ଭୁବନେଶ୍ୱର,୨୩।୫: ପ୍ରତିବର୍ଷ ଭଳି ଚଳିତବର୍ଷ ମଧ୍ୟ ଅନ୍ତର୍ଜାତୀୟ କ୍ଲିନିକାଲ ଟ୍ରାଏଲ୍ ଡେ (ଦିବସ) ନିକଟରେ ପାଳିତ ହୋଇଯାଇଛି। ଏହି ପରିପ୍ରେକ୍ଷୀରେ ଭୁବନେଶ୍ୱରର ପଟିଆସ୍ଥିତ ଏକ ଘରୋଇ ହୋଟେଲରେ ସିଆର୍ଓ ଫାର୍ମାଟ୍ରେଣ୍ଡଜର ପୃଷ୍ଠପୋଷକତାରେ ଏକ ଦିନିକିଆ କର୍ମଶାଳା ଓ ସମ୍ମିଳନୀ ସଭା ଆୟୋଜିତ ହୋଇଥିଲା। ଏହି କାର୍ଯ୍ୟକ୍ରମଟି ବିଶ୍ୱବ୍ୟାପୀ କ୍ଲିନିକାଲ ରିସର୍ଚ୍ଚ ବିଶେଷଜ୍ଞମାନଙ୍କ ଅକ୍ଲାନ୍ତ ଅବଦାନ ତଥା ନିରନ୍ତର ଉତ୍ସର୍ଗୀକୃତ ଉତ୍ସବକୁ ସମ୍ମାନିତ କରିବା ପାଇଁ ଉଦ୍ଦିଷ୍ଟ ଥିଲା ବୋଲି ଆୟୋଜକଙ୍କ ପକ୍ଷରୁ ବିସ୍ତୃତ ଭାବେ ଉଲ୍ଲେଖ କରାଯାଇଥିଲା। ଏହି ସମ୍ମିଳନୀରେ ଫାର୍ମାସ୍ୟୁଟିକାଲ୍ସ, ବାୟୋଟେକ୍, କ୍ଲିନିକାଲ୍ ରିସର୍ଚ୍ଚ ସଙ୍ଗଠନ, କ୍ଲିନିକାଲ ବିଶେଷଜ୍ଞ ଏବଂ ଅନ୍ୟାନ୍ୟ ସ୍ବାସ୍ଥ୍ୟସେବା ପ୍ରଦାନକାରୀ କମ୍ପାନୀର ବ୍ୟକ୍ତିବିଶେଷମାନେ ଯୋଗଦେଇଥିଲେ। ଏହି ସମ୍ମିଳନୀରେ ଡା. ସରୋଜ କୁମାର ଦାସମଜୁମଦାର, ପ୍ରଫେସର ତଥା ମୁଖ୍ୟ, ରେଡିଏସନ୍ ଅଙ୍କୋଲୋଜି ବିଭାଗ, ଏଆଇଏମ୍ଏସ୍ ଭୁବନେଶ୍ୱର, ଡା. ଅମୃତ ପାଟଜୋଷୀ, ପ୍ରଫେସର ତଥା ମୁଖ୍ୟ, ସାଇକିଆଟ୍ରିକ୍ ବିଭାଗ, ହାଇଟେକ୍ ମେଡିକାଲ କଲେଜ ଏବଂ ହସ୍ପିଟାଲ, କମ୍ୟୁନିଟି ମେଡିସିନ୍, ହାଇଟେକ୍ ମେଡିକାଲ କଲେଜ ଏବଂ ହସ୍ପିଟାଲର ପ୍ରଫେସର ଡା. ଲିସା ଷଡ଼ଙ୍ଗୀ, ସ୍ନାୟୁବିଜ୍ଞାନ ବିଭାଗର ପ୍ରଫେସର ଡା. ସୂର୍ଯ୍ୟପ୍ରକାଶ ଏସ୍. ଚୌଧୁରୀ, ଡା.ନିବେଦିତା ଜେନା, ସିଓଓ ଏବଂ ହେଡ୍, ଡିବିଟି-ଆଇଏଲ୍ଏସ୍, ଇନ୍ଷ୍ଟିଚ୍ୟୁଟ୍ ଅଫ୍ ଲାଇଫ୍ ସାଇନ୍ସେସ୍, ଭୁବନେଶ୍ୱର ପ୍ରମୁଖ ନିଜ ନିଜର ବହୁ ମୂଲ୍ୟ ବକ୍ତବ୍ୟ ପ୍ରଦାନ କରିଥିଲେ। ସେହିଭଳି ସିଆର୍ଓ ଫାର୍ମାଟ୍ରେଣ୍ଡଜର ପ୍ରତିଷ୍ଠାତା ଏବଂ ଡାଇରେକ୍ଟର ଡା. ସାଇପ୍ରସନ୍ନା ବେହେରା ଏବଂ ବରିଷ୍ଠ ପରାମର୍ଶଦାତା ସୁଦୀପ କୁମାର ପାତ୍ର କହିଥିଲେ, ସିଆର୍ଓ ଫାର୍ମାଟ୍ରେଣ୍ଡଜ କ୍ଲିନିକାଲ୍ ରିସର୍ଚ୍ଚ କ୍ଷେତ୍ରରେ ଉନ୍ନତି ଏବଂ ଅଗ୍ରଗତି ପାଇଁ ସର୍ବଦା ପ୍ରତିଶ୍ରୁତିବଦ୍ଧ। ଏପରିକି ଆଗାମୀ ଦିନରେ ଓଡ଼ିଶା ସହ ସମଗ୍ର ଭାରତବର୍ଷରେ ମଧ୍ୟ ଏହାକୁ କିପରି ଆଗକୁ ନେଇ ହେବ,ସେଥିପାଇଁ ସିଆର୍ଓ ଫାର୍ମାଟ୍ରେଣ୍ଡଜ ସବୁବେଳେ କାର୍ଯ୍ୟ କରି ଚାଲିଛି।