କୋକସରା,୨୨/୦୫(ଡି.ଏନ.ଏ): ଗରିବ ସୀମାରେଖା ତଳେ ରହୁଥିବା ହିତାଧିକାରୀଙ୍କ ପାଇଁ କେନ୍ଦ୍ର ଓ ରାଜ୍ୟ ସରକାର ବିଭିନ୍ନ ଯୋଜନାରେ ପିଡିଏସ ଚାଉଳ ଯୋଗାଣ କରୁଥିବା ବେଳେ ଗରିବଙ୍କ ପେଟକୁ ମାରି ଚାଉଳ ବାଟମାରଣା ହେଉଥିବା ଅଭିଯୋଗ ଆସିଛି । କଳାହାଣ୍ଡି ଜିଲା କୋକସରା ଗ୍ରାମ ପଞ୍ଚାୟତରେ ସୋମବାର ପିଡ଼ିଏସ ଚାଉଳ ବଣ୍ଟନ ସମୟରେ ହିତାଧିକାରୀ ମାନେ ଚାଉଳ ଓଜନ କରିବାରୁ ୫୦ କେଜି ଚାଉଳ ବଦଳରେ କିଛି ବସ୍ତାରେ ୪୪ କେଜି ତ କିଛି ବସ୍ତାରେ ୪୬ କେଜି ଚାଉଳ ରହିଥିବା ଦେଖିବାକୁ ମିଳିଛି। ଯାହାକୁ ନେଇ ହିତାଧିକାରୀଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି। କୋକସରା ଏଫ ସି ଆଇ ଚାଉଳ ଗୋଦାମରୁ କୋକସରା ବ୍ଲକର ୨୨ ପଞ୍ଚାୟତ ଗୋଦାମକୁ ଚାଉଳ ପରିବହନ ପାଇଁ ଜଣେ ଠିକାଦାର ରହିଛନ୍ତି। ତେବେ ପଞ୍ଚାୟତକୁ ଚାଉଳ ଆସିବା ବାଟରେ କିଏ ଚାଉଳ ବାଟମାରଣା କରୁଛି ତାହା ସନ୍ଦେହ ଘେରରେ ରହିଥିବା ବେଳେ ବାଟମାରଣା ପଛରେ ପରିବହନ ଠିକାଦାର ନା ପଞ୍ଚାୟତ କର୍ମଚାରୀଙ୍କ ହାତ ରହିଛି ତାହାକୁ ନେଇ ତଦନ୍ତ କରିବାକୁ ଦାବି କରିଛନ୍ତି। ପଞ୍ଚାୟତର ୬ ନମ୍ବର ୱାର୍ଡ଼ ସଭ୍ୟ ଗୁଣନିଧି ବାଗ, ବନମାଳୀ ପ୍ରଧାନୀ, ପ୍ରତାପ ପ୍ରଧାନୀ, ରୂପଧର ନାଗ, ନାରାୟଣ ଶର୍ମା ସମେତ ଅନେକ ହିତାଧିକାରୀ ମାନେ ଅଭିଯୋଗ କରିଛନ୍ତି। ହିତାଧିକାରୀମାନେ ଏନେଇ କୋକସରା ସରପଞ୍ଚ କିଶୋର ଚନ୍ଦ୍ର ପ୍ରଧାନୀଙ୍କୁ ମଧ୍ୟ ଅଭିଯୋଗ କରିଛନ୍ତି। ପୂର୍ବରୁ ମଧ୍ୟ ଅନୁରୂପ ଘଟଣା ଡ଼ହଗାଁ ପଞ୍ଚାୟତରୁ ଅଭିଯୋଗ ହୋଇଥିଲା। ଘଟଣା ସମ୍ପର୍କରେ କୋକସରା ଯୋଗାଣ ବିଭାଗ ଅଧିକାରୀ ଜଗାରାମ ମୁର୍ମୁଙ୍କ ପ୍ରତିକ୍ରିୟା ନେବାରୁ ଘଟଣା ସମ୍ପର୍କରେ ତଦନ୍ତ କରାଯିବ ବୋଲି କହିଛନ୍ତି।