କୋରପୁଟ,୨୯।୮(ଅମିତାଭ ବେହେରା ): ଗୁଗୁଲିରେ ବିଜ୍ଞାପନ ଦେଇ ଲକ୍ଷାଧିକ ଟଙ୍କା ଅନଲାଇନ ଠକେଇ କରୁଥିବା ୩ଜଣିଆ ଆନ୍ତ ରାଜ୍ୟ ଠକ ଦଳକୁ ଗିରଫ କରିଛି କୋରାପୁଟ ପୋଲିସ। ପୋଲିସ ଅଭିଯୁକ୍ତଙ୍କୁ ବିହାରରୁ ଗିରଫ କରିଛି। ମଙ୍ଗଳବାର ଥାନା ପରିସରରେ ଆୟୋଜିତ ଏକ ଖବରଦାତା ସମିଳନୀରେ ଏସ ଡି.ପି.ଓ ଶ୍ରାବଣୀ ନାୟକ ସୂଚନା ଦେଉଛନ୍ତି। ଶସ୍ତାରେ ସିମେଣ୍ଟ ଯୋଗାଇ ଦେବା ପାଇଁ କେତେଜଣ ଠକ ଗୁଗୁଲିରେ ବିଜ୍ଞାପନ ଦେଇଥିଲେ। ଏହି ବିଜ୍ଞାପନ ଦେଖି କୋରପୁଟ ସହରର ଜୈନିକ ବ୍ୟବସାୟୀ କଷ୍ଟମର କେୟାର ଏଜେଣ୍ଟଙ୍କ ୭୮୭୨୩୪୯୮୫୫ ନମ୍ବର ଫୋନ ଯୋଗେ ଯୋଗାଯୋଗ କରିଥିଲେ। ତେବେ ଏକ ଲକ୍ଷ ପଚାଶ ହଜାର ଟଙ୍କା ଅନଲାଇନରେ ଜମା କରିବାକୁ ଜଣାଇବା ପରେ ସମ୍ପୃକ୍ତ ବ୍ୟବସାୟୀ ଟଙ୍କା ପଠାଇ ଥିଲେ। କିଛିଦିନ ଧରି ସିମେଣ୍ଟ ନ ଆସିବାରୁ ବ୍ୟବସାୟୀ ଜଣଙ୍କ ଟାଉନ ଥାନାରେ ଗତ ଜୁନ ମାସ ୧୮ ତାରିଖ ଦିନ ଅଭିଯୋଗ କରିଥିଲେ। ଅଭିଯୋଗକୁ ଭିତ୍ତିକରି ଜିଲା ଆରକ୍ଷୀ ଅଧିକ୍ଷକ ଅନୁଭବ ସୋନକାରଙ୍କ ନିର୍ଦ୍ଦେଶ କ୍ରମେ ସାଇବର ଥାନାରେ ମାମଲା କରାଇ ତଦନ୍ତ କରାଯାଇଥିଲା। ତଦନ୍ତରେ ଜଣାପଡିଥିଲା କି, ଉକ୍ତ କଷ୍ଟମର କେୟାର ନମ୍ବରଟି ବିହାର ରାଜ୍ୟ ନଇଡା ଜିଲା, ୱାର୍ସଲ ଗଞ୍ଜ ଥାନା, ଚକପାଇ ଗ୍ରାମର। ତେବେ ଉକ୍ତ ଗ୍ରାମକୁ ଯିବା ପାଇଁ ଏସ ଆଇ ସିଦ୍ଧାନ୍ତ କୁମାର ବେହେରାଙ୍କ ନେତୃତ୍ୱରେ କନେଷ୍ଟ ବଳ ରାକେଶ ପାଳ, ଶୁଣିଲିକୁମାର ଦାସ ଏବଂ ସନପତି ଗଦବାଙ୍କୁ ନେଇ ଏକ ଚାରିଜଣିଆ ଦଳ ବିହାର ଗସ୍ତ କରିଥିଲେ। ସେଠାରୁ ଭୋଳା ପ୍ରସାଦ (୪୬)ଗୌରବ କୁମାର (୨୩) ଏବଂ ବିକାଶ କୁମାର (୨୩)ଙ୍କୁ ଗିରଫ କରିଥିଲେ। ସେମାନଙ୍କ ଠାରୁ ନଗଦ ଏକଲ ପଚାଶ ହଜାର ଟଙ୍କା, ଗୋଟିଏ ଲାପଟପ ଓ ୧୪ ଟି ମୋବାଇଲ ଫୋନ ଜବତ କରିଥିଲେ। ମଙ୍ଗଳବାର ତିନି ଜଣଙ୍କୁ କୋର୍ଟ ଚାଲାଣ କରାଯାଇଥିବା ଏସ ଡିପିଓ ପ୍ରକାଶ କରିଛନ୍ତି। ଏହି ଖବରଦାତା ସମ୍ମିଳନୀରେ ସାଇବର ଥାନା ଅଧିକାରୀ ଉପସ୍ଥିତ ଥିଲେ।