ନୂଆଦିଲ୍ଲୀ,୨୪।୮ ନୂଆ ଆୟକର ଇ-ଫାଇଲିଂ ପୋର୍ଟାଲରେ ବିଭିନ୍ନ ସମସ୍ୟା ବର୍ତ୍ତମାନ ସୁଦ୍ଧା ଜାରି ରହିଛି। ଟିକସଦାତା ଏ ନେଇ ବାରମ୍ବାର ସରକାରଙ୍କ ନିବେଦନ କରିବା ପରେ ସରକାର ଏ ଦିଗରେ ଯତ୍ନବାନ ହୋଇଛନ୍ତି। ରବିବାର ଇନ୍ଫୋସିସ ସିଇଓ ସଲିଲ ପାରେଖଙ୍କୁ ସରକାର ସମନ ଜାରି କରିଥିଲେ। ତେବେ ଆସନ୍ତା ମାସ ୧୫ ସୁଦ୍ଧା ଏ ସଂକ୍ରାନ୍ତ ସବୁ କାମ ଶେଷକରି ଲୋକଙ୍କୁ ଆଶ୍ୱସ୍ତି ପ୍ରଦାନ କରିବାକୁ ଅର୍ଥମନ୍ତ୍ରୀ ନିର୍ମଳା ସୀତାରାମନ ଇନ୍ଫୋସିସ୍ କମ୍ପାନୀକୁ ନିର୍ଦ୍ଦେଶ ଦେଇଥିବା ଜଣାପଡିଛି। ଆୟକର ରିଟର୍ନ ଫାଇଲିଂ ନେଇ ଧାର୍ଯ୍ୟ ସମୟ ସୀମା ପୂର୍ବରୁ ଏହି କାର୍ଯ୍ୟ କରିବାକୁ କୁହାଯାଇଛି।
ବିଭିନ୍ନ ସମୟରେ ହଇରାଣ ହେଉଥିବାରୁ ଏ ନେଇ ସୀତାରାମନ କମ୍ପାନୀକୁ କୈଫିୟତ ମାଗିଛନ୍ତି। ନୂଆ ଆଇଟି ରିଟର୍ନ ପୋର୍ଟାଲରେ ସମସ୍ୟା ଲାଗି ରହିବାକୁ ଆୟକର ରିଟର୍ନ ଫାଇଲ କରୁଥିବା ଲୋକମାନେ ପ୍ରଥମେ ସୋସିଆଲ ମିଡିଆରେ ନିଜର ଅସନ୍ତୋଷ ଜାହିର କରିଥିଲେ। ଏହା ପରେ ସରକାର ରିଟର୍ନ ଫାଇଲର ଧାର୍ଯ୍ୟ ଅବଧିକୁ ସେପ୍ଟେମ୍ବର ୩୦ ଯାଏ ବଢ଼ାଇଛନ୍ତି। ଏହି ସମସ୍ୟାକୁ ନେଇ ସୀତାରାମନ କ୍ଷୋଭ ପ୍ରକାଶ କରିଛନ୍ତି। ପ୍ରାୟ ଅଢେଇ ମାସ ହେବ ଏହି ସମସ୍ୟା ଲାଗି ରହିଥିବା ଏହାର ସ୍ଥାୟୀ ସମାଧାନ ହୋଇପାରିନାହିଁ ବୋଲି କେନ୍ଦ୍ରୀୟ ପ୍ରତ୍ୟକ୍ଷ ଟିକସ ବୋର୍ଡ(ସିବିଡିଟି) ପକ୍ଷରୁ ସୂଚନା ରହିଛି।
ମୁତାବକ, ସନ୍ତୋଷଜନକ ସେବା ଯୋଗାଣ କରିବାରେ ଇନ୍ଫୋସିସ ସକ୍ଷମ ହୋଇନାହିଁ। ଏଥିଲାଗି ଅଧିକ ସମ୍ବଳ ଏବଂ ଚେଷ୍ଟାର ଆବଶ୍ୟକତା ରହିଛି ବୋଲି ସରକାର ଉପଲବ୍ଧି କରିଛନ୍ତି। ବିଭିନ୍ନ ସମସ୍ୟା ନେଇ ଇନ୍ଫୋସିସ୍ ସିଇଓଙ୍କୁ ଅବଗତ କରାଯାଇଛି। ପୋର୍ଟାଲ ଠିକ୍ ଭାବେ କାର୍ଯ୍ୟ କରୁ ନ ଥିବା ବେଳେ ରିଟର୍ନ ଫାଇଲିଂରେ ବିଳମ୍ବ ହେଉଥିବା ଜଣାପଡିଛି।