ୍ରାମାଞ୍ଚଳ ଓ ସହରାଞ୍ଚଳରେ ମୋବାଇଲ୍ ସ୍ବାସ୍ଥ୍ୟ ସେବା ଶନିବାରଠାରୁ ଯୋଗାଇଦିଆଯିବ। ଫଳରେ ଲୋକେ ଘର ନିକଟରେ ସ୍ବାସ୍ଥ୍ୟସେବା ପାଇପାରିବେ। ଡାକ୍ତରଙ୍କ ଦ୍ୱାରା ସ୍ବାସ୍ଥ୍ୟ ଯାଞ୍ଚ ସହ ଔଷଧ ଆଦି ମିଳିବ ।
ଉକ୍ତ ଗାଡି ୧୫ରୁ ୧୭ ପର୍ଯ୍ୟନ୍ତ ଛତ୍ରପୁର, ୧୮ରୁ ୨୦ ପର୍ଯ୍ୟନ୍ତ ଗଞ୍ଜାମ, ୨୧ରୁ ୨୩ ଯର୍ଯ୍ୟନ୍ତ ଖଲିକୋଟ, ୨୪ରୁ ୨୬ ପର୍ଯ୍ୟନ୍ତ ହଞ୍ଜିଳି , ୨୭ରୁ ୨୯ ପର୍ଯ୍ୟନ୍ତ ପୁରୁଷୋତମପୁର, ୩୦ରୁ ସେପ୍ଟେମ୍ବର ୧ ପର୍ଯ୍ୟନ୍ତ ପୋଲସରା ଅଞ୍ଚଳ ବୁଲିବ। ସେହିଭଳି ସେପ୍ଟେମ୍ବର ୨ ରୁ ୪ ପର୍ଯ୍ୟନ୍ତ ବେଗୁନିଆପଡା ଏବଂ ୫ରୁ ୭ ତାରିଖ ପର୍ଯ୍ୟନ୍ତ କବିସୂର୍ଯ୍ୟନଗର ଅଞ୍ଚଳରେ ପୂର୍ବାହ୍ନ ୮ ଟା ରୁ ଅପରାହ୍ନ ୨ ଟା ପର୍ଯ୍ୟନ୍ତ ବୁଲି ସ୍ବାସ୍ଥ୍ୟସେବା ଯୋଗାଇଦେବେ । ଏଥିରେ ଛତ୍ରପୁର ଉପଜିଲପାଳ ପ୍ରିୟ ରଞ୍ଜନ ପୃଷ୍ଟି ଉପସ୍ଥିତ ଥିଲେ ।