ଧର୍ମଶାଳା,୨୧ା୪(ଡି.ଏନ.ଏ.): ପ୍ରଚଣ୍ଡ ରୌଦ୍ରତାପ ସାଙ୍ଗକୁ ଅସହ୍ୟ ଗୁଳୁଗୁଳିରେ ଲୋକେ ଆଉଟୁପାଉଟୁ ହେଉଛନ୍ତି। ବିଶେଷ କରି ଧର୍ମଶାଳା ବ୍ଲକର ପାହାଡିଆ ଅଞ୍ଚଳରେ ପୂର୍ବାହ୍ନ ୧୦ଟା ପରେ ଘରୁ ବାହାରିବା କଷ୍ଟକର ହୋଇପଡୁଛି। ଏଭଳି ଅବସ୍ଥାରେ ଦିନ ମଜୁରିଆମାନେ ବିଷେଶ ଭାବେ ହଇରାଣ ହରକାତ ହେଉଛନ୍ତି। ବିଗତ ସପ୍ତାହେ ହେଲା ଏଭଳି ଅସହ୍ୟ ତାତି ଲାଗିରହିଥିବାବେଳେ ବିଜୁଳିର ଲୁଚକାଳି ଖେଳ ଗୁଳୁଗୁଳିକୁ ଦ୍ୱିଗୁଣିତ କରିଛି। ପୂର୍ବାହ୍ନ ୧୧ଟା ବାଜିଲେ ଦୋକନା ବଜାର ବନ୍ଦ ହେଇଯାଉଛି। ସେହିପରି ତାତି ଯୋଗୁ ଜଳପତନ ହ୍ରାସ ପାଇବାରୁ ଅନେକ ସ୍ଥାନରେ ନଳକୂପରେ ପାଣି ବାହାରୁ ନ ଥିବା ଦେଖିବାକୁ ମିଳୁଛି। ପାଣି ମୁନ୍ଦାଏ ପାଇଁ ଲୋକେ ଡହଳବିକଳ ହେଉଛନ୍ତି। ବିଭିନ୍ନ ଛକ ବଜାରରେ ଜଳଛତ୍ର ଖୋଲାଯାଇଥିଲେ ହେଁ ପୂର୍ବାହ୍ନ ୧୧ଟା ପରେ ବଜାର ଓ ଛକଗୁଡିକ ଶୂନଶାନ ହୋଇପଡୁଥିବାରୁ ଜଳଛତ୍ରଗୁଡିକୁ ବନ୍ଦ ରଖାଯାଉଥିବା ଦେଖିବାକୁ ମିଳୁଛି। ଆଗକୁ ଏଭଳି ତାତି ଜାରି ରହିଲେ ଅନେକ ଲୋକ ଅଂଶୁଘାତର ଶିକାର ହେବା ସମ୍ଭାବନା ରହିଛି। ଏଥିପ୍ରତି ବ୍ଲକ ପ୍ରଶାସନ ଓ ମେଡିକାଲ ଟିମ ସଜାଗ ରହିବାକୁ ସାଧାରଣରେ ଦାବି ହୋଇଛି।