ନୟାଗଡ଼,୧୭ା୬(ଲୋକନାଥ ମିଶ୍ର) ନୟାଗଡ଼ ଜିଲା ମୁଖ୍ୟ ଚିକିତ୍ସାଳୟରୁ ଗୁରୁବାର ସନ୍ଧ୍ୟାରେ ଜଣେ ବୃଦ୍ଧଙ୍କ ମୃତଦେହକୁ ପରିବାର ସଦସ୍ୟମାନେ ଆମ୍ବୁଲାନ୍ସ ବଦଳରେ ବାଇକ୍ ଯୋଗେ ନିଜ ଘରକୁ ନେଇ ଯାଇଥିଲେ। ତେବେ ମୃତଦେହ ଘରେ ପହଞ୍ଚତ୍ ଥିଲେ ମଧ୍ୟ ଜିଲା ମୁଖ୍ୟ ଚିକିତ୍ସାଳୟର ଚିକିତ୍ସା କରୁଥିବା ଡାକ୍ତର, ଚିକିତ୍ସାଳୟ ମ୍ୟାନେଜର, ହେଲପ ଡେସ୍କ, ଜିଲା ମୁଖ୍ୟ ଚିକିତ୍ସାଳୟର ସୁପରିଣ୍ଟେଣ୍ଡେଣ୍ଟ ଜାଣି ପାରି ନ ଥିଲେ। ଚିକିତ୍ସାଳୟରେ ଯେ କେହି ମଲେ ତାଙ୍କ ମୃତଦେହ ବ୍ୟବଚ୍ଛେଦ ହେବାର ନିୟମ ରହିଛି। ରୋଗୀଙ୍କୁ ଚିକିତ୍ସା କରୁଥିବା ଡାକ୍ତର ରୋଗୀଙ୍କ ମୃତ୍ୟୁ ସମ୍ପର୍କରେ ଜିଲା ମୁଖ୍ୟ ଚିକିତ୍ସାଳୟର ସୁପରିଣ୍ଟେଣ୍ଡେଣ୍ଟଙ୍କୁ ଅବଗତ କରାଇିବାର ନିୟମ ରହିଛି। ତେବେ ଡାକ୍ତର ରୋଗୀଙ୍କ ମୃତ୍ୟୁ ନେଇ ଅବଗତ କରାଇ ନ ଥିବା ଜଣାପଡ଼ିଛି। ଏଭଳିସ୍ଥଳେ ଚିକିତ୍ସାଳୟରୁ ମନଇଚ୍ଛା ମୃତଦେହ ନେଇଯିବା ସ୍ବାସ୍ଥ୍ୟ ବିଭାଗର କାର୍ଯ୍ୟଦକ୍ଷତା ଉପରେ ପ୍ରଶ୍ନବାଚୀ ସୃଷ୍ଟି କରିଛି। ନବଘନପୁର ମୃତଦେହକୁ ନେଇଯିବା ପରେ ଯିଏ ଯେତେବେଳେ ପାଇବ ଚିକିତ୍ସାଳୟରୁ ମୃତଦେହ ନେଇ ଯିବେ ଏଥିରେ ସନ୍ଦେହ ନାହିଁ ବୋଲି ପ୍ରଶ୍ନ ଉଠିଛି। ଏ ନେଇ ନବଘନପୁର ଗଁାର କୀର୍ତ୍ତନ ବେହେରା କୁହନ୍ତି, ବାପା ପଞ୍ଚୁ(୯୦) ଗୁରୁବାର ସନ୍ଧ୍ୟାରେ ଅସହ୍ୟ ଗୁଳୁଗୁଳି ଯୋଗୁ ଅସୁସ୍ଥ ହୋଇ ପଡିଥିଲେ। ତାଙ୍କୁ ଗୁରୁତର ଅବସ୍ଥାରେ ଏକ ଅଟୋ ଯୋଗେ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲୁ। ଡାକ୍ତର ମୃତ ଘୋଷଣା କରିଥିଲେ। ଡାକ୍ତର ମୃତ ଘୋଷଣା କରିବା ପରେ ମୃତଦେହକୁ ବାହାରକୁ ନେବା ପାଇଁ କହିଥିଲେ। ଯେଉଁ ଅଟୋରେ ବାପାଙ୍କୁ ଆଣିଥିଲୁ ସେଥିରେ ନେବା ପାଇଁ ଡ୍ରାଇଭର ସହ କଥା ହେଲୁ। ହେଲେ ଅଟୋ ଡ୍ରାଇଭର ମନା କରି ଆମ୍ବୁଲାନ୍ସ ଯୋଗେ ନେବା ପାଇଁ କହିଲେ। ଏପରି କି ଏକ ଅମ୍ବୁଲାନ୍ସ ବୁଝିଦେଇ ୧୮୦୦ ଟଙ୍କାରେ ଦେବା ପାଇଁ କହିଛନ୍ତି ବୋଲି କହିଥିଲେ। ସେହି ସମୟରେ କୀର୍ତ୍ତନଙ୍କ ପୁଅ ଗଁାରୁ ବାଇକ୍ ଯୋଗେ ଆସିଥିଲେ। ୧୮୦୦ ଟଙ୍କା କାହିଁ ଦେବୁ ପୁଅ ବାଇକ୍ରେ ମୃତଦେହ ନେଇ ଯିବୁ ଭାବି କାହାକୁ ନ ଜଣାଇ ବାଇକ୍ରେ ନେଇ ଆସିଲୁ। ଘରକୁ ମୃତଦେହ ଆଣିବା ସମ୍ପର୍କରେ ଚିକିତ୍ସାଳୟର କାହାରିକୁ ଜଣାଇନାହୁଁ। ପୁଣି ନିଜେ ଯାଇ କୌଣସି ଆମ୍ବୁଲାନ୍ସ ସହ ଯୋଗାଯୋଗ କରିନାହୁଁ। ବାଇକ୍ରେ ଆଣିବାକୁ ମୋତେ କେହି ପ୍ରବର୍ତ୍ତାଇ ନାହାନ୍ତି ବୋଲି ସେ କହିଛନ୍ତି। ଏ ନେଇ ସିଡିଏମ୍ଓ ମକରନ୍ଦ ବେଉରାଙ୍କୁ ପଚାରିବାରେ ନବଘନପୁରର ବୃଦ୍ଧଙ୍କ ମୃତଦେହ ବାଇକ୍ରେ ନେବା ଘଟଣାରେ ତଦନ୍ତ କରାଯାଇଥିଲା। ମୃତକ ପରିବାର ଲୋକ କାହାକୁ ନ ଜଣାଇ ମୃତଦେହକୁ ବାଇକ୍ରେ ନେଇ ଯାଇଥିଲେ। ମୃତଦେହକୁ ଆମ୍ବୁଲାନ୍ସରେ ନେବା ସମ୍ପର୍କରେ ପରିବାର ଲୋକ ସ୍ବାସ୍ଥ୍ୟ ବିଭାଗ ସହ ଯୋଗାଯୋଗ କରିନାହାନ୍ତି। ଅନ୍ୟପକ୍ଷେ ମୃତଦେହ ଚିକିତ୍ସାଳୟରୁ ସ୍ଥାନାନ୍ତର ସମ୍ପର୍କରେ ଚିକତ୍ସାଳୟ ମ୍ୟାନେଜର, ହେଲପ ଡେସ୍କ, ଜିଲା ମୁଖ୍ୟ ଚିକିତ୍ସାଳୟର ସୁପରିଣ୍ଟେଣ୍ଡେଣ୍ଟ ଜାଣି ନାହାନ୍ତି। ଏ ସମ୍ପର୍କରେ ଜିଲାପାଳଙ୍କୁ ଅବଗତ କରାଯାଇଛି ବୋଲି ସେ କହିଛନ୍ତି।