ଲଣ୍ଡନ,୫।୮: ଚଳିତ ବର୍ଷ କ୍ରିକେଟ ପଡ଼ିଆକୁ ଓହ୍ଲାଇପାରିବେ ନାହିଁ ଇଂଲଣ୍ଡର ଷ୍ଟାର ପେସର ଜୋଫ୍ରା ଆର୍ଚ୍ଚର। ଡାହାଣ କହୁଣି ଜନିତ ସମସ୍ୟାରୁ ତାଙ୍କୁ ମୁକୁଳିବାକୁ ସମୟ ଦରକାର। ଏ ନେଇ ଗୁରୁବାର ସୂଚନା ଦେଇଛି ଇଂଲଣ୍ଡ ଓ ଓ୍ବେଲ୍ସ କ୍ରିକେଟ ବୋର୍ଡ।
ସମାନ ସମସ୍ୟା କାରଣରୁ ସେ ୨୦୨୦ ଦକ୍ଷିଣ ଆଫ୍ରିକା ବିପକ୍ଷ ସିରିଜ୍ରେ ଖେଳିପାରି ନ ଥିଲେ। ଭାରତ ଗସ୍ତ ସହ ଆଇପିଏଲ୍ରୁ ମଧ୍ୟ ବାଦ୍ ପଡ଼ିଥିଲେ ଆର୍ଚ୍ଚର। ଆହତ ସମସ୍ୟାରୁ ଫେରିଲା ପରେ ସସେକ୍ସ ପାଇଁ ଗୋଟିଏ କାଉଣ୍ଟି ମ୍ୟାଚ୍ ଖେଳିଥିଲେ। କିନ୍ତୁ କହୁଣିରେ ଯନ୍ତ୍ରଣା ଅନୁଭବ କରିବାରୁ ଦ୍ୱିତୀୟ ଇନିଂସରେ ବୋଲିଂ କରି ନ ଥିଲେ। ଏଥି ଯୋଗୁ ନ୍ୟୁଜିଲାଣ୍ଡ ବିପକ୍ଷ ଘରୋଇ ସିରିଜ୍ରେ ମଧ୍ୟ ଖେଳିପାରି ନ ଥିଲେ। ତାଙ୍କ କହୁଣିର ସ୍କାନ କରାଯାଇଥିଲା। ରିପୋର୍ଟ ଆସିବା ପରେ ଚଳିତ ବର୍ଷ ସେ କ୍ରିକେଟ ଖେଳିପାରିବେ ନାହିଁ ବୋଲି ସ୍ପଷ୍ଟ ହୋଇଛି। ଏଣୁ ସେ ଭାରତ ବିପକ୍ଷ ଟେଷ୍ଟ ସିରିଜ୍, ଟି୨୦ ବିଶ୍ୱକପ୍ ଓ ଅଷ୍ଟ୍ରେଲିଆରେ ଆଶେସ ସିରିଜ୍ରୁ ବାଦ୍ ପଡ଼ିଛନ୍ତି।