ନୂଆଦିଲ୍ଲୀ,୧୩।୧:ଗତ କିଛି ମାସ ହେବ ଦେଶରେ ମୁଦ୍ରାସ୍ଫୀତି ହ୍ରାସ ପାଉଛି। ଫଳରେ ସବୁ ବର୍ଗର ଗ୍ରାହକ କିଛି ପରିମାଣର ଆଶ୍ୱସ୍ତି ଲାଭ କରୁଛନ୍ତି। ଏପରିକି ୨୦୨୨ ଡିସେମ୍ବରରେ ମୁଦ୍ରାସ୍ଫୀତି ୫.୭୨%କୁ ଖସି ଆସିଛି। ବିଶେଷକରି ଗତ ୧୨ମାସର ସବୁଠୁ ନିମ୍ନ ସ୍ତରକୁ ମୁଦ୍ରାସ୍ଫୀତି ଖସି ଆସିଛି। ସେହିପରି ଖୁଚୁରା ଦରଦାମ ବୃଦ୍ଧି ଗତ ଏକ ବର୍ଷରେ ସବୁଠୁ କମ୍ ହୋଇଛି ବୋଲି ଜଣାପଡ଼ିଛି। ଏହା ପୂର୍ବରୁ ୨୦୨୨ ନଭେମ୍ବରରେ ମୁଦ୍ରାସ୍ଫୀତି ୫.୮୮%ରେ ରହିଥିଲା। ଏପରିକି ୨୦୨୧ ଡିସେମ୍ବରରେ ଏହାର ପରିମାଣ ୫.୮୮% ରହିଥିଲା। ସେହିଭଳି ଜାତୀୟ ପରିସଂଖ୍ୟାନ ସଂସ୍ଥା (ଏନ୍ଏସ୍ଓ) ପକ୍ଷରୁ ଗୁରୁବାର ମୁଦ୍ରାସ୍ଫୀତି ହାର ଜାରି କରାଯାଇଛି। କ୍ରମାଗତ ୩ୟ ମାସ ପାଇଁ ଏହା ହ୍ରାସ ଘଟିଥିବାବେଳେ ଡିସେମ୍ବରରେ ମୁଦ୍ରାସ୍ଫୀତିରେ ରେକର୍ଡ ହ୍ରାସ ହୋଇଛି। ଏଥିସହ ଦ୍ବିତୀୟ ମାସ ଯେତେବେଳେ ଲଗାତର ମୁଦ୍ରାସ୍ଫୀତି ଆର୍ବିଆଇ ପକ୍ଷରୁ ନିର୍ଦ୍ଧାରିତ ୨ରୁ୬ % ମଧ୍ୟରେ ରହିଛି। ମୁଖ୍ୟତଃ ଖାଦ୍ୟ ସାମଗ୍ରୀ ଦାମରେ ହ୍ରାସ କାରଣରୁ ଖୁଚୁରା ଦରବୃଦ୍ଧିରେ ହ୍ରାସ ହୋଇଛି। ଗତ ଡିସେମ୍ବରରେ ଖାଦ୍ୟ ମୁଦ୍ରାସ୍ଫୀତି ହାର କମ୍ ହୋଇ ୪.୧୯% ହୋଇଥିଲା, ଯାହା ଡିସେମ୍ବରରେ ୪.୬୭% ରହିଥିଲା।
