କଟକ ଅଫିସ,୮ା୮-
ପଶ୍ଚିମବଙ୍ଗର ସିଲିଗୁଡ଼ିସ୍ଥିତ ଚଙ୍ଗମୁକ୍ୱାନ୍ ଟାଏକୋଣ୍ଡୋ ଏକାଡେମୀ ଅଫ ଇଣ୍ଡିଆ ପକ୍ଷରୁ ଅନ୍ତର୍ଜାତୀୟ ଅନ୍ଲାଇନ୍ ଟାଏକୋଣ୍ଡୋ ପ୍ରତିଯୋଗିତା ଅନୁଷ୍ଠିତ ହୋଇଯାଇଛି। ଏହାର ସିନିୟର ବର୍ଗରେ କଟକର କବିତା ଜେନା ଓ ଆକାଂକ୍ଷା ଜୟସ୍ବାଲ ଯଥାକ୍ରମେ ରୌପ୍ୟ ଓ ବ୍ରୋଞ୍ଜ ପଦକ ବିଜୟୀ ହୋଇଛନ୍ତି। ପ୍ରତିଯୋଗିତାରେ ଭାରତ ସମେତ ୨୩ଟି ଦେଶର ପ୍ରତିଯୋଗୀ ଅଂଶ ଗ୍ରହଣ କରିଥିଲେ। ଆୟୋଜକ ଅନୁଷ୍ଠାନର ମୁଖ୍ୟ ଡ. ପିନାକୀ ନାରାୟଣ ମୋଇତ୍ରାଙ୍କ ତତ୍ତ୍ୱାବଧାନରେ ଏହି ପ୍ରତିଯୋଗିତା ଅନୁଷ୍ଠିତ ହୋଇଥିଲା। କଟକର ଡିଡି ଏକାଡେମୀ ଅଫ୍ ମାର୍ଶାଲ ଆର୍ଟ ପକ୍ଷରୁ ୬ ଜଣ ପ୍ରତିଯୋଗୀ ପ୍ରଶିକ୍ଷକ ଦେବାଶିଷ ଦତ୍ତଙ୍କ ତତ୍ତ୍ୱାବଧାନରେ ଭାଗ ନେଇଥିଲେ। ପ୍ରତିଯୋଗୀମାନେ ହେଲେ କବିତା ଜେନା, ଆକାଂକ୍ଷା ଜୟସ୍ବାଲ, ସିଦ୍ଧି ଶର୍ମା, ଦିପ୍ୟାନ୍ ଚକ୍ରବର୍ତ୍ତୀ, ଅଭିଷେକ ସ୍ବାଇଁ ଓ ସୁହାନି ବାଲି। ଏହି ସଫଳତା ପାଇଁ ପ୍ରଶିକ୍ଷକ ଦତ୍ତଙ୍କୁ ପ୍ରଶଂସାପତ୍ର, କୃତି ପ୍ରତିଯୋଗୀଙ୍କ ସମେତ ସମସ୍ତ ପ୍ରତିଯୋଗୀଙ୍କୁ ପ୍ରମାଣପତ୍ର ପ୍ରଦାନ କରାଯାଇଛି। ଦୋଳମୁଣ୍ଡାଇସ୍ଥିତ ଅନୁଷ୍ଠାନର କାର୍ଯ୍ୟାଳୟରେ ପ୍ରତିଯୋଗୀମାନଙ୍କୁ ଶୁକ୍ରବାର ସମ୍ବର୍ଦ୍ଧିତ କରାଯାଇଛି। ଏକାଡେମୀର ସଦସ୍ୟ ମହାବୀର ପ୍ରସାଦ ଜୟସ୍ବାଲ, ପିଙ୍ଗୋଳା ଦତ୍ତ, ଜ୍ୟୋତ୍ସ୍ନା ଦତ୍ତ ପ୍ରମୁଖ ଉପସ୍ଥିତ ଥିଲେ।