ଫୁଲବାଣୀ ଅଫିସ, ୧୧ା୮: କନ୍ଧମାଳ ଜିଲା ଫୁଲବାଣୀ ବ୍ଲକରେ ବିଏସ୍ଏନ୍ଏଲ ନେଟର୍ୱାକ ଠିକ୍ ଭାବେ କାମ କରୁନାହିଁ । କଟ୍ରିଙ୍ଗିଅିା ଛକରେ ଥିବା କଷ୍ଟମର ସର୍ଭିସ ପଏଣ୍ଟ (ସିଏସ୍ପି)ରେ ଆଜକୁ ଦେଢ଼ ମାସ ହେଲା ଇଣ୍ଟରନେଟ ସର୍ଭିସ ନାହିଁ । ଫଳରେ ଟଙ୍କା ଉଠାଣ ପାଇଁ ଆସୁଥିବା ଗ୍ରାହକମାନେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି । ସ୍ଥାନୀୟ ଅଞ୍ଚଳରେ ଏ ନେଇ ଅସନ୍ତୋଷ ପ୍ରକାଶ ପାଇଛି । ଅପରପକ୍ଷେ ବିଏସ୍ଏନ୍ଏଲ କର୍ତ୍ତୃପକ୍ଷଙ୍କୁ ବାରମ୍ବାର ଅଭିଯୋଗ କଲେ ମଧ୍ୟ ସ୍ଥିତିରେ ସୁଧାର ଆସୁନାହିଁ । ଏମ୍ଜିଏନ୍ଆରଇଜିଏସ୍, ଭତ୍ତା, ପାସ୍ ବୁକ୍ରେ ଥିବା ଗଚ୍ଛିତ ଟଙ୍କା ଉଠାଇବା ଲାଗି ଦିନକୁ ପ୍ରାୟ ୧୫୦ରୁ ଊର୍ଦ୍ଧ୍ୱ ଗ୍ରାହକ ଆସିଥାନ୍ତି । କିନ୍ତୁ ନେଟୱାର୍କ ସମସ୍ୟା ଯୋଗୁ ଟଙ୍କା ଉଠାଣ ହୋଇ ପାରୁନାହିଁ । ପାଲଚି, କାଣିବାଲି, ଡୁଣ୍ଡୁକି, ଗାଡିପଦର, ନେଡିପଙ୍ଗା, କିଲୁପଙ୍ଗା, ସ୍ରାକି, ଗୁମିଗାଁ ଆଦି ଅନେକ ଗ୍ରାମର ଲୋକେ ଏହି ସିଏସ୍ପି ଉପରେ ନିର୍ଭରଶୀଳ । ଏହି ସମସ୍ୟା ନେଇ କେତେକ ଗରିବ ଲୋକ ପ୍ରତିକ୍ରିୟା ପ୍ରକାଶ କରିଛନ୍ତି।
ମୁଁ ଏମ୍ଜିଏନ୍ଆରଇଜିଏସରେ କାମ କରିଥିଲି । ମାସେ ହେଲା ଟଙ୍କା ଉଠାଇବା ପାଇଁ ଏଠାକୁ ଆସୁଛି । ହେଲେ ଟଙ୍କା ମିଳୁନାହିଁ । କହୁଛନ୍ତି ନେଟୱାର୍କ ନାହିଁ । ଆମେ ଗାଉଁଲି ଲୋକ । ଏକଥା କିଛି ବୁଝି ପାରୁନୁ । ଘର ଚଳିବା ଲାଗି ଟଙ୍କା ଦରକାରା କିନ୍ତୁ ମିଳୁନାହିଁ ବୋଲି ଗୁମି ଗାଁର ତାରିଣୀ ବିନ୍ଧାଣୀ କହିଛନ୍ତି । ନେଡିପଙ୍ଗା ଗ୍ରାମର ପ୍ରମିଳା କହଁର ଜଣେ ପକ୍ଷାଘାତ ରୋଗୀ । ସେ ବହୁ କଷ୍ଟରେ ଆସି ଟଙ୍କା ପାଇ ପାରୁ ନାହାନ୍ତି। ନିଜ ଔଷଧ କିପରି କିଣିବେ ସେ ନେଇ ଚିନ୍ତାରେ ଅଛନ୍ତି। ସେହିପରି ସ୍ରାକି ଗ୍ରାମର ମୁଲାବତୀ କହଁରଙ୍କ ସମେତ ଅନ୍ୟମାନେ ବହୁ ହଇରାଣ ହେଉଛନ୍ତି ।
ସିଏସ୍ପି କରିଥିବା ସୁରେନ୍ଦ୍ର ସାହୁ କୁହନ୍ତି, ଗତ ଜୁଲାଇ ୫ରୁ ଇଣ୍ଟଟରନେଟ ସେବା କାମ କରୁନାହିଁ । ଟଙ୍କା ଉଠାଣ କଲେ ଲୋକଙ୍କ ଆକାଉଣ୍ଟରୁ କଟିଯାଉଛି । ହେଲେ ମୋ ପାଖକୁ ଅବା ଆକାଉଣ୍ଟକୁ ଆସୁନାହିଁ । ଗ୍ରାହକମାନେ ଭାବୁଛନ୍ତି ଟଙ୍କା ମଁୁ ନେଇଗଲି । ନେଟୱାର୍କ ସମସ୍ୟା ଯୋଗୁ ଏପରି ହେଉଛି । ଏ ନେଇ ବିଏସ୍ଏନ୍ଏଲ କର୍ତ୍ତୃପକ୍ଷଙ୍କୁ ବାରମ୍ବାର ଜଣାଇଥିଲେ ମଧ୍ୟ ସେମାନେ କିଛି ପଦକ୍ଷେପ ନେଉ ନାହାନ୍ତି। ଏ ସମ୍ପର୍କରେ ବିଏସ୍ଏନ୍ଏଲ ଏଜିଏମ୍/ଟିଡିଇ ଶିବ ପ୍ରସାଦ ସାମନ୍ତରାୟଙ୍କୁ ପଚାରିବାରୁ ଆମର ଫାଇବର ଲାଇନ କଟିଯାଇଛିା ବର୍ଷା ଯୋଗୁ କେଉଁଠି ଅସୁବିଧା ହୋଇଛି ତାହା ଜଣା ପଡୁନାହିଁ । ଆଗାମୀ ଦୁଇ ଦିନ ମଧ୍ୟରେ ସବୁ ଠିକ୍ କରାଯିବ ଏବଂ ଗ୍ରାହକଙ୍କ ଅସୁବିଧା ଦୂର ହେବ ବୋଲି ପ୍ରକାଶ କରିଛନ୍ତି ।