ବଇଣ୍ଡା,୩ା୧୧ (ପରିକ୍ଷିତ ସାହୁ): ରୋଜଗାରକ୍ଷମ ହେବେ ଗଁା ମହିଳା। ସ୍ବାବଲମ୍ବୀ ହେବା ସହ ପରିବାର ପ୍ରତିପୋଷଣରେ ସେମାନେ ସହାୟକ ହୋଇପାରିବେ। ଏଥିପାଇଁ ସରକାରଙ୍କ ପକ୍ଷରୁ କରାଯାଉଛି ନୂଆ ନୂଆ ଯୋଜନା। ସ୍ବୟଂ ସହାୟକ ଗୋଷ୍ଠୀ (ଏସ୍ଏଚ୍ଜି)କୁ ଯୋଗାଇ ଦିଆଯାଉଛି ସହାୟତା ଓ ସହଯୋଗ। ଆବଶ୍ୟକସ୍ଥଳେ ପ୍ରଶିକ୍ଷଣ ମଧ୍ୟ ପ୍ରଦାନ କରାଯାଉଛି। ଫଳରେ ଅଧିକ ଆୟ ପାଇଁ ମହିଳାମାନେ ବିଭିନ୍ନ ପ୍ରକାର ବ୍ୟବସାୟ, ଚାଷ ଉପରେ ଗୁରୁତ୍ୱ ଦେଉଛନ୍ତି। ଅନୁଗୋଳ ଜିଲା କିଶୋରନଗର ବ୍ଲକର କେତୋଟି ଏସ୍ଏଚ୍ଜିର ସଦସ୍ୟା ଏବେ ମହୁ ଚାଷ ପ୍ରତି ଆଗ୍ରହୀ ହୋଇଛନ୍ତି। ସେମାନଙ୍କ ଏହି ଆଗ୍ରହ ହିଁ ଆଗାମୀ ଦିନରେ ମହୁ ଚାଷକୁ ଏଠାରେ ଅଗ୍ରଗତି ଦେବ ବୋଲି ଏସ୍ଏଚ୍ଜି ସଦସ୍ୟାମାନେ ମତ ଦେଇଛନ୍ତି।
କିଶୋରନଗର ବ୍ଲକ ଲୁହାମୁଣ୍ଡା ପଞ୍ଚାୟତ କ୍ଷେତ୍ରପାଳ ଗ୍ରାମର ବିଭିନ୍ନ ସ୍ବୟଂ ସହାୟକ ଗୋଷ୍ଠୀର ୩୦ ମହିଳା ଏହି ମହୁଚାଷ ଆରମ୍ଭ କରିଛନ୍ତି। ଏଥିପାଇଁ ସେମାନଙ୍କୁ ନୂଆଦିଲ୍ଲୀସ୍ଥିତ ନେଦରଲାଣ୍ଡ ଦୂତାବାସ, ନାବାର୍ଡ ଭୁବନେଶ୍ୱର ଏବଂ ଓଡ଼ିଶା ଜୀବିକା ମିଶନ ପକ୍ଷରୁ ସହଯୋଗ କରାଯାଇଛି। ବିନା ମୂଲ୍ୟରେ ମହୁ ମାଛି ଓ ବାକ୍ସ ଯୋଗାଇ ଦିଆଯାଇଛି। ବିଶ୍ୱ ଯୁବକେନ୍ଦ୍ର ବାଣିନାଳି ପକ୍ଷରୁ ୧୨ ଦିନିଆ ପ୍ରଶିକ୍ଷଣ ପ୍ରଦାନ କରାଯାଇଛି। ପ୍ରତି ମହିଳାଙ୍କୁ ୫ଟି ଲେଖାଏ ମହୁବାକ୍ସ ଦେବାକୁ ସ୍ଥିର କରାଯାଇଥିବା ବେଳେ ଏବେ ସୁଦ୍ଧା ମୋଟ ୮୨ଟି ମହୁବାକ୍ସ ସେମାନେ ନିଜ ନିଜ ବାଡ଼ିରେ ରଖି ଚାଷ ଆରମ୍ଭ କରିଛନ୍ତି। ଗୋଟିଏ ମହୁବାକ୍ସରୁ ବର୍ଷକୁ ୩ ଥର ମହୁ ଉତ୍ପାଦନ କରାଯିବାର ଯୋଜନା ରହିଛି। ଏପରି କି ପ୍ରତି ବାକ୍ସରୁ ବର୍ଷକୁ ୩ ହଜାର ଟଙ୍କାର ମହୁ ସଂଗ୍ରହ ହେବ ବୋଲି ଓଡ଼ିଶା ଜୀବିକା ମିଶନ ପକ୍ଷରୁ କୁହାଯାଇଛି। ଥରକୁ ୨ କେ.ଜି. ଉତ୍ପାଦନ କରିବାକୁ ଲକ୍ଷ୍ୟ ରଖାଯାଇଥିବା ବେଳେ ତାହାକୁ ଆଦର୍ଶ କୃଷି ଉତ୍ପାଦନ କମ୍ପାନୀ କିଣି ବଜ଼ାରରେ ବିକ୍ରି କରିବ। ଏଥିଯୋଗୁ ପ୍ରତି ମହିଳା ଚାଷୀ ବର୍ଷକୁ ୧୫ ହଜାର ଟଙ୍କା ରୋଜଗାର କରିପାରିବେ। ଆଗାମୀ ଦିନରେ ଏହି ମହୁ ଚାଷ ବ୍ଲକର କଣ୍ଟେଇକୋଳିଆ, ଜାମୁନାଳୀ ପଞ୍ଚାୟତର ମହିଳାମାନଙ୍କ ଦ୍ୱାରା କରାଯିବାକୁ ଯୋଜନା ପ୍ରସ୍ତୁତ ହୋଇଥିବା ଜଣାପଡିଛି।
