ନୂଆଦିଲ୍ଲୀ: କଥାରେ ଅଛି କଠିନ ପରିଶ୍ରମ ବଳରେ ସବୁ କ୍ଷେତ୍ରରେ ସଫଳତା ମିଳିଥାଏ। ଏମିତିକି ଛୋଟ ଏବଂ ଦୁର୍ବଳ ବି ଅନେକ ସମୟରେ ସବଳ ଉପରେ ବିଜୟପ୍ରାପ୍ତ କରିଥାଏ। ଠିକ୍ ଏହି କଥାକୁ ବୁଝାଇବା ପାଇଁ ଠେକୁଆ ଓ କଇଁଛ ଗପ ବି ପ୍ରାୟ ସମସ୍ତେ ଶୁଣିଥିବେ। ଏବେ ଏହି ଉଦାହରଣକୁ ନେଇ ଲୋକଙ୍କୁ ସଚେତନ କରିବା ଆରମ୍ଭ କରିଛି ପୁଣେ ପୋଲିସ। କଇଁଛର ଏକ ଫଟୋ ସୋସିଆଲ୍ ମିଡିଆରେ ଶେୟାର କରି ପୋଲିସ କ୍ୟାପସନ୍ରେ କହିଛି ଯେ, ଧୀରେ ଏବଂ ନିରାପଦ ଯାତ୍ରା ହିଁ ଦୀର୍ଘପଥ ଅତିକ୍ରମ କରିବାରେ ସଫଳତା ପ୍ରଦାନ କରିଥାଏ। ତେଣୁ ସମସ୍ତେ ସଡ଼କ ସୁରକ୍ଷା ଏବଂ ନିଜର ନିରାପଦ ଯାତ୍ରା ନିମନ୍ତେ କଇଁଛ ଭଳି ହେବା ଉଚିତ।
ନିରାପଦ ଯାତ୍ରା କରିବା ପାଇଁ ଲୋକଙ୍କୁ ସଚେତନ କରିବା ଉଦ୍ଦେଶ୍ୟରେ ଏଭଳି ଏକ ମାଧ୍ୟମକୁ ଆପଣାଇ ଏବେ ଚର୍ଚ୍ଚାକୁ ଆସିଛି ପୁଣେ ପୋଲିସ। ପୁଣେ ପୋଲିସର କହିବା ଅନୁସାରେ କଇଁଛ ଯେଉଁଭଳି ଧୀରେ ଧୀରେ ଚାଲି ବି ଲକ୍ଷ୍ୟପଥରେ ପହଞ୍ଚିପାରେ ସେହିଭଳି ସମସ୍ତେ ରାସ୍ତାରେ ନିରାପଦ ଯାତ୍ରା କରିବା ଉଚିତ। ଏହା ସହିତ ପୋଲିସ ମଧ୍ୟ କଇଁଛର ଏକ ଫଟୋ ଶେୟାର କରି ସେଥିରେ ସଡ଼କ ସୁରକ୍ଷାର ହାସ୍ ଟ୍ୟାଗ ଦେଇ କହିଛି କି,ଏକ ଛୋଟ ଜୀବ ବି ନିଜ ସୁରକ୍ଷା ନିମନ୍ତେ ହେଲ୍ମେଟ୍ ପିନ୍ଧିବାର ଗୁରୁତ୍ୱକୁ ବୁଝିପାରିଛି। ତେଣୁ କଇଁଛଠାରୁ ହିଁ ସମସ୍ତେ ଏହି ଶିକ୍ଷା ଗ୍ରହଣ କରିବା ଉଚିତ। ଲୋକଙ୍କୁ ଧୀରେ ଗାଡ଼ି ଚଳାଇବା, ହେଲ୍ମେଟ୍ ପିନ୍ଧିବା ଆଦି ନେଇ ସଚେତନ କରାଇବା ଉଦ୍ଦେଶ୍ୟରେ ପୋଲିସର ଏଭଳି ନିଆରା ଷ୍ଟାଇଲ୍ ସମସ୍ତଙ୍କୁ ବେଶ୍ ଆକୃଷ୍ଟ କରିପାରିଛି। ସେଥିପାଇଁ ଏବେ ପୋଲିସର ଏହି ମେସେଜ୍୍ ସୋସିଆଲ୍ ମିଡିଆରେ ଭାଇରାଲ୍ ହେବାରେ ଲାଗିଛି। ଲୋକେ ଏହି ମେସେଜ୍କୁ ଲାଇକ୍ କରିବା ସହିତ ସୁନ୍ଦର କମେଣ୍ଟ ବି ଦେଉଛନ୍ତି।