ନୂଆଦିଲ୍ଲୀ,୩ା୯: ଦେଶର ପ୍ରମୁଖ ଇସ୍ପାତ ଉତ୍ପାଦକ ତଥା ରାଷ୍ଟ୍ରାୟତ୍ତ ମହାରତ୍ନା କମ୍ପାନୀ ଷ୍ଟିଲ୍ ଅଥରିଟି ଅଫ୍ ଇଣ୍ଡିଆ ଲିମିଟେଡ୍ (ସେ୍ଲ)ର ସ୍ବତନ୍ତ୍ର ଷ୍ଟିଲ୍ରେ ଆଇଏନ୍ଏସ୍ ବିକ୍ରାନ୍ତ ନିର୍ମିତ ହୋଇଛି ବୋଲି ସେଲ୍ ପକ୍ଷରୁ କୁହାଯାଇଛି। ଏପରିକି ଦେଶର ପ୍ରଥମ ସ୍ବଦେଶୀ ଜ୍ଞାନକୌଶଳରେ ନିର୍ମିତ ବିମାନ ପରିବହନକାରୀ ଆଇଏନ୍ଏସ୍ ବିକ୍ରାନ୍ତ ପାଇଁ ଆବଶ୍ୟକ ସମସ୍ତ ଡିଏମ୍ଆର୍ ଗ୍ରେଡ୍ ସ୍ପେଶିଆଲିଟି ଷ୍ଟିଲ୍ ସେ୍ଲ ଯୋଗାଇ ଦେଇଛି। ଭାରତୀୟ ନୌସେନାର ଏହି ପ୍ରଥମ ସ୍ବଦେଶୀ ବିମାନ ପରିବହନକାରୀ ଜାହାଜ ନିର୍ମାଣ ପାଇଁ କମ୍ପାନୀ ପ୍ରାୟ ୩୦,୦୦୦ ଟନ୍ ଡିଏମ୍ଆର୍ ଗ୍ରେଡ୍ ସ୍ପେଶିଆଲିଟି ଷ୍ଟିଲ୍ ଯୋଗାଇବା ସହ ଆତ୍ମନିର୍ଭର ଭାରତ ନିର୍ମାଣରେ କମ୍ପାନୀ ଭାଗୀଦାରି ହୋଇସାରିଛି। ଏହି ସ୍ବଦେଶୀ ବିମାନ ପରିବହନକାରୀ ବୋଟ୍ ଆଇଏନ୍ଏସ୍ ବିକ୍ରାନ୍ତ କୋଚି ଶିପିୟାର୍ଡ ଲିମିଟେଡ୍ଠାରୁ ଶୁକ୍ରବାର ସମୁଦ୍ର ଅବତରଣ କରିଛି। ଏହି ସ୍ବଦେଶୀ ପ୍ରକଳ୍ପ ପାଇଁ ସେଲ୍ ଦ୍ୱାରା ଯୋଗାଯାଇଥିବା ଇସ୍ପାତରେ ସ୍ବତନ୍ତ୍ର ଡିଏମ୍ଆର୍ ଗ୍ରେଡ୍ ପ୍ଲେଟ୍ ଥାଏ। ଭାରତୀୟ ନୌସେନା ଏବଂ ଡିଏମ୍ଆର୍ଏଲ ସହଯୋଗରେ ସେଲ୍ ଦ୍ୱାରା ଏହି ଡିଏମ୍ଆର୍ ଗ୍ରେଡ୍ ପ୍ଲେଟ୍ଗୁଡିକ ବିକଶିତ କରାଯାଇଛି। ଉକ୍ତ ଜାହାଜର ହଲ୍ ଏବଂ ଭିତର ପାଇଁ ଗ୍ରେଡ୍ ୨୪୯-ଏ ଏବଂ ଫ୍ଲାଇଟ୍ ଡେକ୍ ପାଇଁ ଗ୍ରେଡ୍ ୨୪୯ -ବି ଡିଏମ୍ଆର୍ ପ୍ଲେଟ୍ ବ୍ୟବହାର କରାଯାଇଥିଲା। ଏହି ଯୁଦ୍ଧଜାହାଜ ପାଇଁ କମ୍ପାନୀର ସ୍ବତନ୍ତ୍ର ଇସ୍ପାତ କାରଖାନା ଭିଲାଇ, ବୋକାରୋ ଏବଂ ରାଉରକେଲା ଷ୍ଟିଲ୍ ପ୍ଲାଣ୍ଟ ସମ୍ପୂର୍ଣ୍ଣ ସ୍ବତନ୍ତ୍ର ଇସ୍ପାତ ଯୋଗାଇ ଦେଇଛି।
