ବେଙ୍ଗାଲୁରୁ,୨୧ ।୭: ଭାରତୀୟ ନୌସେନାର ଏୟାରକ୍ରାପ୍ଟ କ୍ୟାରିୟର ଆଇଏନଏସ ବିକ୍ରମାଦିତ୍ୟରେ ପୁଣିଥରେ ନିଆଁ ଲାଗି ଯାଇଥିବା ଜଣାପଡିଛି । ବୁଧବାର କର୍ନାଟକର ବ୍ୟବସାୟୀକ ବନ୍ଦର ନିକଟରେ ଆରବ ସାଗରରେ ଟ୍ରାଏଲ ସମୟରେ ବିକ୍ରମାଦିତ୍ୟରେ ନିଆଁ ଲାଗିଯାଇଥିବା ଜଣାପଡିଛି । ହେଲେ ଏହି ନିଆଁକୁ ଖୁବଶୀଘ୍ର କାବୁ କରାଯାଇଥିବାରୁ କିଛି କ୍ଷୟକ୍ଷତି ହୋଇ ନ ଥିବା ସୂଚନା ରହିଛି ।
ଭାରତୀୟ ନୌସେନାର ସୂଚନା ଅନୁଯାୟୀ, ସମୁଦ୍ରରେ ଟ୍ରାଏଲ ସମୟରେ ବିକ୍ରମାଦିତ୍ୟରେ ନିଆଁ ଲାଗି ଯାଇଛି । ଏଥିରେ ଥିବା କ୍ରିୟୁ ମେମ୍ବର ଜାହାଜରେ ଥିବା ଅଗ୍ନିଶମ ଉପକରଣ ମାଧ୍ୟମରେ ନିଆଁକୁ ଆୟତ୍ତ କରି ନେଇଛନ୍ତି । ଏଥିରେ କେହି ଆହତ ହୋଇ ନ ଥିବା ଜଣାପଡିଛି । ତେବେ ନୌସେନା ପକ୍ଷରୁ ଏହି ଘଟଣାର ଯାଞ୍ଚ ପାଇଁ କୋର୍ଟ ଅଫ ଏନକ୍ୱାରୀକୁ ନିର୍ଦ୍ଦେଶ ଦେଇଛି ।