ଭଣ୍ଡାରିପୋଖରୀ, ୨୨।୭ (ଡି.ଏନ.ଏ.)-ଭଦ୍ରକ ଜିଲା ଭଣ୍ଡାରିପୋଖରୀ ବ୍ଲକ ୩ ନଂ ମୁଖ୍ୟ କେନାଲର ପାର୍ବତୀ ସାଇଫନ ନିକଟରେ ପୁରୁଣା ପାଇପ୍ ଭାଙ୍ଗି ପାଣି ଲିକେଜ କରି ମାଟି ଧୋଇ ଯିବା ସହ ବିରାଟ ଘାଇ ହେବାର ଆଶଙ୍କା ଦେଖାଦେଇଛି। ସାଇଫନ ନିକଟରେ ବନ୍ଧ ରାସ୍ତାରେ ଏକ କଲଭର୍ଟ ଦୀର୍ଘଦିନ ଧରି ଭାଙ୍ଗି ଯାଇଥିବା ବେଳେ ମାଟି ଅତଡ଼ା ଧସୁଛି। ବର୍ଷା ହେବା ଯୋଗୁ ମୁଖ୍ୟ ରାସ୍ତାର ଅଧାରୁ ଅଧିକ ଧସିଲାଣି। ବର୍ତ୍ତମାନ କେନାଲରେ ଫୁଲ ପାଣିଥିବାରୁ ସେଠାରେ ଘଳିଆ ପଡିଥିବା ଦେଖାଯାଉଛି। ପାଣି ଚାଲୁଥିବାରୁ ଧୀରେ ଧୀରେ ମାଟି ଅତଡା ଖାଇ ଧସିବା ଆରମ୍ଭ ହେଲେ ଘାଇ ହେବା ସହ ଶହ ଶହ ହେକ୍ଟର ଚାଷ ଜମିଜଳମଗ୍ନ ହେବା ସହ ପର୍ବତୀ, ମନାଗଡ଼ିଆ, ଖଡ଼ିସିଙ୍ଗା, ଲଷ୍ମୀସାଗର ଗ୍ରାମରେ ପାଣି ପଶିବା ଆଶଙ୍କା ପ୍ରକାଶ ପାଇଛି। ଏ ସମ୍ପର୍କରେ ଆଖୁଆପଦା ଜଳ ସମ୍ପଦ ବିଭାଗ କନିଷ୍ଠ ଯନ୍ତ୍ରୀ ସୁଶାନ୍ତ ଦାସଙ୍କୁ ପଚାରିବାରୁ ଏଭଳି ଘଟଣା ମୋ ନଜରକୁ ଆସିଛି। ଦୁଇ ଦିନ ଭିତରେ ଏହାର ମରାମତି କାର୍ଯ୍ୟ ଶେଷ କରିବାକୁ ପଦକ୍ଷେପ ନିଆଯାଉଛି ବୋଲି ସେ ତାଙ୍କ ପ୍ରତିକ୍ରିୟାରେ କହିଛନ୍ତି।