ନୂଆଦିଲ୍ଲୀ,୨।୩: ଅଲରାଉଣ୍ଡର ଦୀପକ ଚହର ଆହତ ସମସ୍ୟା କାରଣରୁ ଚଳିତ ମାସ ଶେଷ ସପ୍ତାହରୁ ଆରମ୍ଭ ହେଉଥିବା ଆଇପିଏଲ ସିଜନର ପ୍ରାୟତଃ ମ୍ୟାଚ୍ରେ ଖେଳିବେ ନାହିଁ। ଏ ନେଇ ଇଏସ୍ପିଏନ୍କ୍ରିକ୍ଇନ୍ଫୋରେ ଏକ ରିପୋର୍ଟ ପ୍ରକାଶ ପାଇଛି। ଏହା ଡିଫେଣ୍ଡିଂ ଚାମ୍ପିୟନ ଚେନ୍ନାଇ ସୁପର କିଙ୍ଗ୍ସ (ସିଏସ୍କେ) ପାଇଁ ବଡ଼ ଝଟ୍କା ସଦୃଶ। ଓ୍ବେଷ୍ଟଇଣ୍ଡିଜ ବିପକ୍ଷ ଅନ୍ତିମ ତଥା ତୃତୀୟ ଟି୨୦ ମ୍ୟାଚ୍ରେ ଦୀପକଙ୍କ ଡାହାଣ ଜଙ୍ଘରେ ଆଘାତ ଲାଗିଥିଲା। ଯାହା ଫଳରେ ଶ୍ରୀଲଙ୍କା ବିପକ୍ଷ ଟି୨୦ ସିରିଜ୍ରୁ ସେ ବାଦ୍ ପଡ଼ିଥିଲେ।
“ଗତ ମାସରେ ଓ୍ବେଷ୍ଟଇଣ୍ଡିଜ ବିପକ୍ଷ ଅନ୍ତିମ ଟି୨୦ ମ୍ୟାଚ୍ ବେଳେ ଆହତ ହୋଇଥିବା ଦୀପକଙ୍କୁ ଫିଟ୍ ହେବା ପାଇଁ ସମ୍ଭବତଃ କିଛି ସପ୍ତାହ ଲାଗିବ। ଫଳରେ ସେ ମାର୍ଚ୍ଚ ୨୬ରୁ ମେ ୨୯ ତାରିଖ ପର୍ଯ୍ୟନ୍ତ ହେବାକୁ ଥିବା ଆଇପିଏଲରେ ନ ଖେଳିପାରନ୍ତି। ମିଳିଥିବା ସୂଚନା ମୁତାବକ, ଚେନ୍ନାଇ ସୁପର କିଙ୍ଗ୍ସ ଏବେ ଜାତୀୟ କ୍ରିକେଟ୍ ଏକାଡେମୀ (ସିସିଆଇ)ର ଫାଇନାଲ ଆସେସମେଣ୍ଟ ରିପୋର୍ଟକୁ ଅପେକ୍ଷା କରିଛି। ସେଠାରେ ଚହରଙ୍କ ରେହାବିଲିଟେଶନ ଚାଲିଛି” ବୋଲି ରିପୋର୍ଟରେ ଉଲ୍ଲେଖ ରହିଛି। ଉଲ୍ଲେଖଯୋଗ୍ୟ, ସିଏସ୍କେ ଦୀପକ ଚହରଙ୍କୁ ମେଗା ଅକଶନରେ ୧୪ କୋଟି ଟଙ୍କାରେ କିଣିଛି। ଏଥିପୂର୍ବରୁ ସିଏସ୍କେ କଦାପି କୌଣସି ଖେଳାଳିଙ୍କୁ ଏତେ ଟଙ୍କାରେ କିଣି ନ ଥିଲା।