ଦୁବାଇ, ୨୪।୯(ପି.ଟି.)- ଅଷ୍ଟ୍ରେଲିଆନ ଅଲରାଉଣ୍ଡର ମିଚେଲ ମାର୍ଶ ଗୋଟିଏ ମ୍ୟାଚ ଖେଳି ଚଳିତ ଇଣ୍ଡିଆନ ପ୍ରିମିୟର ଲିଗ୍(ଆଇପିଏଲ)ରୁ ଓହରି ଯାଇଛନ୍ତି। ସନ୍ରାଇଜର୍ସ ପକ୍ଷରୁ ପ୍ରତିନିଧିତ୍ୱ କରିଥିବା ମିଚେଲ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ବିପକ୍ଷ ପ୍ରଥମ ମ୍ୟାଚ ଅବସରରେ ଆହତ ହୋଇଥିଲେ। ତାଙ୍କ ଗୋଇଠି ମକଚି ହୋଇ ଯାଇଥିଲା। ତାଙ୍କ ସ୍ଥାନରେ ଓ୍ବେଷ୍ଟଇଣ୍ଡିଜ ଅଲରାଉଣ୍ଡର ଜାସନ ହୋଲ୍ଡରଙ୍କୁ ବଦଳ ଖେଳାଳିଭାବେ ହାଇଦ୍ରାବାଦ ଦଳରେ ସାମିଲ କରାଯାଇଛି। ସେ ଖୁବ୍ଶୀଘ୍ର ୟୁଏଇରେ ଦଳସହ ଯୋଗଦେବେ। ”ମିଚେଲ ଆହତ ସମସ୍ୟା ଯୋଗୁ ଓହରି ଯାଇଛନ୍ତି। ଆମେ ତାଙ୍କର ଶୀଘ୍ର ଆରୋଗ୍ୟ କାମନା କରୁଛୁ। ଜାସନ ହୋଲ୍ଡର ବଦଳ ଖେଳାଳିଭାବେ ଦଳରେ ଯୋଗଦେବେ“ ବୋଲି ସନ୍ରାଇଜର୍ସର ଅଫିସିଆଲ ଟୁଇଟର ହ୍ୟାଣ୍ଡେଲରେ ପୋଷ୍ଟ କରାଯାଇଛି। ୨୮ ବର୍ଷୀୟ ମିଚେଲ ସୋମବାର ମ୍ୟାଚରେ ମାତ୍ର ୪ଟି ବଲ୍ ବୋଲିଂ କରି ପାରିଥିଲେ। ଦ୍ୱିତୀୟ ବଲ୍ ବୋଲିଂରେ ଆରୋନ ଫିଞ୍ଚ୍ଙ୍କ ଏକ ଡ୍ରାଇଭ୍କୁ ନିଜ ଫଲୋ ଥ୍ରୁରେ ରୋକାବାକୁ ଉଦ୍ୟମ କରୁଥିବାବେଳେ ତାଙ୍କ ଗୋଇଠି ମକଚି ହୋଇ ଯାଇଥିଲା। ଏହାପରେ ସେ ଆଉ ମାତ୍ର ୨ଟି ବଲ୍ ବୋଲି କରି ପଡ଼ିଆ ଛାଡ଼ିଥିଲେ। ଉତ୍ସାହ ଦେଖାଇ ଦଳର ବିପଦ ସମୟରେ ୧୦ ନମ୍ବର ସ୍ଥାନରେ ସେ ବ୍ୟାଟିଂ କରିବାକୁ ଆସିଥିଲେ ହେଁ ପ୍ରଥମ ବଲ୍ରେ ବଡ଼ ଶଟ୍ ଖେଳିବାକୁ ଯାଇ ଆଉଟ ହୋଇ ଯାଇଥିଲେ। ସେ ଛିଡ଼ା ହେବାକୁ ମଧ୍ୟ ସକ୍ଷମ ନ ଥିବା ପରିଲକ୍ଷିତ ହୋଇଥିଲା। ମିଚେଲ ଦ୍ୱିତୀୟ ଥରପାଇଁ ଆହତ କାରଣରୁ ଆଇପିଏଲ ମଝିରୁ ଓହରିଛନ୍ତି। ପୂର୍ବରୁ ୨୦୧୭ରେ କାନ୍ଧରେ ସମସ୍ୟା ଯୋଗୁ ତାଙ୍କୁ ଓହରିବାକୁ ପଡ଼ିଥିଲା। ୨୦୧୪-୧୫ ସିଜନରେ ସନ୍ରାଇଜର୍ସ ପକ୍ଷରୁ ଖେଳିଥିବା ମିଚେଲ ୨୦୧୬ରେ କୋଲକାତା ନାଇଟ ରାଇଡର୍ସ ପକ୍ଷରୁ ପ୍ରତିନିଧିତ୍ୱ କରିଥିଲେ। ନିକଟରେ ସେ କାରିବିୟନ ପ୍ରିମିୟର ଲିଗ୍ରେ ମଧ୍ୟ ଖେଳିଥିଲେ।
