ଭଦ୍ରକ ଅଫିସ, ୪।୮: ଭଦ୍ରକ ଜିଲା ତିହିଡି ଥାନା ଅନ୍ତର୍ଗତ ବାଉଁଶବାଗ ଗ୍ରାମରେ ଏକ ଅମାନବୀୟ କାଣ୍ଡ ଘଟିଛି। ବିବାହିତାଙ୍କ ସହ ସମ୍ପର୍କ ରଖିବାକୁ ନେଇ ୧୭ରୁ ଊର୍ଦ୍ଧ୍ୱ ବ୍ୟକ୍ତି ଜଣେ ଯୁବକଙ୍କୁ ଅଧା ଲଣ୍ଡା କରାଇବା ସହ ଜୋତାମାଳ ପିନ୍ଧାଇ, ମାଡ଼ମାରି ଗାଁ ବୁଲାଇଥିଲେ। ଏପରିକି ପାଣି ପିଇବାକୁ ଯୁବକ ମାଗିବାରୁ ତାଙ୍କୁ ପରିସ୍ରା ଦିଆଯାଇଥିଲା। ଏ ନେଇ ଯୁବକଙ୍କ ସ୍ତ୍ରୀ ମଙ୍ଗଳବାର ସକାଳେ ତିହିଡି ଥାନାରେ ଅଭିଯୋଗ କରିଛନ୍ତି। ଉକ୍ତ ଯୁବକଜଣଙ୍କ ହେଲେ ଶୁକଦେବ ମହାଳିକ।
ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ଶୁକଦେବଙ୍କୁ ଲୋକଙ୍କ କବଳରୁ ଉଦ୍ଧାରକରି ଥାନାକୁ ନେଇଛନ୍ତି। ଅପରପକ୍ଷରେ ସମ୍ପୃକ୍ତ ମହିଳାଙ୍କ ସ୍ବାମୀ ତାଙ୍କ ସ୍ତ୍ରୀଙ୍କ ସହ ଅନୈତିକ ସମ୍ପର୍କ ରଖିଥିବା ନେଇ ଶୁକଦେବଙ୍କ ବିରୋଧରେ ଥାନାରେ ମାମଲା ଦାୟର କରିଛନ୍ତି। ପରେ ପୋଲିସ ଶୁକଦେବଙ୍କୁ ଗିରଫକରି କୋର୍ଟ ଚାଲାଣ କରିଛି। ଶୁକଦେବଙ୍କ ସ୍ତ୍ରୀଙ୍କ ଅଭିଯୋଗ ଆଧାରରେ ୧୭ ଜଣଙ୍କ ବିରୋଧରେ ମାମଲା ରୁଜୁ ହୋଇଛି। ଏହି ମାମଲାରେ ମାନବାଧିକାର କ୍ଷୁର୍ଣ୍ଣ ହୋଇଥିବାରୁ ଜିଲାପାଳ ଯୁଗ୍ମ ଅଧିକାରୀଙ୍କ ଦ୍ୱାରା ତଦନ୍ତ ନିର୍ଦ୍ଦେଶ ଦେଇଛନ୍ତି। ତିହିଡି ଥାନାଧିକାରୀ ଓ ତହସିଲଦାର ଘଟଣାର ତଦନ୍ତକରି ରିପୋର୍ଟ ପ୍ରଦାନ କରିବା ପାଇଁ ନିର୍ଦ୍ଦେଶ ଦେଇଛନ୍ତି। ତିହିଡି ପୋଲିସ ଏହି ଘଟଣାର ମୁଖ୍ୟ କୁହାଯାଉଥିବା ଶତ୍ରୁଘନ ମହାଳିକଙ୍କୁ ଗିରଫ କରିସାରିଛି ଓ କୋର୍ଟଚାଲାଣ କରାଯିବ ବୋଲି ଥାନାଧିକାରୀ ରମେଶ ଚନ୍ଦ୍ର ସିଂ ସୂଚନା ଦେଇଛନ୍ତି। ଏ ନେଇ ଥାନାରେ ଦୁଇଟି ମାମଲା (କେସ୍ ନଂ.୨୮୪/୨୦ ଓ ୨୮୬/୨୦) ରୁଜୁ ହୋଇଛି।
