ଭୁବନେଶ୍ୱର,୧୧ା୧୦(ବ୍ୟୁରୋ):ଖଣିଗୁଡ଼ିକ ନିଲାମ ପରେ ଉତ୍ତୋଳନ କରିବା ନେଇ ଅନେକ ସମୟ ଗଡ଼ିଯାଉଛି। ତେଣୁ ପ୍ରସ୍ତାବିତ ଖଣିଗୁଡ଼ିକର ବାସ୍ତବିକ ସ୍ଥିତି କ’ଣ ସେ ସମ୍ପର୍କରେ ଏକ ସାର୍ଟିଫିକେଟ ଦେବାକୁ ଖଣି ମନ୍ତ୍ରଣାଳୟ ପକ୍ଷରୁ ପୂର୍ବରୁ ରାଜ୍ୟଗୁଡ଼ିକୁ ନିର୍ଦ୍ଦେଶ ରହିଛି। ହେଲେ ଏହି ସାର୍ଟିଫିକେଟ ମିଳିବାରେ ଡେରି ହେଉଛି ଏବଂ ଖଣିଜ ଉତ୍ତୋଳନରେ ମଧ୍ୟ ବିଳମ୍ବ ଘଟୁଛି। ଏହାକୁ ଦୃଷ୍ଟିରେ ରଖି କେନ୍ଦ୍ର ସରକାର ଖଣିର ସ୍ଥିତି ସମ୍ପର୍କରେ ସାର୍ଟିଫିକେଟ ଦେବାକୁ ୨ ମାସ ଅବଧି ଧାର୍ଯ୍ୟ କରିଛନ୍ତି। ଯଦି ଏହି ସମୟ ମଧ୍ୟରେ ରାଜ୍ୟ ସରକାର ଷ୍ଟାଟସ୍ ସାର୍ଟିଫିକେଟ ଦେବାରେ ବିଫଳ ହୁଅନ୍ତି, ତେବେ ପ୍ରକଳ୍ପ ପ୍ରସ୍ତାବ ନ୍ୟାଶନାଲ ମିନେରାଲ ଏକ୍ସପ୍ଲୋରେଶନ ଟ୍ରଷ୍ଟ (ଏନ୍ଏମ୍ଇଟି) ସେକ୍ରେଟାରିଏଟ୍ରେ ଥିବା ଟେକ୍ନିକାଲ ଆଣ୍ଡ୍ କଷ୍ଟ କମିଟି(ଟିସିସି)ରେ ବୈଷୟିକ ଓ ଆର୍ଥିକ ମୂଲ୍ୟାଙ୍କନ ପାଇଁ ଉପସ୍ଥାପନ କରାଯିବ। ତେବେ ପ୍ରସ୍ତାବିତ ପ୍ରକଳ୍ପର ଅନୁମୋଦନ ପୂର୍ବରୁ ରାଜ୍ୟ ସରକାରଙ୍କ ଖଣି ବିଭାଗକୁ ଟିସିସି ବୈଠକରେ ଯୋଗଦେବାକୁ ଆମନ୍ତ୍ରଣ କରାଯିବ। ସେଠାରେ ବୈଷୟିକ ମୂଲ୍ୟାୟନ ସମୟରେ ରାଜ୍ୟ ସରକାରଙ୍କ ଖଣି ବିଭାଗ କିମ୍ବା ସଂସ୍ଥା ପ୍ରସ୍ତାବିତ ପ୍ରକଳ୍ପ ଅଞ୍ଚଳର ସ୍ଥିତି ସମ୍ପର୍କରେ ଜଣାଇପାରିବେ। ବୈଷୟିକ-ଆର୍ଥିକ ସୁବିଧାକୁ ଦେଖି ଖଣିଜ ଉତ୍ତୋଳନ ପାଇଁ ପ୍ରସ୍ତାବକୁ ଅନୁମୋଦନ ଦିଆଯିବ। ଉତ୍ତୋଳନ ପୂର୍ବରୁ ମିନେରାଲ ଏକ୍ସପ୍ଲୋରେଶନ କର୍ପୋରେଶନ ଲିମିଟେଡ୍ କିମ୍ବା ରାଜ୍ୟ ସରକାରଙ୍କ ଖଣି ବିଭାଗ/ନିର୍ଦ୍ଦେଶାଳୟ ଅନୁମୋଦନ ଦିଆଯାଇଥିବା ଖଣି ଅଞ୍ଚଳକୁ କୌଣସି ଲିଜ୍ ଦିଆଯାଇନାହିଁ ଏବଂ କେନ୍ଦ୍ର, ରାଜ୍ୟ କିମ୍ବା କୌଣସି ଘରୋଇ ସଂସ୍ଥା ଦ୍ୱାରା ଉତ୍ତୋଳନ କରାଯାଉଥିବା ନିଶ୍ଚିତ କରିବେ। ଦେଶର ଆର୍ଥିକ ବିକାଶ ତଥା ନିଯୁକ୍ତି ସୁଯୋଗ ସୃଷ୍ଟି ଲକ୍ଷ୍ୟରେ ଖଣି ମନ୍ତ୍ରଣାଳୟ ପକ୍ଷରୁ ଏଭଳି ପଦକ୍ଷେପ ନିଆଯାଇଥିବା କୁହାଯାଇଛି। ଦେଶରେ ଖଣିଜ ଉତ୍ତୋଳନକୁ ତ୍ୱରାନ୍ବିତ କରିବାକୁ କେନ୍ଦ୍ର ସରକାର ନ୍ୟାଶନାଲ ମିନେରାଲ ଏକ୍ସପ୍ଲୋରେଶନ ଟ୍ରଷ୍ଟ (ଏନ୍ଏମ୍ଇଟି) ଗଠନ କରିଛନ୍ତି। ଦେଶରେ ବିଭିନ୍ନ ଖଣିଜ ଉତ୍ତୋଳନ ପ୍ରକଳ୍ପକୁ ତ୍ୱରାନ୍ବିତ କରିବାକୁ ନୋଟିଫାଏଡ୍ ଏକ୍ସପ୍ଲୋରେଶନ ଏଜେନ୍ସିଗୁଡିକୁ ଏନ୍ଏମ୍ଇଟି ପାଣ୍ଠି ଯୋଗାଇ ଦେଇଥାଏ।