ଭୁବନେଶ୍ୱର, ୧୩।୮(ବ୍ୟୁରୋ): ସାରା ବିଶ୍ବରେ ଅଗଷ୍ଟ ୧୨କୁ ହାତୀ ଦିବସ ଭାବରେ ପାଳନ କରାଯାଉଛି। ହାତୀ ସଂରକ୍ଷଣ ଓ ହାତୀ-ମଣିଷ କିପରି ଭାବରେ ଶାନ୍ତିପୂର୍ଣ୍ଣ ସହାବସ୍ଥାନ କରିପାରିବେ, ସେହି ବାର୍ତ୍ତା ବହନ କରିଥାଏ ହାତୀ ଦିବସ। ହେଲେ ଓଡ଼ିଶାରେ ହାତୀ ମୃତ୍ୟୁରେ ଖୋଦ୍ ବନ ବିଭାଗର ଅଧିକାରୀ ଓ କର୍ମଚାରୀଙ୍କ ସମ୍ପୃକ୍ତି ରହୁଛି। ପୁଣି ଖାଲି ପୋଷ୍ଟର ବ୍ୟାନର ଓ ବୈଠକରେ ଅଯଥା ପଇସା ଖର୍ଚ୍ଚ କରି ରାଜ୍ୟ ବନ ବିଭାଗ ହାତୀ ଦିବସ ପାଳନ କରୁଥିବାରୁ ଏହାର ଅଭିନବ ପ୍ରତିବାଦ କରିଛି ଆନିମଲ ୱେଲଫେୟାର ଟ୍ରଷ୍ଟ ଏକାମ୍ର।
ଶୁକ୍ରବାର ସକାଳ ପ୍ରାୟ ୧୧ଟାରେ ଟ୍ରଷ୍ଟ ମୁଖ୍ୟ ପୁରବୀ ପାତ୍ର ନିଜର ଦୁଇ ସହଯୋଗୀଙ୍କ ସହ ଶହୀଦନଗରସ୍ଥିତ ପିସିସିଏଫ ବନ୍ୟପ୍ରାଣୀଙ୍କ କାର୍ଯ୍ୟାଳୟ ସମ୍ମୁଖରେ ପ୍ରତିବାଦ କରିଥିଲେ। ହାତୀ ବେଶ ହୋଇ ହାତରେ ପ୍ଲାକାର୍ଡ ଧରି ଶାନ୍ତିପୂର୍ଣ୍ଣ ଭାବେ ଓଡ଼ିଶା ହାତୀ ବଂଶ ସମ୍ମୁଖୀନ ହେଉଥିବା ସ୍ଥିତିକୁ ପ୍ରଦର୍ଶନ କରିଥିଲେ। ଏପରିକି ଅଭୟାରଣ୍ୟ ଓ ସୁରକ୍ଷିତ ଅଞ୍ଚଳରେ କିପରି ଶିକାରୀ, ବନ୍ୟାପ୍ରାଣୀ ମାଫିଆ ଓ ବନ ବିଭାଗ କର୍ମଚାରୀଙ୍କ ଚକ୍ରବୂ୍ୟହରେ ଫସି ହାତୀମାନେ ମୃତ୍ୟୁବରଣ କରୁଛନ୍ତି, ତାହାର ବାସ୍ତବତାକୁ ଅଭିନୟ ମାଧ୍ୟମରେ ସାମ୍ନାକୁ ଆଣିଥିଲେ। ପିସିସିଏଫ୍ ବନ୍ୟପ୍ରାଣୀଙ୍କ କାର୍ଯ୍ୟାଳୟ ସମ୍ମୁଖରେ ମୃତ ହାତୀ ରୂପରେ ଶୋଇ ରହିବା ସହ ‘ସେଭ୍ ମି’ ବା ‘ମୋତେ ବଞ୍ଚାଅ’ ସ୍ଲୋଗାନ ଦେଇଥିଲେ। ପ୍ରାୟ ଅଧଘଣ୍ଟା ଧରି ଏଭଳି ପ୍ରତିବାଦ ପରେ ନନ୍ଦନକାନନ ଫାଟକ ସାମ୍ନାରେ ମଧ୍ୟ ଅନୁରୂପ ଭାବରେ ମୃତ ହାତୀର ଅଭିନୟ କରି ପ୍ରତିବାଦ କରାଯାଇଥିଲା। ଏନେଇ ପୁରବୀ କହିଛନ୍ତି, ଓଡ଼ିଶାରେ ଘଟୁଥିବା ହାତୀ ମୃତ୍ୟୁ ବିଭିନ୍ନ ବନ୍ୟପ୍ରାଣୀ ବା ଟେରିଟୋରିଆଲ ଡିଏଫ୍ଓଙ୍କ ଦାୟିତ୍ୱହୀନତା ଏବଂ ଉଚ୍ଚ ଅଧିକାରୀଙ୍କ ନେତୃତ୍ୱ ନେବାରେ ଅକ୍ଷମତାକୁ ପଦାରେ ପକାଇଛି। ଜଙ୍ଗଲରେ ହାତୀଙ୍କୁ ମାରି ପୋତି ଦେଇ ଭୁବନେଶ୍ୱରରେ ଡ୍ରାମା କରୁଛି ବନ ବିଭାଗ। ହାଇକୋର୍ଟରେ ସତ୍ୟପାଠରେ ବି ହାତୀ ଶିକାରକୁ ଫାଙ୍କି ଦେଉଛନ୍ତି ପିସିସିଏଫ। ଆଠଗଡ଼ରେ ଯେଉଁସବୁ କଙ୍କାଳକୁ ମାଟି ତଳୁ ବାହାର କରାଯାଇଥିଲା, ସେଗୁଡ଼ିକ ପିସିସିଏଫ ନିଜ ସତ୍ୟପାଠରେ ସ୍ଥାନ ଦେଇନାହାନ୍ତି। ସେହି ହାତୀମାନେ କ’ଣ ଆତ୍ମହତ୍ୟା କରିଥିଲେ ନା ସମାଧି ନେଇଥିଲେ ବୋଲି ପୁରବୀ ପ୍ରଶ୍ନ କରିଛନ୍ତି।