ଜଳେଶ୍ୱର,୨୦।୪(ଡି.ଏନ.ଏ.)-କୋଭିଡ୍-୧୯ ସଂକ୍ରମଣ ଦିନକୁ ଦିନ ଉତ୍କଟ ହେଉଥିବା ବେଳେ ସୋମବାରଠାରୁ ଆନ୍ତଃ ରାଜ୍ୟ ଯାନବାହନ ଚଳାଚଳ ଉପରେ ରାଜ୍ୟ ସରକାରଙ୍କ ପକ୍ଷରୁ ରୋକ ଲଗାଯାଇଛି। ଅନ୍ୟପକ୍ଷରେ ଉପାନ୍ତରେ ଥିବା ବହୁ ଗଳା ରାସ୍ତା ଦେଇ ଏହି ଯାନବାହନଗୁଡ଼ିକ ରାଜ୍ୟ ଭିତର ଓ ବାହାରକୁ ଯାତାୟାତ କରୁଥିବା ନଜରକୁ ଆସିଛି।
ରାଜ୍ୟର ଉତ୍ତର ଉପାନ୍ତ ୬୦ନଂ. ଜାତୀୟ ରାଜପଥ ବାଲେଶ୍ୱର ଜିଲାର ଜଳେଶ୍ୱର ବ୍ଲକ ଅଧୀନ ଲକ୍ଷ୍ମଣନାଥ ଟୋଲ ପ୍ଲାଜାଠାରେ ଆନ୍ତଃରାଜ୍ୟ ବସ୍ ଓ ଚାରିଚକିଆ ଯାନଗୁଡ଼ିକୁ ୧୮ ତାରିଖରୁ କଡ଼ାକଡ଼ି ଯାଞ୍ଚ କରାଯାଉଛି। ବାଲେଶ୍ୱର ଆରଟିଓ କର୍ମଚାରୀ ଓ ଜଳେଶ୍ୱର ପୋଲିସ୍ ସହାୟତାରେ ଏପରି ଯାଞ୍ଚ ପ୍ରକ୍ରିୟା ଚାଲିଥିବା ବେଳେ ଦଲାଲମାନେ ସକ୍ରିୟ ହୋଇ ଉଠିଛନ୍ତି। ଜଳେଶ୍ୱର-ସୁନାକଣିଆ ଓଟି ରୋଡ୍, ଜଳେଶ୍ୱର-ସୋଲପଟ୍ଟା, ଲକ୍ଷ୍ମଣନାଥରୋଡ଼- ଆମ୍ବଳିଅଠା, ସୋଲପଟା-ସୁଗୋ, ସୁଗୋ-ଧୋଇପଡ଼ା ମୁଖ୍ୟ ରାସ୍ତାଗୁଡ଼ିକ ଖୋଲାମେଲା ପଡ଼ିଛି। ଫଳରେ ସ୍ଥାନୀୟ ଅଞ୍ଚଳର ଦଲାଲମାନେ ଏସବୁ ଗଳା ରାସ୍ତାରେ ଲାଞ୍ଚ ନେଇ ଗାଡ଼ିଗୁଡିକୁ ରାଜ୍ୟ ଭିତର ଓ ବାହାରକୁ ଯାତାୟାତରେ ସହାୟତା କରୁଛନ୍ତି । ଫଳରେ ଟୋଲପ୍ଲାଜାରେ ରାଜସ୍ବ ହାନୀ ହେବା ସହିତ ପ୍ରବାସୀମାନେ ପଞ୍ଜିକରଣ ନ ହୋଇ ଅବାଧରେ ଯାତାୟତ କରିପାରୁଛନ୍ତି। ଗତବର୍ଷ ଏପରି ହୋଇଥିବାରୁ ରାଜ୍ୟରେ କରୋନା ପଜିଟିଭ୍ ସଂଖ୍ୟା ବୃଦ୍ଧି ପାଇଥିଲା । ଉପାନ୍ତରେ ସମସ୍ତ ରାସ୍ତାରେ ଯାଞ୍ଚ କଡ଼ାକଡ଼ି କରାଯିବାକୁ ଦାବି ହେଉଛି ।