ଭୁବନେଶ୍ୱର,୨୯।୧୨(ବ୍ୟୁରୋ): ଏବେ ବନ ବିଭାଗରେ କାର୍ଯ୍ୟରତ ରେଞ୍ଜରମାନଙ୍କୁ ୫ବର୍ଷ ବଦଳରେ ଅଢ଼େଇ ବର୍ଷ ଚାକିରି କରିବା ପରେ ଏସିଏଫ୍ ର଼୍ୟାଙ୍କ୍କୁ ପଦୋନ୍ନତି ମିଳିପାରିବ। ରେଞ୍ଜରଙ୍କ ପଦୋନ୍ନତି ସମୟ ସୀମା ହ୍ରାସ କରିବାକୁ ଗତ ୧୩ତାରିଖରେ ଜଙ୍ଗଲ, ପରିବେଶ ଓ ଜଳବାୟୁ ପରିବର୍ତ୍ତନ ବିଭାଗର ଚିଠି ନମ୍ବର ୨୨୧୯୦ରେ ବିଭାଗୀୟ ଅତିରିକ୍ତ ସଚିବ ଊଷାରାଣୀ ଦାସ ଓଡ଼ିଶା ଲୋକସେବା ଆୟୋଗ(ଓପିଏସ୍ସି)ର ସେକ୍ରେଟାରୀଙ୍କୁ ଅନୁରୋଧ କରିଥିଲେ। ବିଶେଷକରି ଏହି ପରିବର୍ତ୍ତନ ଗୋଟିଏ ବର୍ଷ ପାଇଁ କରିବାକୁ କୁହାଯାଇଥିଲା। ଉକ୍ତ ଅନୁରୋଧକୁ ଗତ ୨୬ତାରିଖରେ ଓପିଏସ୍ସି ପକ୍ଷରୁ ଅନୁମୋଦନ କରାଯିବା ସହ ପତ୍ର ସଂଖ୍ୟା ୧୧୫୫୬/୨୬।୧୨।୨୨ରେ ବିଭାଗୀୟ ଅତିରିକ୍ତ ସଚିବଙ୍କୁ ଜଣାଇ ଦିଆଯାଇଛି। ତେବେ ରାଜ୍ୟରେ ବନ୍ୟପ୍ରାଣୀ-ମଣିଷ ଦ୍ୱନ୍ଦ୍ୱ, ହାତୀ ଶିକାର, ବାଘ ଶିକାର, ହାତୀଙ୍କୁ ମାରି ପ୍ରମାଣ ନଷ୍ଟ ଉଦ୍ୟମ ଆଦି ଘଟଣାରେ ବନ କର୍ମଚାରୀ ସମ୍ପୃକ୍ତ ହେବା ଘଟଣା ଦିନକୁ ଦିନ ବଢ଼ୁଥିବାବେଳେ ଏଥିରେ ବନ ବିଭାଗର କାର୍ଯ୍ୟକଳାପ ସନ୍ଦେହ ଘେରରେ ରହିଛି। ଏପରି କି ୨୦୨୨ ବର୍ଷ ହାତୀ ବଂଶ ପାଇଁ ଖରାପ ବର୍ଷ ବୋଲି ହାଇକୋର୍ଟ ଟିପ୍ପଣୀ ଦେଇଛନ୍ତି। ଏଭଳି ସ୍ଥିତିରେ ବନ ବିଭାଗରେ ରେଞ୍ଜରମାନଙ୍କ ପଦୋନ୍ନତି ସମୟ ସୀମାକୁ ହ୍ରାସ କରାଯିବା ଘଟଣା ପରିବେଶବିତ୍ ମହଲରେ ବିଭିନ୍ନ ପ୍ରଶ୍ନବାଚୀ ସୃଷ୍ଟି କରିଛି।
