ନୂଆଦିଲ୍ଲୀ,୨୬ ।୧୧: କେନ୍ଦ୍ରର ମୋଦି ସରକାରଙ୍କ ଦ୍ୱାରା ଆଗତ କୃଷି ନୀତିକୁ ନେଇ ବୁଧବାର ହରିୟାଣା ଓ ଦିଲ୍ଲୀ ସୀମାରେ କୃଷକମାନେ ବିରୋଧ ପ୍ରଦର୍ଶନ କରିଥିଲେ । ଏହି ସମୟରେ ତାଙ୍କୁ ଅଟକାଇବାକୁ ଯାଇ ପୋଲିସ ପକ୍ଷରୁ ଆନ୍ଦୋଳନକାରୀଙ୍କ ଉପରେ ପାଣିମାଡ କରାଯାଇଥିଲା । ଏବେ ଏହାକୁ ନେଇ ଦିଲ୍ଲୀ ମୁଖ୍ୟମନ୍ତ୍ରୀ ତାଙ୍କ ପ୍ରତିକ୍ରିୟାରେ କହିଛନ୍ତି ଶାନ୍ତିପୂର୍ଣ୍ଣ ଭାବେ ପ୍ରଦର୍ଶନ କରୁଥିବା କୃଷକଙ୍କୁ ଅଟକାଇବା ଉଚିତ ନ ଥିଲା । ଗୁରୁବାର କେଜରିୱାଲ ଟୁଇଟ୍ କରି କହିଛନ୍ତି କେନ୍ଦ୍ର ସରକାରଙ୍କ ଦ୍ୱାରା ଆଗତ ୩ଟି ଯାକ କୃଷି ବିଲ୍ କୃଷକ ବିରୋଧି । ଏହାକୁ ପ୍ରତ୍ୟାହାର କରିବା ପରିବର୍ତ୍ତେ କୃଷକ ଶାନ୍ତିପୂର୍ଣ୍ଣ ବିରୋଧ କରୁଥିବା ସମୟରେ ସେମାନଙ୍କୁ ଅଟକାଯାଉଛି । ସେମାନଙ୍କ ଉପରେ ପାଣିମାଡ କରାଯାଉଛି । ଶୀତ ସମୟରେ ଏଭଳି ବ୍ୟବହାର ଅତ୍ୟନ୍ତ ଆମାନବୀୟ ବୋଲି କେଜରିୱାଲ କହିଛନ୍ତି । ଅନ୍ୟପଟେ ଗୁରୁବାର କୃଷି ବିଲକୁ ବିରୋଧ କରି ଦିଲ୍ଲୀ ଯିବା ପାଇଁ ଅମ୍ବାଲା(ହରିୟାଣା) ବର୍ଡରରେ କୃଷକଙ୍କ ଉପରେ ଲୁହବୁହା ଗ୍ୟାସ ପ୍ରୟୋଗ କରଯାଇଥିବା ସୂଚନା ମିଳିଛି ।