ଉତ୍ତରପ୍ରଦେଶ ଆମେଠିର ଏକ ବିବାହ ନିକଟରେ ବେଶ୍ ଚର୍ଚ୍ଚାରେ ଥିଲା। ଏଠାରେ ଏକ ଦମ୍ପତି ୨୮ ବର୍ଷ ପର୍ଯ୍ୟନ୍ତ ବିନା ବିବାହରେ ଏକାଠି ରହିବା ପରେ ବିବାହ କରିଥିଲେ। ଏଥିରେ ତାଙ୍କ ଝିଅ, ନାତି ନାତୁଣୀ, ସମ୍ପର୍କୀୟ, ଗାଁ ଲୋକ ସମସ୍ତେ ବେଶ୍ ଖୁସିରେ ଯୋଗ ଦେଇଥିଲେ। ଆମେଠିର ଖୁଟହନା ଗ୍ରାମର ୬୫ ବର୍ଷୀୟ ମୋତିଲାଲ ୬୦ ବର୍ଷୀୟା ମୋହିନୀଙ୍କୁ ବିବାହ କରିଥିଲେ। ବିବାହ ପାଇଁ ମୋତିଲାଲ କାର୍ଡ ବି ଛପେଇଥିଲେ। ଭୋଜି ସହ ଢୋଲର ତାଳେ ତାଳେ ଜମେଇକି ନାଚଗୀତ ବି ହୋଇଥିଲା। ମୋତିଲାଲ ଓ ମୋହିନୀ ସାତଫେରା ନେଇ ତାଙ୍କ ସମ୍ପର୍କକୁ ଧାର୍ମିକ ମାନ୍ୟତା ଦେଇଥିଲେ। ମୋତିଲାଲ କହନ୍ତି, ୨୮ ବର୍ଷ ପୂର୍ବେ ମୋହିନୀଙ୍କୁ ମୁଁ ନେଇ ଚାଲି ଆସିଥିଲି। ଦୁହେଁ ଏକାଠି ସ୍ବାମୀ ସ୍ତ୍ରୀ ଭଳି ରହିଲୁ। ହେଲେ ବିବାହ କରି ନ ଥିଲୁ। ଏହା ଭିତରେ ପିଲା ବି ହେଲେ। ଆଉ ବିବାହ କଲୁନି। ପିଲାମାନେ ବଡ଼ ହେବା ସହ କାଳେ ସେମାନଙ୍କ ବିବାହରେ କିଛି ସମସ୍ୟା ଆସିବ ସେଥିପାଇଁ ଆମେ ବିବାହ ନ କରି ରହିଗଲୁ। ଝିଅଙ୍କ ବିବାହ ପରେ ଭାବିଲି ଏବେ ଆମ ସମ୍ପର୍କକୁ ଧାର୍ମିକ ମାନ୍ୟତା ଦେବାର ସମୟ ଆସିଯାଇଛି। ବିବାହ ସମ୍ପନ୍ନ କରାଇଥିବା ପଣ୍ଡିତ କହନ୍ତି, ବିନା ବିବାହରେ ଜନ୍ମ ହୋଇଥିବା ସନ୍ତାନ ମାତା ପିତାଙ୍କୁ ଶ୍ରାଦ୍ଧ ଓ ତର୍ପଣ ଦେଇପାରିବେ ନାହିଁ। ତେଣୁ ଦୁହେଁ ଏ ବୟସରେ ବିବାହ କରିବାକୁ ନିଷ୍ପତ୍ତି ନେଇଥିଲେ। ଆଉ ସମାଜ ତାଙ୍କ ସମ୍ପର୍କକୁ ସ୍ବୀକୃତି ଦେଇଥିବାରୁ ସେମାନେ ବେଶ୍ ଖୁସି।