କ୍ୱିଭ୍,୧୪।୩ : ୟୁକ୍ରେନ ଉପରେ ରୁଷିଆର ଆକ୍ରମଣ ଜାରି ରହିଛି। ଧୀରେ ଧୀରେ ରୁଷିଆ ଆକ୍ରମଣକୁ ବୃଦ୍ଧି କରୁଛି। ଗୋଟିଏ ପଟେ ୟୁକ୍ରେନ୍ର ନିରୀହ ଜନସାଧାରଣ ଥିବାବେଳେ ଅନ୍ୟ ପଟେ ଶକ୍ତଶାଳୀ ରାଷ୍ଟ୍ରପତି ଭ୍ଲାଡ଼ିମିର ପୁଟିନ୍ ରହିଛନ୍ତି। ୟୁକ୍ରେନରେ ଏପର୍ଯ୍ୟନ୍ତ ୫୯୬ ସାଧାରଣ ନାଗରିକ ନିହତ ହୋଇଥିବା ମିଳିତ ଜାତିସଂଘ ମାନବ ଅଧିକାର କାର୍ଯ୍ୟାଳୟ ପକ୍ଷରୁ ରିପୋର୍ଟ ଜାରି ହୋଇଛି। ସେହିପରି ୧,୦୬୭ ଜଣ ଆହତ ହୋଇଛନ୍ତି। ଗୁଳି ଓ କ୍ଷେପଣାସ୍ତ୍ର ଆକ୍ରମଣରେ ସାଧାରଣ ନାଗରିକଙ୍କ ମୃତ୍ୟୁ ଘଟିଥିବା ରିପୋର୍ଟରେ ଉଲ୍ଲେଖ କରାଯାଇଛି।
ଗଣମାଧ୍ୟମ ସୂଚନା ଅନୁସାରେ ବର୍ତ୍ତମାନ ପର୍ଯ୍ୟନ୍ତ ରୁଷିଆ ୟୁକ୍ରେନର ୭ ଟି ହସ୍ପିଟାଲକୁ ସମ୍ପୂର୍ଣ୍ଣ ରୂପେ ନଷ୍ଟ କରିଦେଇଛି। ଏହା ସହିତ ୧୦୪ ହସ୍ପିଟାଲ ରୁଷିଆର ରକେଟ ମାଡ଼ରେ ମଧ୍ୟ କ୍ଷତିଗ୍ରସ୍ତ ହୋଇଥିବା ୟୁକ୍ରେନ୍ ସ୍ବାସ୍ଥ୍ୟମନ୍ତ୍ରୀ ଭିକ୍ଟର ଲ୍ୟାଶକୋ କହିଛନ୍ତି। ପହଞ୍ଚାଇଛନ୍ତି।
ରୁଷିଆ ସୈନିକମାନେ ୬ ଜଣ ମେଡିକାଲ କର୍ମଚାରୀଙ୍କୁ ହତ୍ୟା କରିଥିବାବେଳେ ଯୁଦ୍ଧ ଆରମ୍ଭରୁ ଅନ୍ୟ ୧୨ ଜଣ ମେଡିକାଲ କର୍ମଚାରୀ ଗୁରୁତର ଆହତ ହୋଇଥିବା ସେ ସୂଚନା ଦେଇଛନ୍ତି। ରୁଷିଆ ୟୁକ୍ରେନର ପଶ୍ଚିମ ସୀମାରେ ଥିବା ଏକ ସାମରିକ ତାଲିମ କେନ୍ଦ୍ର ଉପରେ ଏୟାର ଷ୍ଟ୍ରାଇକ ଆରମ୍ଭ କରିଛି। ଏଥିରେ ୩୫ ଜଣଙ୍କର ମୃତ୍ୟୁ ଘଟିଛି ଏବଂ ୧୩୪ ଜଣ ଆହତ ହୋଇଛନ୍ତି।
ଏହି ଅଞ୍ଚଳ ନାଟୋ ସଦସ୍ୟ ପୋଲାଣ୍ଡ ସହିତ ସୀମାଠାରୁ ୨୫ କିଲୋମିଟର ଦୂରରେ ଥିବା କୁହାଯାଉଛି। ଏହି ବିଶାଳ ସାମରିକ ତାଲିମ କେନ୍ଦ୍ର ଉପରେ ୩୦ରୁ ଅଧିକ କ୍ଷେପଣାସ୍ତ୍ର ନିକ୍ଷେପ କରାଯାଇଥିଲା। ଏହି ନ୍ଦ୍ରେର ପ୍ରଶିକ୍ଷକମାନେ ଆମେରିକା ଏବଂ ଉତ୍ତର ଆଟଲାଣ୍ଟିକ ଚୁକ୍ତି ସଂଗଠନ (ନାଟୋ) ଦେଶରୁ ଆସିଛନ୍ତି। ୟୁକ୍ରେନକୁ ପାଶ୍ଚାତ୍ୟ ସାମରିକ ସହାୟତା ପାଇଁ ପୋଲାଣ୍ଡ ହେଉଛି ଗମନାଗମନ ମାର୍ଗ। ବିଦେଶୀ ଅସ୍ତ୍ରଶସ୍ତ୍ର ସାମଗ୍ରୀକୁ ଟାର୍ଗେଟ କରିବାକୁ ରୁଷିଆର ଧମକ ପରେ ଏହି ଆକ୍ରମଣ ହୋଇଥିଲା। ଲଭିଭ ଗଭର୍ଣ୍ଣର ମ୍ୟାକ୍ସିମ କୋଜିଟସ୍କି ଏ ସମ୍ପର୍କରେ ସୂଚନା ଦେଇଛନ୍ତି।