ଅଟାରି,୧୭।୧୨: ପଞ୍ଜାବ ଅମୃତସରର ଅଟାରି ସୀମା ନିକଟରେ ଏକ ଅନୁପ୍ରବେଶ ଉଦ୍ୟମକୁ ବିଏସ୍ଏଫ୍ ଯବାନ ପଣ୍ଡ କରିଦେଇଛନ୍ତିି। ରାଜତାଲ ବିଓପିରେ ୨ ଜଣ ପାକିସ୍ତାନୀ ଭାରତରେ ଅନୁପ୍ରବେଶ ଉଦ୍ୟମ କରୁଥିଲେ। ବିଏସ୍ଏଫ୍ ଯବାନଙ୍କ ପକ୍ଷରୁ ସତର୍କ ସୂଚନା ଜାରି କରାଯାଇଥିଲା। ତେବେ ଏହାକୁ ଅନୁପ୍ରବେଶକାରୀମାନେ ମାନି ନ ଥିଲେ। ଶେଷରେ ବାଧ୍ୟ ହୋଇ ବିଏସ୍ଏଫ୍ ଯବାନଙ୍କ ପକ୍ଷରୁ ଗୁଳି ଚାଳନା କରାଯାଇଥିଲା। ଅନୁପ୍ରବେଶକାରୀଙ୍କ ନିକଟରୁ ଏକେ-୪୭ ସହିତ ବହୁ ପରିମାଣର ଗୁଳିଗୋଳା ଏବଂ ଅନ୍ୟ ଅସ୍ତ୍ରଶସ୍ତ୍ର ଜବତ ହୋଇଥିବା ବିଏସ୍ଏଫ୍ ପକ୍ଷରୁ ସୂଚନା ଦିଆଯାଇଛି। ଭାରତରେ ଆତଙ୍କବାଦୀଙ୍କୁ ଅନୁପ୍ରବେଶ କରାଇବା ପାଇଁ ପାକିସ୍ତାନ ସୈନ୍ୟ ବାହିନୀ ପକ୍ଷରୁ ବିଭିନ୍ନ ରାସ୍ତାରେ ଉପଯୋଗ କରାଯାଉଛି। ପୂର୍ବରୁ ବ୍ୟବହୃତ ହେଉଥିବା ରାସ୍ତା ବଦଳରେ ଏବେ ନୂଆ ନୂଆ ରାସ୍ତା ବାହାର କରିବାକୁ ଆତଙ୍କବାଦୀଙ୍କୁ ପାକିସ୍ତାନ ସୈନ୍ୟ ବାହିନୀ ପକ୍ଷରୁ ସ୍ବତନ୍ତ୍ର ତାଲିମ ଦିଆଯାଉଛି। ଯାହାଦ୍ୱାରା ଭାରତରେ ଅନୁପ୍ରବେଶ କରିବା ସହଜ ହୋଇ ପାରିବ ବୋଲି କୁହାଯାଉଛି।