ସୁନାବେଡ଼ା/ସେମେଳିଗୁଡ଼ା,୨୨।୪: (ସ୍ବ.ପ୍ର.) ଆର୍ଟିଆଇ ମାଧ୍ୟମରେ ଯେକୌଣସି ବ୍ୟକ୍ତି ତଥ୍ୟ ମାଗିପାରିବେ। ସେ ଚାହୁଁଥିବା ବିଭାଗର ତଥ୍ୟ ସୂଚନା ଅଧିକାର ଆଇନ ଅନୁସାରେ ସୂଚନା ଦେବାକୁ ସୂଚନା ଅଧିକାରୀ ବାଧ୍ୟ। ଏପରି ନିୟମ ସୂଚନା ଅଧିକାର ଆଇନରେ ରହିଥିଲେ ମଧ୍ୟ ଏହି ନିୟମକୁ କେତେକ କ୍ଷେତ୍ରରେ ଅଧିକାରୀମାନେ ଉଲ୍ଲଂଘନ କରୁଥିବା ଅଭିଯୋଗ ହେଉଛି। ଏପରି ଏକ ଘଟଣା କୋରାପୁଟ ଜିଲା ସେମିଳିଗୁଡା ଅଞ୍ଚଳରେ ଦେଖିବାକୁ ମିଳିଛି। ଖବରରୁ ଜଣାପଡିଛି, ସେମିଳିଗୁଡ଼ା ଅଞ୍ଚଳର ସତ୍ୟଜିତ୍ ସାମଲ ଗତ ୩୦ା୧୨ା ୨୦୨୨ ଓ ୨ା୧ା୨୦୨୩ରେ କୋରାପୁଟ ପୂର୍ତ୍ତ ବିଭାଗରୁ କିଛି ତଥ୍ୟ ଲାଗି ଦୁଇ ଦୁଇ ଥର ଆବେଦନ କରିଥିଲେ। ମାତ୍ର ଏପର୍ଯ୍ୟନ୍ତ ସାମଲ ତଥ୍ୟ ତ ଦୂରର କଥା ତାଙ୍କ ଆବେଦନର ଉତ୍ତର ମଧ୍ୟ ପାଇ ପାରିନାହାନ୍ତି। ଏ ନେଇ ସେ କୋରାପୁଟ ଅତିରିକ୍ତ ଜିଲାପାଳ ରାଜେନ୍ଦ୍ର ମାଝିଙ୍କୁ ଜଣାଇଛନ୍ତି। ତାଙ୍କ ଅଭିଯୋଗ ଅନୁଯାୟୀ ବିଭାଗୀୟ ଅଧିକାରୀଙ୍କୁ ଆର୍ଟିଆଇ ଆଧାରରେ ତଥ୍ୟ ମାଗି ସେ ନିରାଶ ହୋଇଛନ୍ତି। ତାଙ୍କୁ ତଥ୍ୟ ନ ମିଳିଲେ ସେ ଆଗାମୀ ଦିନରେ ଜିଲାପାଳଙ୍କ ଅଭିଯୋଗ ଶୁଣାଣି ଶିବିରରେ ଅଭିଯୋଗ ମଧ୍ୟ କରିବେ। ଆବଶ୍ୟକ ହେଲେ ଏ ସମ୍ପର୍କରେ ସେ ସଚିବଙ୍କ ଦୃଷ୍ଟି ଆକର୍ଷଣ କରିବେ ବୋଲି ସାମଲ କହିଛନ୍ତି। ଅନ୍ୟ ପକ୍ଷରେ ଅତିରିକ୍ତ ଜିଲାପାଳ ମାଝି ସତ୍ୟଜିତ୍ଙ୍କ ଆବେଦନ ଗ୍ରହଣ ନ କରି ଏହି ଅଭିଯୋଗ ସମ୍ପୃକ୍ତ ବିଭାଗୀୟ ଉପରିସ୍ଥ ଅଧିକାରୀ କିମ୍ବା ସୂଚନା ବିଭାଗୀୟ ସଚିବଙ୍କୁ ଜଣାଇବାକୁ ପରାମର୍ଶ ଦେଇଛନ୍ତି।