ଖୋର୍ଦ୍ଧା,୧୫ା୯(ପ୍ରଭାତ ପାଣିଗ୍ରାହୀ): ଆବାସ ଯୋଜନାରେ ଘର ପାଇଁ କେନ୍ଦ୍ର ସରକାର ଅର୍ଥ ଯୋଗାଇ ଦେଉଛନ୍ତି। ସ୍ଥାନୀୟ ପ୍ରଶାସନିକ ଅଧିକାରୀଙ୍କ ଅବହେଳା ଯୋଗୁ ହିତାଧିକାରୀ ହଇରାଣ ହେଉଛନ୍ତି। ଟାଙ୍ଗୀ ବ୍ଲକରେ ଆବାସ ଯୋଜନା ବାଟବଣା ହୋଇପଡିଥିବା ଦେଖିବାକୁ ମିଳିଛି। କାର୍ଯ୍ୟାଦେଶ ସତ୍ତ୍ୱେ ହିତାଧିକାରୀଙ୍କ ଆକାଉଣ୍ଟକୁ ଟଙ୍କା ଦିଆଯାଉନାହିଁ। ଏନେଇ ଅଧିକାରୀମାନଙ୍କୁ ପଚାରିଲେ ସହଯୋଗ କରୁନାହାନ୍ତି। ଏଭଳି ଅଭିଯୋଗ ଆଣିଛନ୍ତି ହିତାଧିକାରୀ।
ବ୍ଲକ ଛଣଗିରି ପଞ୍ଚାୟତ ଦେଉଳି ପାଟଣା ଗ୍ରାମର ଭୋଇ ପ୍ରଧାନଙ୍କ ସ୍ତ୍ରୀ ଉର୍ମିଳା ଗତ ଜୁନ ୧୯ରେ ଆବାସ ଯୋଜନାରେ ଘର କରିବା ପାଇଁ ବ୍ଲକ ପକ୍ଷରୁ କାର୍ଯ୍ୟାଦେଶ ପାଇଛନ୍ତି। ଏହାର କାର୍ଯ୍ୟାଦେଶ ନମ୍ବର ହେଉଛି ଓଡି/୨୩/୦୦୯/୯୩୦୫/୨୧-୨୨/ ରେଜିଷ୍ଟ୍ରେସନ ନଂ.ଓଆର ୧୫୩୨୭୭୧୬୭। ବର୍ତ୍ତମାନ ସୁଦ୍ଧା ତାଙ୍କ ବ୍ୟାଙ୍କ ଆକାଉଣ୍ଟକୁ ପ୍ରଥମ କିସ୍ତି ଆସିନାହିଁ। ଏନେଇ ସେ ପଞ୍ଚାୟତ ଅଫିସଠାରୁ ବ୍ଲକ କାର୍ଯ୍ୟାଳୟକୁ ଦୌଡି ଦୌଡ଼ି ନୟାନ୍ତ ହେଲେଣି। କେବଳ ପ୍ରତିଶ୍ରୁତି ଦିଆଯାଉଛି, କୌଣସି ସହଯୋଗ ମିଳୁନଥିବା ସେ ଅଭିଯୋଗ କରିଛନ୍ତି। ଏପରିକି ଏନେଇ ଅଧିକାରୀମାନଙ୍କୁ ପଚାରିଲେ ସହଯୋଗ କରୁନାହାନ୍ତି। ଏନେଇ ଗୁରୁବାର ଜିଲା ପରିଷଦ ମୁଖ୍ୟ ଉନ୍ନୟନ ଓ ନିର୍ବାହୀ ଅଧିକାରୀ (ସିଡିଓ ଆଣ୍ଡ ଇଓ) ବାଦଲ ମହାନ୍ତିଙ୍କ ନିକଟରେ ଭୋଇ ପ୍ରଧାନ ଲିଖିତ ଅଭିଯୋଗ କରିଛନ୍ତି। ଉର୍ମିଳାଙ୍କ ନାମରେ କାର୍ଯ୍ୟାଦେଶ ସତ୍ତ୍ୱେ ବ୍ୟାଙ୍କ ଆକାଉଣ୍ଟକୁ କୌଣସି ଟଙ୍କା ଆସିନାହିଁ। ଏ ସମ୍ପର୍କରେ ପଞ୍ଚାୟତ କାର୍ଯ୍ୟାଳୟରେ ଯୋଗାଯୋଗ କରିବାରୁ ସେ ବ୍ଲକରେ ଆବାସ ଦାୟିତ୍ୱରେ ଥିବା ଅଫିସରଙ୍କୁ ଦେଖାକରିବାକୁ କହିଥିଲେ। ତେବେ ସମ୍ପୃକ୍ତ ଅଫିସରଙ୍କୁ ଦେଖା କରିବା ସତ୍ତ୍ୱେ କୌଣସି ସହଯୋଗ କରିନଥିଲେ। ଏନେଇ ଗତ ଅଗଷ୍ଟ ୧୬ରେ ବିଡିଓଙ୍କୁ ଲିଖିତ ଅଭିଯୋଗ କରିଥିଲି। ପରେ କୌଣସି ସହଯୋଗ ନ ମିଳିବାରୁ ପୁଣି ଥରେ ସେହି ମାସ ୨୩ ତାରିଖରେ ଅଭିଯୋଗ ପରେ ବିଡିଓଙ୍କ ପ୍ରତିଶ୍ରୁତି ସତ୍ତ୍ୱେ ପ୍ରଥମ କିସ୍ତି ମିଳିଲା ନାହିଁ। କାର୍ଯ୍ୟାଦେଶ ପାଇବାର ୩ ମାସ ବିତିବାକୁ ଆସିଲାଣି। ପ୍ରଥମ କିସ୍ତି ପ୍ରଦାନ କରାଗଲେ ଘର ନିର୍ମାଣ କରିବାରେ ସହାୟକ ହୋଇପାରିବ ବୋଲି ଜିଲା ପରିଷଦ ମୁଖ୍ୟ ଉନ୍ନୟନ ଓ ନିର୍ବାହୀ ଅଧିକାରୀଙ୍କ ନିକଟରେ ଏଭଳି ଅଭିଯୋଗ କରିଛନ୍ତି ଭୋଇ ପ୍ରଧାନ। ଏ ସମ୍ପର୍କରେ ଜିଲା ପରିଷଦ ସିଡିଓ ଆଣ୍ଡ ଇଓ ମହାନ୍ତିଙ୍କ ପ୍ରତିକ୍ରିୟା ମିଳିପାରିନାହିଁ।