ଚେନ୍ନାଇ,୧୪।୨ : ତାମିଲନାଡୁର ତଞ୍ଜାପୁରରେ ଏକ ଅଭାବନୀୟ ଘଟଣା ଘଟିଛି। ଯେଉଁଠାରେ ଗୋଟିଏ ମାଙ୍କଡ଼ ଘରେ ପଶି ୮ ଦିନର ଯାଆଁଳା ଶିଶୁଙ୍କୁ ଟେକି ନେଇଥିଲା। ସେଥିମଧ୍ୟରୁ ଜଣଙ୍କର ମୃତ୍ୟୁ ଘଟିଥିବା ବେଳେ ଆଉ ଜଣଙ୍କୁ ଉଦ୍ଧାର କରାଯାଇଛି।
ଭୁବନେଶ୍ୱରୀ ନାମକ ଜଣେ ମହିଳା ୮ ଦିନ ତଳେ ଯାଆଁଳା ଝିଅଙ୍କୁ ଜନ୍ମ ଦେଇଥିଲେ। ଶନିବାର ସକାଳେ ତାଙ୍କ ଝିଅ ଦୁଇଙ୍କୁ ସେ ଘର ଭିତରେ ଶୁଆଇଥିଲେ। ଏହି ସମୟରେ ମାଙ୍କଡ଼ପଲ ମଧ୍ୟରୁ ଗୋଟିଏ ମାଙ୍କଡ଼ ଟାଇଲ କାଢ଼ି ଘରେ ପଶି ଛୁଆ ଦୁଇଜଣଙ୍କୁ ଉଠାଇ ନେଇଥିଲା। ଏହା ପରେ ପିଲାଙ୍କୁ ନ ପାଇ ଖୁବ୍ କାନ୍ଦିଥିଲେ। ବହୁ ଖୋଜାଖୋଜି କରିବା ପରେ ସେ ଦେଖିଲାବେଳକୁ ମାଙ୍କଡ଼ ଛୁଆ ଦୁଇଙ୍କୁ ନେଇ ଘର ଉପରେ ବସିଛି। ଏହା ଦେଖି ଭୁବନେଶ୍ୱରୀ ଆଶ୍ଚର୍ଯ୍ୟ ହୋଇଯାଇଥିଲେ। ତାଙ୍କୁ ସାହାଯ୍ୟ କରିବା ପାଇଁ ଜୋର୍ରେ ପାଟି କରିଥିଲେ। ତାଙ୍କ ପାଟି ଶୁଣି ପଡ଼ୋଶୀମାନେ ସାହାଯ୍ୟ କରିବାକୁ ଆଗେଇ ଆସିଥିଲେ। ମାଙ୍କଡ଼ ନିକଟରୁ ଗୋଟିଏ ଛୁଆକୁ ଜୀବିତ ଅବସ୍ଥାରେ ଉଦ୍ଧାର କରିଥିବା ବେଳେ ଆଉ ଗୋଟିଏ ଛୁଆକୁ ଗୁରୁତର ଅବସ୍ଥାରେ ଡାକ୍ତରଖାନାକୁ ନିଆଯାଇଥିଲା। ସେଠାରେ ଡାକ୍ତର ପିଲାଟିକୁ ମୃତ ଘୋଷଣା କରିଛନ୍ତି।