ଚାମରାଜନଗର, ୬ା୩ : କର୍ନାଟକର ଚାମରାଜନଗର ଜିଲାରେ ଭିନ୍ନ ଜାତିରେ ବିବାହ କରିଥିବା ଦମ୍ପତିଙ୍କ ଉପରେ ୬ ଲକ୍ଷ ଟଙ୍କା ଜରିମାନା ଲଗାଯିବା ସହ ସେମାନଙ୍କୁ ଗ୍ରାମରୁ ବାସନ୍ଦ କରାଯାଇଛି। ଜିଲାର କୋଲେଗାଲ ତାଲୁକ୍ ଅନ୍ତର୍ଗତ କୁନାଗାଲ୍ଲି ଗ୍ରାମରେ ଏହି ଘଟଣା ଘଟିଛି। ଉକ୍ତ ଦମ୍ପତି ୫ ବର୍ଷ ପୂର୍ବେ ବିବାହ କରିଥିଲେ। ତେବେ ସେମାନେ ଭିନ୍ନ ଜାତିର ବୋଲି ଗ୍ରାମବାସୀ ନିକଟରେ ଜାଣିବାକୁ ପାଇଥିଲେ। ଗ୍ରାମବାସୀ ସେମାନଙ୍କୁ ୬ ଲକ୍ଷ ଟଙ୍କା ଜରିମାନା ଦେବା ପାଇଁ କହିବା ସହ ଗଁାରୁ ବାସନ୍ଦ କରିଥିଲେ।
ଏନେଇ ଉକ୍ତ ଦମ୍ପତି ମାର୍ଚ୍ଚ ୧ରେ କୋଲେଗାଲ ଥାନାରେ ଏତଲା ଦେଇଛନ୍ତି। ଅଭିଯୋଗ ଅନୁଯାୟୀ ଗୋବିନ୍ଦାରାଜୁ ଉପର ସେଟ୍ଟୀ ସମ୍ପ୍ରଦାୟର ହୋଇଥିବାବେଳେ ସେ ଦଳିତ ସମ୍ପ୍ରଦାୟର ଝିଅ ଶ୍ୱେତାଙ୍କ ପ୍ରେମରେ ପଡ଼ି ତାଙ୍କୁ ସବ୍ରେଜିଷ୍ଟ୍ରାର ଅଫିସ୍ରେ ବିବାହ କରିଥିଲେ। ଏଥିରେ ଉଭୟ ପରିବାରର ସମ୍ମତି ଥିଲା। ଗୋବିନ୍ଦାରାଜୁ ବାହାରେ ରହୁଥିବାବେଳେ ମଝିରେ ମଝିରେ ମାଆବାପାଙ୍କୁ ଦେଖିବା ପାଇଁ ଗାଁକୁ ଆସୁଥିଲେ। ଗତ ମାସରେ ଗାଁକୁ ଆସିଥିବାବେଳେ ଶ୍ୱେତା ଦଳିତ ବୋଲି ଜଣେ ପଡୋଶୀଙ୍କୁ କହିଦେଇଥିଲେ। କଥା ଗାଁ ମୁଖିଆଙ୍କ ପାଖରେ ପହଞ୍ଚତ୍ବା ପରେ ଗତମାସ ୨୩ରେ ବୈଠକ ବସି ଉଭୟଙ୍କ ମାଆବାପାଙ୍କୁ ଡାକିଥିଲେ। ସେମାନଙ୍କ ଉପରେ ୩ ଲକ୍ଷ ଟଙ୍କା ଲେଖାଏ ଜରିମାନା ଧାର୍ଯ୍ୟ ହେବା ସହ ମାର୍ଚ୍ଚ ୧ ସୁଦ୍ଧା ପୈଠ କରିବାକୁ ନିର୍ଦ୍ଦେଶ ଦିଆଯାଇଥିଲା।