ଟୋକିଓ,୨୮।୭(ପି.ଟି.): ଅଲିମ୍ପିକ୍ସ ଆରମ୍ଭ ହେବାର ୫ ଦିନରେ ଟୋକିଓରେ କରୋନା ଭାଇରସଜନିତ ସଂକ୍ରମଣ ଶୀର୍ଷରେ ପହଞ୍ଚିଛି। ଫଳରେ ଆୟୋଜକମାନଙ୍କ ଚିନ୍ତା ବଢିଛି। ୨୭ ତାରିଖ ମଙ୍ଗଳବାର ଟୋକିଓରେ କୋଭିଡ୍-୧୯ କେସ ୨,୮୪୮ରେ ପହଞ୍ଚିଛି। ପୂର୍ବ ରେକର୍ଡ (୨,୫୨୦)କୁ ଏହା ପଛରେ ପକାଇଛି। ଗତବର୍ଷ ମହାମାରୀ ଆରମ୍ଭ ପରଠାରୁ ଟୋକିଓରେ ଏହି ସଂକ୍ରମଣ ଏବେ ୨ ଲକ୍ଷରେ ପହଞ୍ଚିଛି।
ଟୋକିଓରେ ଇମର୍ଜେନ୍ସି ଜାରି ରହିଛି। ଅଲିମ୍ପିକ୍ସ ଶେଷ ହେବା ପର୍ଯ୍ୟନ୍ତ ଏହା ଜାରି ରହିବ। ଅଗଷ୍ଟ ଶେଷ ଆଡକୁ ପାରା ଅଲିମ୍ପିକ୍ସ ଆରମ୍ଭ ହେବା ପୂର୍ବ ପର୍ଯ୍ୟନ୍ତ ଏହା ଜାରି ରହିବ ବୋଲି କୁହାଯାଇଛି। ଶୁକ୍ରବାରଠାରୁ ଆରମ୍ଭ ହୋଇଥିବା ଏହି ମେଗା ଇଭେଣ୍ଟରେ ଡେଲଟା ଭାରିଆଣ୍ଟର ପ୍ରଭାବ ଦେଖିବାକୁ ମିଳିବ ବୋଲି ବିଶେଷଜ୍ଞମାନେ ସତର୍କ କରାଇଥିଲେ। ଜାପାନରେ ଟିକାକରଣ ବିଳମ୍ବରେ ଆରମ୍ଭ ହୋଇଥିଲା ଓ ଏହା ମନ୍ଥରଗତିରେ ଚାଲିଥିଲା। ଏ ପର୍ଯ୍ୟନ୍ତ ୨୫.୫ ପ୍ରତିଶତ ଲୋକଙ୍କର ସମ୍ପୂର୍ଣ୍ଣ ଟିକାକରଣ ହୋଇଛି ବୋଲି ଜାପାନ ସରକାରଙ୍କ ତରଫରୁ କୁହାଯାଇଛି। ଅନ୍ୟ ଦେଶଗୁଡିକ ତୁଳନାରେ ଜାପାନରେ ମୃତ୍ୟୁ ହାର କିନ୍ତୁ ଯଥେଷ୍ଟ କମ୍ ରହିଛି। ଜାପାନରେ ଏ ପର୍ଯ୍ୟନ୍ତ ମୋଟ ୮,୭୦, ୪୪୫ କେସ୍ ଚିହ୍ନଟ ହୋଇଥିବା ବେଳେ ମାତ୍ର ୧୫,୧୨୯ ଲୋକ ମୃତ୍ୟୁବରଣ କରିଛନ୍ତି।
