ସୁନ୍ଦରଗଡ଼,୯ା୧୦(ଜୟ ନାରାୟଣ ମେଣ୍ଡୁଳି):ସୁନ୍ଦରଗଡ଼ ସହର ଉପକଣ୍ଠ ଇବ୍ନଦୀ ପୋଲ ଉପରୁ ଶୁକ୍ରବାର ଉଦ୍ଧାର ହୋଇଥିବା ୨ ବିବସ୍ତ୍ର ମହିଳାଙ୍କ ପରିଚୟ ମିଳିଥିବା ବେଳେ ତାଙ୍କ ସହିତ ଘଟିଥିବା ଅମାନୁଷିକ ନିର୍ଯାତନା ଘଟଣା ପଦାକୁ ଆସିଛି। ଓଡ଼ିଶା ସୀମାନ୍ତବର୍ତ୍ତୀ ଅଞ୍ଚଳ ଖଇରମୁଣ୍ଡାରେ ଉଭୟଙ୍କ ଘର। ସେମାନେ ହେଉଛନ୍ତି ମା’ ଓ ଝିଅ। ଦୀର୍ଘ ବର୍ଷ ଧରି ୪୭ ବର୍ଷୀୟ ମହିଳାଙ୍କୁ ଦିଅର ଯୌନ ନିର୍ଯାତନା ଦେଇଆସୁଥିଲେ। ଏପରିକି ତାଙ୍କ ୩ ଝିଅ ମଧ୍ୟ ଯୌନ ନିର୍ଯାତନାର ଶିକାର ହୋଇଛନ୍ତି। ୩ଝିଅଙ୍କ ମଧ୍ୟରୁ ୨ ଜଣ ଘର ଛାଡ଼ି ଚାଲିଯାଇଥିଲେ। ମା’ଙ୍କ ସହ ଘରୁ ଚାଲି ଆସିଥିବା ୨୩ବର୍ଷୀୟା ଝିଅ ମୁମ୍ବାଇରେ କାମ କରି ଗତ କିଛିଦିନ ହେବ ଘରକୁ ଆସିଥିବା ବେଳେ ସେ ପୁଣି ଯୌନ ନିର୍ଯାତନାର ଶିକାର ହୋଇଥିବା କାଉନ୍ସେଲିଂ ବେଳେ ଜଣାପଡ଼ିଛି। ସେମାନେ ନିଜକୁ ବଞ୍ଚାଇବା ପାଇଁ ଘର ଛାଡ଼ି ଚାଲି ଆସିଥିବା କହିଛନ୍ତି। ମାନସିକ ସ୍ତରରେ ମା’ ଝିଅ ଅତ୍ୟନ୍ତ ଭୟଭୀତ ଥିବା ବେଳେ ଝିଅଟି ବର୍ତ୍ତମାନ ପର୍ଯ୍ୟନ୍ତ ପାଟି ଖୋଲି ନ ଥିବା ଆସ୍ଥା ଗୃହ ସମ୍ପାଦିକା ସ୍ନେହଲତା ପଟେଲ ସୂଚନା ଦେଇଛନ୍ତି। ରାସ୍ତାରେ ମଧ୍ୟ ସେମାନେ ବଳାତ୍କାରର ଶିକାର ହୋଇଥିବା ଆଶଙ୍କା କରାଯାଉଛି। ଓଡ଼ିଶା ସୀମାନ୍ତବର୍ତ୍ତୀ ଝାଡ଼ଖଣ୍ଡ ରାଜ୍ୟର ଏହି ୨ ମହିଳା କିଭଳି ସୁନ୍ଦରଗଡ଼କୁ ଆସିଲେ ସେ ନେଇ ଅଧିକ ପଚରାଉଚରା ଚାଲିଛି। ସମ୍ପାଦିକା ଏହି ସମ୍ପର୍କରେ ଏସ୍ପି ପ୍ରତ୍ୟୁଷ ଦିବାକର ଏବଂ ଟାଉନଥାନାକୁ ଅବଗତ କରିଛନ୍ତି। ରବିବାର ସ୍ବତନ୍ତ୍ର ଡାକ୍ତରୀ ଦଳ, ମନସ୍ତତ୍ତ୍ୱବିତ୍ ଓ ପୋଲିସ ଏହି ୨ ମହିଳାଙ୍କୁ ପଚରାଉଚରା କରିଥିଲେ। ସେମାନଙ୍କ ସ୍ବାସ୍ଥ୍ୟାବସ୍ଥା ଠିକ୍ ଥିବା ଜଣାପଡ଼ିଛି। ଏଭଳି ଏକ ସମ୍ବେଦନଶୀଳ ଘଟଣାକୁ ଗମ୍ଭୀରତା ସହ ନେଇ ପୋଲିସ ପ୍ରଶାସନ ତଦନ୍ତ ପ୍ରକ୍ରିୟା ଆରମ୍ଭ କରିଛି। ସ୍ବାଭାବିକ ସ୍ଥିତିକୁ ଆସିଲା ପରେ ସେମାନଙ୍କ ପ୍ରକୃତ କାରଣ ଜଣାପଡ଼ିବ ବୋଲି ସ୍ନେହଲତା କହିଛନ୍ତି। ଚିହ୍ନଟ ପାଇଁ ସେମାନଙ୍କ ଫଟୋ ଜିଲାର ବିଭିନ୍ନ ଥାନା ଓ ପଡ଼ୋଶୀ ଝାଡ଼ଖଣ୍ଡ ରାଜ୍ୟର ଥାନାକୁ ପଠାଯାଇଛି। ଏନେଇ ଏସ୍ପି ଦିବାକର ସୂଚନା ଦେଇଛନ୍ତି। ଏହି ମହିଳାଙ୍କ ପ୍ରତି ହୋଇଥିବା ଅମାନୁଷିକ କାର୍ଯ୍ୟକୁ ସବୁଠି ନିନ୍ଦା କରାଯିବା ସହ ଅଭିଯୁକ୍ତଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ପାଇଁ ଦାବି ହୋଇଛି। ସୂଚନା ଅନୁଯାୟୀ, ଶୁକ୍ରବାର ସୁନ୍ଦରଗଡ ଉପକଣ୍ଠ କଲେଜ ବାଇପାସ ଇବ ନଦୀ ପୋଲ ଉପରେ ୨ ବିବସ୍ତ୍ର ମହିଳା ଚାଲି ଚାଲି ଯାଉଥିଲେ। ଶହ ଶହ ଯାତ୍ରୀ ସେଇ ରାସ୍ତା ଦେଇ ଯାଉଥିଲେ ମଧ୍ୟ କେହି ଜଣେ ଏଭଳି ଲଜ୍ଜିତ ଦୃଶ୍ୟ ପାଇଁ ଦୟା ଦେଖାଇ ନ ଥିଲେ। ନିଜ ଘରୁ ଆଦିବାସୀ ମଞ୍ଚ ଘେରାଉ କାର୍ଯ୍ୟକ୍ରମକୁ ଯାଉଥିବା ବିଧାୟିକା କୁସୁମ ଟେଟେ ଏହି ୨ ମହିଳାଙ୍କୁ ଦେଖି ଗାଡ଼ି ଅଟକାଇ ଥିଲେ। ଆଦିବାସୀ ନେତାଙ୍କୁ ସମ୍ବର୍ଦ୍ଧିତ କରିବାକୁ ସାଙ୍ଗରେ ନେଉଥିବା ଗାମୁଛାରେ ୨ ମହିଳାଙ୍କୁ ଘୋଡ଼ାଇ ଦେଇଥିଲେ। ପରେ ସଦର ଥାନା ପୋଲିସ ସହାୟତାରେ ସେମାନଙ୍କୁ ଆସ୍ଥା ଗୃହକୁ ପଠାଇଥିଲେ।