ଭୁବନେଶ୍ୱର, ୨୭।୬(ବ୍ୟୁରୋ): ସାଇ ଇଣ୍ଟରନ୍ୟାଶନାଲ ସ୍କୁଲ ପ୍ରତିଷ୍ଠାତା ବିଜୟ କୁମାର ସାହୁଙ୍କୁ ଶ୍ରଦ୍ଧାଞ୍ଜଳି ଦେବା ପାଇଁ ପୁରାତନ ଛାତ୍ରୀଛାତ୍ରଙ୍କ ଦ୍ୱାରା ‘ଆମ ହୃଦୟରେ ଚିରଦିନ ପାଇଁ’ ଏକ ଭର୍ଚୁଆଲ ଶ୍ରଦ୍ଧାଞ୍ଜଳି କାର୍ଯ୍ୟକ୍ରମ ଶନିବାର ଅନୁଷ୍ଠିତ ହୋଇଯାଇଛି। ଏହି ଅବସରରେ ରାଜ୍ୟପାଳ ପ୍ରଫେସର ଗଣେଶୀ ଲାଲ୍ କହିଥିଲେ, ଦେଶ ଓ ରାଜ୍ୟର ଶିକ୍ଷା କ୍ଷେତ୍ରରେ ବିଜୟ ସାହୁଙ୍କ ଅବଦାନ ଚିରସ୍ମରଣୀୟ। ଏଭଳି ବ୍ୟକ୍ତିତ୍ୱଙ୍କ କାର୍ଯ୍ୟକୁ ମନେ ରଖିବା ପାଇଁ ପଟିଆ ଛକରୁ ଇନ୍ଫୋସିଟିକୁ ସଂଯୋଗ କରୁଥିବା ରାସ୍ତାକୁ ‘ବିଜୟ ପଥ’ ବା ‘ବିଜୟ ମାର୍ଗ’ ନାମରେ ନାମିତ କରାଯାଉ ବୋଲି ରାଜ୍ୟପାଳ କହିଥିଲେ। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କହିଥିଲେ, ସ୍ବର୍ଗତ ସାହୁଙ୍କ ପରି ଜଣେ ଶିକ୍ଷାବିତ୍ଙ୍କୁ ହରାଇବା ରାଜ୍ୟ ପାଇଁ ଅପୂରଣୀୟ କ୍ଷତି। ତାଙ୍କ ପରାମର୍ଶ ଓ ମାର୍ଗଦର୍ଶନ ସହ ଛାତ୍ରୀଛାତ୍ରଙ୍କ କଠିନ ପରିଶ୍ରମ ଓ ସଫଳତା ତାଙ୍କୁ ସର୍ବଦା ଗର୍ବିତ କରିବ। ପୁରୀ ଗଜପତି ଦିବ୍ୟସିଂହ ଦେବ, ଓଡ଼ିଶା ଦକ୍ଷତା ବିକାଶ ପ୍ରାଧିକରଣ ଚେୟାରମ୍ୟାନ ସୁବ୍ରତୋ ବାଗ୍ଚୀ, ଗଣଶିକ୍ଷା ମନ୍ତ୍ରୀ ସମୀର ରଞ୍ଜନ ଦାଶ, ଏମ୍ପି ଅମର ପଟ୍ଟନାୟକ, ସିବିଏସ୍ଇ ଚେୟାରମ୍ୟାନ ମନୋଜ ଆହୁଜା, ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗର ଅତିରିକ୍ତ ମୁଖ୍ୟ ଶାସନ ସଚିବ ପ୍ରଦୀପ୍ତ କୁମାର ମହାପାତ୍ର, ଗଣଶିକ୍ଷା ବିଭାଗ ପ୍ରମୁଖ ସଚିବ ସତ୍ୟବ୍ରତ ସାହୁ, ବିଏମ୍ସି କମିଶନର୍ ସଞ୍ଜୟ ସିଂ, କ୍ରୀଡ଼ା ଓ ପର୍ଯ୍ୟଟନ ବିଭାଗ ସଚିବ ବିଶାଲ ଦେବ, ପୂର୍ବତନ କେନ୍ଦ୍ର ଶିକ୍ଷା ସଚିବ ଅନିଲ ସ୍ବରୂପ, ବ୍ରିଟିଶ କାଉନସିଲ୍ର ସହକାରୀ ନିର୍ଦ୍ଦେଶକ ରିତ୍ତିକା ପାଟ୍ରିକ୍ଙ୍କ ସମେତ ବହୁ ବ୍ୟକ୍ତିବିଶେଷ, ବନ୍ଧୁ ଓ ପରିବାରବର୍ଗ ଭର୍ଚୁଆଲରେ ସାମିଲ ହୋଇ ବିଜୟ ସାହୁଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ। ସ୍କୁଲର ପୁରାତନ ଛାତ୍ରୀଛାତ୍ରମାନେ ବିଜୟ ସାହୁଙ୍କୁ ଅଶ୍ରୁଳ ଶ୍ରଦ୍ଧାଞ୍ଜଳି ଦେବା ଉଦ୍ଦେଶ୍ୟରେ ପୁରୀଠାରେ ବାଲୁକା ଶିଳ୍ପୀ ମାନସ ସାହୁଙ୍କ ତତ୍ତ୍ୱାବଧାନରେ ଏକ ବାଲୁକା କଳା ପ୍ରସ୍ତୁତ କରିଥିଲେ। ବିଜୟଙ୍କ ନାଁରେ ପଟିଆ ଛକରୁ ଇନ୍ଫୋସିଟି ରାସ୍ତାର ନାମକରଣ କରିବାକୁ ରାଜ୍ୟପାଳଙ୍କ ଦ୍ୱାରା ପ୍ରସ୍ତାବକୁ କାର୍ଯ୍ୟକାରୀ କରାଯାଉ ବୋଲି ଛାତ୍ରୀଛାତ୍ରମାନେ ରାଜ୍ୟ ସରକାରଙ୍କ ପାଖରେ ଦାବି କରିଛନ୍ତି।