ଅନୁଗୋଳ ଅଫିସ,୨୭ା୫:ଗ୍ୟାସ୍ ଦୁର୍ଘଟଣାରେ ମା’ ବାପା ଚାଲିଗଲା ପରେ ଅସହାୟ ହୋଇପଡ଼ିଛନ୍ତି ୨ ପିଲା। ପ୍ରଶାସନ ପକ୍ଷରୁ କିଛି ସହାୟତା ମିଳୁଥିଲେ ମଧ୍ୟ ଗ୍ୟାସ୍ ଏଜେନ୍ସି ବୀମା ଅର୍ଥ ପ୍ରଦାନ କରୁନାହିଁ। ଫଳରେ ୨ ପିଲାଙ୍କ ଭବିଷ୍ୟତ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ତେଣୁ ୨ ନାତୁଣୀଙ୍କୁ ଧରି ଜେଜେ ଉଦୟନାଥ ସାହୁ ଶୁକ୍ରବାର ଅନୁଗୋଳ ଜିଲା ପ୍ରଶାସନର ଦ୍ୱାରସ୍ଥ ହୋଇ ନ୍ୟାୟ ଭିକ୍ଷା କରିଛନ୍ତି।
ଉଦୟନାଥ କହିଛନ୍ତି, କଟକ ଜିଲା ଆଠଗଡ଼ ନୂଆପାଟଣାରୁ ତାଙ୍କ ପରିବାର ଅନୁଗୋଳକୁ ଚାଲି ଆସିଥିଲେ। ପୁଅ ବିଭୂତି ଭୂଷଣ ସାହୁ ଗହଣା କାରିଗର ଥିଲେ। ଭଲ ରୋଜଗାର ଆଶା ନେଇ ପୁଅ ବୋହୂ ସସ୍ମିତା ପୃଷ୍ଟି(୩୨), ନାତୁଣୀ ପ୍ରିୟଦର୍ଶନୀ ସାହୁ(୧୨) ଓ ପ୍ରିୟମ୍ବଦା ସାହୁ(୫)ଙ୍କୁ ନେଇ ଅନୁଗୋଳ ସଦର ଥାନା ବାରସିଂହା ଅଞ୍ଚଳକୁ ଆସିବା ସହ ଏଠାରେ ଘର କରି ରହିଥିଲେ। ହେଲେ ୨୦୨୧ ନଭେମ୍ବର ୫ ତାରିଖରେ ବୋହୂ ସସ୍ମିତା ସକାଳେ ଉପମା ପ୍ରସ୍ତୁତ କରୁଥିବା ବେଳେ ଗ୍ୟାସ୍ ଲିକ୍ ଯୋଗୁ ଟାଙ୍କି ଫାଟିଯାଇଥିଲା। ଫଳରେ ବୋହୂ ସହ ପୁଅଙ୍କ ମୃତ୍ୟୁ ହୋଇଯାଇଥିଲା। ସେବେଠାରୁ ୨ ପିଲାଙ୍କ ଦାୟିତ୍ୱ ତାଙ୍କ ଉପରେ ରହିଛି। କିନ୍ତୁ ବୟସ ଅଧିକ ହୋଇଯାଇଥିବାରୁ ପିଲାଙ୍କ ଭବିଷ୍ୟତ ଚିନ୍ତା ଘାରୁଛି। ଦୁର୍ଘଟଣା ପରେ ଜିଲା ପ୍ରଶାସନ ପିଲାମାନଙ୍କ ପାଇଁ ୩୫ କିଲୋଗ୍ରାମ ଲେଖାଏଁ ଚାଉଳ ଦେବା ସହ ପାଠପଢ଼ା ଖର୍ଚ୍ଚ ବହନ କରୁଛି। କିନ୍ତୁ ନାତୁଣୀମାନଙ୍କ ଭବିଷ୍ୟତ କ’ଣ ହେବ ତାହାକୁ ନେଇ ସେ ଦ୍ୱନ୍ଦରେ ପଡ଼ିଛନ୍ତି। ବୀମା ରାଶି ପାଇଁ ବାରମ୍ବାର ଗ୍ୟାସ ଏଜେନ୍ସିର ଦ୍ୱାରସ୍ଥ ହୋଇଥିଲେ ହେଁ କେହି ଧରାଛୁଆଁ ଦେଉନାହାନ୍ତି। ତେଣୁ ଜିଲା ପ୍ରଶାସନ ହସ୍ତକ୍ଷେପ କରିବାକୁ ଉଦୟନାଥ ଅନୁରୋଧ କରିଛନ୍ତି। ଏ ନେଇ ଜିଲାପାଳ ସିଦ୍ଧାର୍ଥ ଶଙ୍କର ସ୍ବାଇଁ କହିଛନ୍ତି, ଏହି ଘଟଣା ନଜରକୁ ଆସିବା ପରେ ତୁରନ୍ତ ୨ ପିଲାଙ୍କ ଖାଦ୍ୟ ଓ ପାଠପଢ଼ା ପାଇଁ ବ୍ୟବସ୍ଥା କରାଯାଇଥିଲା। ଗ୍ୟାସ ଏଜେନ୍ସିକୁ ଡକାଯାଇ ଖୁବ୍ଶୀଘ୍ର ଆଲୋଚନ କରାଯିବ। ପିଲାଙ୍କ ସୁରକ୍ଷିତ ଭବିଷ୍ୟତ ସମ୍ପର୍କରେ ଆଲୋଚନା କରାଯିବ।
