ଭବାନୀପାଟଣା,୩।୪(ସ୍ବ.ପ୍ର.): କଳାହାଣ୍ଡି ଜିଲା ଜୁନାଗଡ ବ୍ଲକ ଚାରଭାଟି ପଞ୍ଚାୟତ କାଦୋପଦର ଗ୍ରାମର ଯୁଧିଷ୍ଠିର ମାଝୀ ଏବଂ ତାଙ୍କର ସ୍ତ୍ରୀ ପ୍ରେମଶିଲା ଏବେ ବିଭିନ୍ନ ପ୍ରକାର ପନିପରିବା ଚାଷ କରି ଚର୍ଚ୍ଚାକୁ ଆସିଛନ୍ତି। ଏପରି କି ଦମ୍ପତିଙ୍କ ସଫଳ ଚାଷକୁ ନେଇ ଜୁନାଗଡ଼ ବିଧାୟକ ତଥା ପୂର୍ବତନ ମନ୍ତ୍ରୀ କ୍ୟାପଟେନ ଦିବ୍ୟଶଙ୍କର ମିଶ୍ର ମଧ୍ୟ ନିଜ ଫେସବୁକ୍ରେ ପୋଷ୍ଟ କରିଛନ୍ତି।
ପ୍ରକାଶ ଯେ, ଯୁଧିଷ୍ଠିରଙ୍କ ୫ ଏକର ଚାଷ ଜମି ଥିବା ବେଳେ ଖରା ସମୟରେ ସେଠାକୁ ପାଣି ନ ଯିବାରୁ ଶୁଖିଲା ପଡୁଥିଲା। ଏହାପରେ ସେ ଲୁଥେରାନ୍ସ ସଂସ୍ଥାର ସହାୟତା କ୍ରମେ ଏକ ବଡ କୂଅ (ଡଗୱେଲ) ଖୋଲି ପନିପରିବା ଚାଷ ଆରମ୍ଭ କରିଥିଲେ। ପ୍ରଥମେ ସେ କମ ପରିମାଣର ପନିପରିବା ଚାଷ କରୁଥିଲେ। ତେବେ ସେଥିରେ ସେ ସଫଳ ହେବା ସହ ଅଧିକ ଉପାର୍ଜନ କରିବା ପରେ ତାଙ୍କ ମନୋବଳ ବଢିବା ସହ ବିଭିନ୍ନ ପ୍ରକାରର ପନିପରିବା ଚାଷ ଆରମ୍ଭ କରିଥିଲେ। ଗତ କିଛି ଦିନ ତଳେ ସେ ନିଜ ଚାଷ ଜମିରୁ ପାତଳଘଣ୍ଟା, ବାଇଗଣ, ଫୁଲକୋବି ଅମଳ କରି ଏହାକୁ ବଜାରରେ ବିକ୍ରି କରି ଲାଭ ପାଇଥିଲେ। ଏବେ ତାଙ୍କ ଚାଷ ଜମିରେ ପିଆଜ, ସୂର୍ଯ୍ୟମୁଖୀ, ଆଖୁ, କୁମୁଡା ଆଦି ଚାଷ କରିଛନ୍ତି। ସେହିପରି ପ୍ରଥମ କରି ଚଳିତବର୍ଷ ୧୦ ଡିସମିଲ ଜମିରେ ଆଳୁଚାଷ କରିଥିଲେ। ଏଥିପାଇଁ ସେ ହଜାରେ ଟଙ୍କା ଖର୍ଚ୍ଚ କରିଥିଲେ। ଏହାର ଅଢେଇ ମାସ ପରେ ଏବେ ସେ ୧୦ ଡିସମିଲରୁ ସାଢେ ଚାରି କୁଇଣ୍ଟାଲ ଆଳୁ ଅମଳ କରିଛନ୍ତି। ଏହି ଆଳୁ ଚାଷରେ ୫ଗୁଣା ଲାଭ ହୋଇଛି। ଯାହାକି ତାଙ୍କୁ ଆହୁରି ଉତ୍ସାହିତ କରିଛି। ଆସନ୍ତାବର୍ଷ ସେ ୧ ଏକର ଜମିରେ ଆଳୁ ଚାଷ କରିବେ ବୋଲି ପ୍ରକାଶ କରିଛନ୍ତି। ପନିପରିବା ଚାଷ ପାଇଁ ଏହି ଦମ୍ପତି ଦିନ ରାତି ଅକ୍ଲାନ୍ତ ପରିଶ୍ରମ କରୁଥିବା ବେଳେ ସରକାରୀ ସହାୟତା ମିଳି ନ ଥିବା ପ୍ରକାଶ କରନ୍ତି। ଖରାଦିନେ ବଡ କୂଅରୁ ପାଣି ଶୁଖି ଯାଉଥିବା ବେଳେ ଚାଷ କାମରେ ବାଧା ସୃଷ୍ଟି ହେଉଛି । ତେଣୁ ସୋଲାର ପମ୍ପ ପ୍ରଦାନ କରାଗଲେ ଆହୁରି ପନିପରିବା ଚାଷ କରି ଉପକୃତ ହୋଇପାରନ୍ତେ ବୋଲି ପ୍ରକାଶ କରିଛନ୍ତି ଦମ୍ପତି । ପ୍ରଶାସନ ଏ ଦିଗରେ ବିହିତ ପଦକ୍ଷେପ ନେବାକୁ ସେ ଦାବି କରିଛନ୍ତି।