ନୂଆଗାଁ,୧୯।୧ (ଡି.ଏନ.ଏ.): ନୟାଗଡ଼ ଜିଲା ନୂଆଗାଁ ବିଡିଓଙ୍କୁ ପ୍ରଧାନମନ୍ତ୍ରୀ ଆବାସ ଯୋଜନାରେ ଚାଲିଥିବା ଅନିୟମିତତା ବାବଦରେ ଜଣାଇବାକୁ ମଙ୍ଗଳବାର ଲୋକମାନେ ଯାଇଥିଲେ । ହେଲେ ବିଡିଓ ଜନସାଧାରଣଙ୍କ ଅଭିଯୋଗ ଶୁଣିବା ବଦଳରେ ରାଗି ଯାଇଥିଲେ । ଯାହାର ଭିଡିଓ ଭାଇରାଲ ହେବାରେ ଲାଗିଛି ଏହାକୁ ନେଇ ବିଭିନ୍ନ ମହଲରେ ନିନ୍ଦା କରାଯାଇଛି ।
ସୂଚନା ଅନୁଯାୟୀ, ନୂଆଗାଁ ବ୍ଲକ ଚାହାଳୀ, ଦୁର୍ଦ୍ଦୁରା ଓ ଢେଙ୍କେଣା ପଞ୍ଚାୟତର ବହୁ ମହିଳା,ପୁରୁଷ ପ୍ରଧାନମନ୍ତ୍ରୀ ଆବାସ ଯୋଜନାରେ ଅନିୟମିତତା ହୋଇଥିବା ନେଇ ଅଭିଯୋଗ କରିବାକୁ ନୂଆଗାଁ ବିଡିଓଙ୍କ ପ୍ରକୋଷ୍ଠକୁ ଯାଇଥିଲେ। ତାଲିକାରେ ନାଁ ରହିଥିଲେ ମଧ୍ୟ ପରବର୍ତ୍ତୀ ସମୟରେ କେମିତି ତାଲିକାରୁ ନାଁ କଟି ଯାଉଛି, ବର୍ଷ ବର୍ଷ ଧରି ଅପେକ୍ଷା କଲେ ମଧ୍ୟ ଆବାସ ଯୋଜନାରେ ଗୃହ ମିଳୁନାହିଁ। କିଭଳି ତାଲିକାରୁ ଆମର ନାଁ କଟୁଛି ଓ ଅଯୋଗ୍ୟ ହିତାଧିକାରୀ କେମିତି ଘର ପାଉଛନ୍ତି ବୋଲି ବିଡିଓଙ୍କୁ ଲୋକମାନେ ପ୍ରଶ୍ନ କରିଥିଲେ । ଆମ କଥା ନ ବୁଝିଲେ ଆମେ ରାସ୍ତାରେ ବସିବୁ ବୋଲି ଅଭିଯୋଗକାରୀମାନେ କହିଥିଲେ। ଏତିକି କଥାରେ ବିଡିଓ ରାଗି ଯାଇ ଯାଅ ରାସ୍ତାରେ ବସ ବୋଲି କହିଥିଲେ। ବ୍ଲକର କେତେଜଣ କର୍ମଚାରୀ , ୩ ସରପଞ୍ଚଙ୍କ ଉପସ୍ଥିତିରେ ଅଭିଯୋଗକାରୀ ଓ ବିଡିଓଙ୍କ ମଧ୍ୟରେ କଥା କଟାକଟି ପରେ ବିଡିଓ ଉତ୍ତ୍ୟକ୍ତ ହୋଇ ଅଭିଯୋଗକାରୀଙ୍କ ଉପରକୁ ଝାମ୍ପି ପଡିଥିଲେ । ଏହାର ଭିଡିଓ ଭାଇରାଲ ହେବାରେ ଲାଗିଛି । ତେବେ ଏ ବାବଦରେ ନୂଆଗାଁ ବିଡିଓ ପ୍ରମୋଦ କୁମାର ନାୟକଙ୍କୁ ପଚାରିବାରେ ମୋ ପ୍ରକୋଷ୍ଠରେ ଗହଳି କରିବା ସହ ମୋ କଥାକୁ ନ ଶୁଣି ଅଭିଯୋଗକାରୀମାନେ ଅଯଥା ଯୁକ୍ତି କରିଥିଲେ । ସେହି ସମୟରେ ଜଣେ ଯୁବକ ମୋବାଇଲରେ ସୁଟିଂ କରୁଥିଲେ । ତାକୁ ବାରଣ କରିବା ପାଇଁ ମୁଁ ଚେୟାରରୁ ଉଠି ମୋବାଇଲକୁ ହାତ ବଢାଇଥିଲି । ସେହି ଦୃଶ୍ୟକୁ ମୋବାଇଲରେ ରେକଡିଂ କରି ଭାଇରାଲ କରାଯାଇଛି ବୋଲି ସେ କହିଛନ୍ତି ।