ବଲାଙ୍ଗୀର ଅଫିସ, ୨୦ା୧୦: ଅଭିନବ ଉପାୟରେ ନିଶା କାରବାର ଚଳାଇଥିବା ଜଣେ ବ୍ୟକ୍ତି ଓ ତାଙ୍କ ନାବାଳକ ପୁଅକୁ ବଲାଙ୍ଗୀର ଟାଉନ୍ ଥାନା ପୋଲିସ ମଙ୍ଗଳବାର ରାତିରେ ଧରିଛି। କୋଲ୍ଡ ଡ୍ରିଙ୍କ୍ସରେ ନିଶା ମିଶାଇ ଏହାକୁ ସେମାନେ ସହରରେ ବିକ୍ରି କରୁଥିଲେ। ଏହି ଘଟଣା ଜଣାପଡ଼ିବା ପରେ ଥଣ୍ଡା ପାନୀୟ ପିଉଥିବା ଲୋକଙ୍କ ମଧ୍ୟରେ ଭୟ ସୃଷ୍ଟି ହୋଇଛି। ଟାଉନ୍ ଥାନା ପୋଲିସ ଅଭିଯୁକ୍ତଙ୍କଠାରୁ ୪୦୦ ବୋତଲ ଏସ୍କାଫ୍ କଫ୍ ସିରପ, ଗୋଟିଏ ଷ୍ଟ୍ରଫ୍ ଏନ୍ଟି-୧୦ ଟାବଲେଟ୍, ଗୋଟିଏ ବୋତଲ ନାରଙ୍ଗି ରଙ୍ଗ ପାଣି, ୨୯ଟି ଷ୍ଟିଂ ଏନର୍ଜୀ ବୋତଲ, ନଗଦ ୯୨ହଜାର ଟଙ୍କା ଜବତ କରିଛି। ଗିରଫ ପ୍ରଶାନ୍ତ ଜେନା (୪୫)ଙ୍କୁ କୋର୍ଟ ଚାଲାଣ କରାଯାଇଛି। ୧୭ ବର୍ଷର ନାବାଳକ ପୁଅକୁ ଜୁଭେନାଇଲ କୋର୍ଟରେ ହାଜର ପରେ ରାଉରକେଲାସ୍ଥିତ ବାଳସୁଧାର ଗୃହକୁ ପଠାଯାଇଛି।
ମଙ୍ଗଳବାର ରାତିରେ ପୋଲିସ ପାଟ୍ରୋଲିଂ କରୁଥିବାବେଳେ ବରପାଲିପଡା ରାଜା ସମାଧି ନିକଟରେ ଜଣେ ପିଲା ଏସ୍କଫ୍ ସିରପ ବିକ୍ରି କରୁଥିବା ଦେଖିବାକୁ ପାଇଥିଲେ। ସମ୍ପୃକ୍ତ ପିଲାକୁ ଧରି ପଚରାଉଚରା କରିବା ପରେ ପୋଲିସ ତାଙ୍କ ଘରେ ଚଢ଼ାଉ କରିଥିଲା। ସେଠାରୁ ଉପରୋକ୍ତ ଜବତ ସାମଗ୍ରୀ ଓ ଟଙ୍କା ବାହାରିଥିଲା। ଘରେ ଷ୍ଟିଂ ଥଣ୍ଡା ପାନୀୟ ବୋତଲରେ ସେମାନେ କଫ୍ ସିରପ୍ ଓ ନିଶା ବଟିକା ଭର୍ତ୍ତି କରି ଏହାକୁ ବିକ୍ରି କରୁଥିଲେ। ଅନେକ ନିଶା ସେବନକାରୀ ସେମାନଙ୍କଠାରୁ ଏହା କିଣି ବ୍ୟବହାର କରୁଥିଲେ। ଏ ନେଇ ଟାଉନ୍ ଥାନାରେ ଏକ ମାମଲା(୫୪୯/୨୨) ରୁଜୁ ହୋଇଥିବା ସଦର ଏସ୍ଡିପିଓ ତୋଫାନ ବାଗ ଓ ଟାଉନ ଥାନା ଆଇଆଇସି ପ୍ରିୟଙ୍କା ରାଉତରାୟ ସୂଚନା ଦେଇଛନ୍ତି।
