ଭବାନୀପାଟଣା,୯।୧୧(ଉତ୍ତମ କୁମାର ଦାଶ): ଜନକେନ୍ଦ୍ରିକ ଶାସନ ବ୍ୟବସ୍ଥାକୁ ସୁଦୃଢ କରିବା ପାଇଁ ରାଜ୍ୟ ସରକାର ୫-ଟି ଅନ୍ତର୍ଗତ ମୋ ସରକାର ଭଳି ଏକ ଅଭିନବ ଓ ଗୁରୁତ୍ୱପୂର୍ଣ୍ଣ ଉଦ୍ୟମ ଆରମ୍ଭ କରିଛନ୍ତି। ଏଥିରେ ସରକାରୀ କାର୍ଯ୍ୟାଳୟକୁ ବିଭିନ୍ନ ସେବା ପାଇଁ ଆସୁଥିବା ଜନସାଧାରଣଙ୍କୁ ମିଳୁଥିବା ସେବା ଆଚରଣ ଓ ପ୍ରତ୍ୟକ୍ଷ ମତାମତ ସଂଗ୍ରହ କରାଯାଇ ଅଧିକାରୀଙ୍କ ଆଚରଣ ସହ ବୃତ୍ତିଗତ ଦକ୍ଷତାରେ ପରିବର୍ତ୍ତନ ଆଣିବା ମୋ ସରକାରର ଲକ୍ଷ୍ୟ ରହିଛି। ହେଲେ ଏବେ ବି କିଛି ଅଧିକାରୀ, ଯନ୍ତ୍ରୀ କର୍ମଚାରୀ ଏହାକୁ ଭ୍ରୂପେକ୍ଷ ନ କରି ବେଫିକର ହୋଇ ନିଜ ଅନ୍ଦାଜରେ କାର୍ଯ୍ୟ କରୁଛନ୍ତି। ନା ସେମାନେ ଅଫିସକୁ ଆସୁଛନ୍ତି ନା ସେମାନେ ଲୋକଙ୍କ ଅଭିଯୋଗ ଶୁଣୁଛନ୍ତି। ଫଳରେ ସରକାରଙ୍କ ଏହି ଅଭିନବ ପ୍ରୟାସ ଏବେ ବାଟବଣା ହେବାରେ ଲାଗିଛି। ଏମିତି ଏକ ଉଦାହରଣ ଦେଖିବାକୁ ମିଳିଛି କଳାହାଣ୍ଡି ଜିଲା ଜୁନାଗଡ ସହର ନିକଟରେ ଥିବା ଗ୍ରାମ୍ୟ ଉନ୍ନୟନ ବିଭାଗ(ଆରଡି) ସହକାରୀ ନିର୍ବାହୀ ଯନ୍ତ୍ରୀଙ୍କ କାର୍ଯ୍ୟାଳୟରେ। ଏଠାରେ ଜଣେ ସହକାରୀ ନିର୍ବାହୀ ଯନ୍ତ୍ରୀ ଓ ୨ଜଣ କନିଷ୍ଠ ଯନ୍ତ୍ରୀ ନିଯୁକ୍ତ ହୋଇଛନ୍ତି। ହେଲେ ସେମାନେ କାର୍ଯ୍ୟାଳୟକୁ ପ୍ରାୟ ସମୟରେ ଆସୁନାହାନ୍ତି। ଫଳରେ ପିଅନମାନେ ହିଁ ଲୋକଙ୍କ ଅଭିଯୋଗ ଶୁଣୁଛନ୍ତି। ଯନ୍ତ୍ରୀଙ୍କ ପାଇଁ ଆବାସିକ ବାସ ଭବନ (ରେସିଡେଣ୍ଟାଲ ହାଉସ) ନିର୍ମାଣ କରାଯାଇଥିଲେ ମଧ୍ୟ ସେମାନେ ଏଠାରେ ନ ରହି ଭବାନୀପାଟଣାରେ ରହୁଥିବା ଜଣାପଡିଛି। ଗତ କିଛି ଦିନ ତଳେ ଏଭଳି ଅନିୟମିତାକୁ ନେଇ ପୂର୍ବତନ ଜିଲା ଯୁବ କଂଗ୍ରେସ ସଭାପତି ସାଉଲ ମଙ୍ଗରାଜ ଧର୍ମଗଡ ଉପଜିଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଆମରଣ ଅନଶନ କରିଥିଲେ। ଏହାପରେ ଉପଜିଲାପାଳ ଆରଡି ଅଫିସରେ କାର୍ଯ୍ୟରତ ଯନ୍ତ୍ରୀମାନେ ନିଜ କାର୍ଯ୍ୟାଳୟରେ ଉପସ୍ଥିତ ରହିବେ ବୋଲି ପ୍ରତିଶ୍ରୁତି ଦେଇଥିଲେ। ପରେ ଆମରଣ ଅନଶନ ହଟିଥିଲା। ହେଲେ ଏହାପରେ ମଧ୍ୟ ବିଭାଗୀୟ ଅଧିକାରୀ ଭ୍ରୂୃପେକ୍ଷ ନ କରିବା ସାଧାରଣରେ ଚର୍ଚ୍ଚାର ବିଷୟ ପାଲଟିଛି। ଅନ୍ୟପଟେ ଜିଲାରେ ଗ୍ରାମ୍ୟ ଉନ୍ନୟନ ବିଭାଗରେ ୪ଜଣ ସହକାରୀ ନିର୍ବାହୀ ଯନ୍ତ୍ରୀ (ଏଇଇ) ରହିବା ବଦଳରେ ଏବେ ମାତ୍ର ଜଣେ ଅଛନ୍ତି। ସେହିପରି କନିଷ୍ଠ ଯନ୍ତ୍ରୀ ୮ବଦଳରେ ୬ଜଣ ରହିଛନ୍ତି। ଯେଉଁଥିପାଇଁ କାର୍ଯ୍ୟ ପରିଚାଳନାରେ ଅସୁବିଧା ହେଉଛି ବୋଲି ଭବାନୀପାଟଣାସ୍ଥିତ ଗ୍ରାମ୍ୟ ଉନ୍ନୟନ ବିଭାଗ ଅଧୀକ୍ଷଣ ଯନ୍ତ୍ରୀ ବିଶ୍ୱଜିତ ରାୟଗୁରୁ ପ୍ରକାଶ କରିଛନ୍ତି।