ଓଟ୍ଟାଓ୍ବା,୨୯।୯: ଖଲିସ୍ତାନୀ ଆତଙ୍କବାଦୀ ହରଦୀପ ସିଂ ନିଜ୍ଜରଙ୍କ ହତ୍ୟା ଘଟଣାର ତଦନ୍ତ ସମ୍ପର୍କରେ କାନାଡା ପୋଲିସ ଏକ ବିବୃତ୍ତି ଦେଇଛି। ରୟାଲ କାନାଡିୟ ମାଉଣ୍ଟେଡ ପୋଲିସ (ଆରସିଏମପି) କହିଛି ଯେ, ଆତଙ୍କବାଦୀ ନିଜ୍ଜର ହତ୍ୟା ଘଟଣାର ସକ୍ରିୟ ତଦନ୍ତ କରାଯାଉଛି। ନିଷିଦ୍ଧ ଖଲିସ୍ତାନ ଟାଇଗର ଫୋର୍ସ (କେଟିଏଫ)ର ୪୫ ବର୍ଷୀୟ ନିଜ୍ଜରଙ୍କୁ ଚଳିତ ବର୍ଷ ଜୁନ ୧୮ରେ କାନାଡାର ବ୍ରିଟିଶ କଲମ୍ବିଆ ପ୍ରଦେଶର ସରେ ହତ୍ୟା କରାଯାଇଥିଲା। ଭାରତ ସରକାର ୨୦୨୦ରେ ନିଜ୍ଜରଙ୍କୁ ଆତଙ୍କବାଦୀ ଘୋଷଣା କରିଥିଲେ।
ନିଜ୍ଜରଙ୍କ ହତ୍ୟାକୁ କାନାଡା ପୋଲିସର ଇଣ୍ଟିଗ୍ରେଟେଡ ହୋମସାଇଡ ଇନଭେଷ୍ଟିଗେସନ ଟିମ (ଆଇଏଚଆଇଟି) ଦ୍ୱାରା ଯାଞ୍ଚ୍ କରାଯାଉଛି। ଆଇଏଚଆଇଟି ମୁଖପାତ୍ର ଟିମୋଥି ପିଆରୋଟି କହିଛନ୍ତି ଯେ, ହରଦୀପ ସିଂ ନିଜ୍ଜରଙ୍କ ହତ୍ୟା ସମ୍ପର୍କରେ ଗଣମାଧ୍ୟମର ରିପୋର୍ଟ ବିଷୟରେ ଆମେ ଅବଗତ। ଯେହେତୁ ଏହି ଘଟଣାର ଅନୁସନ୍ଧାନ ଚାଲିଛି, ଆଇଏଚଆଇଟି ଦ୍ୱାରା ସଂଗୃହିତ ପ୍ରମାଣ ଉପରେ ମୁଁ ମନ୍ତବ୍ୟ ଦେଇ ପାରିବି ନାହିଁ। ପ୍ରମାଣ ଆଧାରରେ ପୋଲିସ ଉକ୍ତ ଅଞ୍ଚଳର ପୁଙ୍ଖାନୁପୁଙ୍ଖ ଅନୁସନ୍ଧାନ କରିଛି ଏବଂ ଏହି ମାମଲା ସହ ଜଡିତ ସମସ୍ତ ଭିଡିଓ ଫୁଟେଜ ସଂଗ୍ରହ କରାଯାଉଛି।
ନିକଟରେ କାନାଡା ପ୍ରଧାନମନ୍ତ୍ରୀ ଜଷ୍ଟିନ ଟ୍ରୁଡୋ ଖାଲିସ୍ତାନୀ ଆତଙ୍କବାଦୀ ନିଜ୍ଜରଙ୍କ ହତ୍ୟାରେ ଭାରତର ସମ୍ପୃକ୍ତ ଥିବା ଅଭିଯୋଗ ଆଣିଥିଲେ, ଯାହା ପରେ ଏହି ପ୍ରସଙ୍ଗଟି ମୁଖ୍ୟ ପ୍ରସଙ୍ଗରେ ଆସିଛି। ଟ୍ରୁଡୋଙ୍କ ବିବୃତ୍ତି ପରେ ଭାରତ ଏବଂ କାନାଡା ମଧ୍ୟରେ ତିକ୍ତତା ବୃଦ୍ଧି ପାଇଛି। ତେବେ ଟ୍ରୁଡୋଙ୍କ ଅଭିଯୋଗକୁ ଭିତ୍ତିହୀନ ତଥା ରାଜନୈତିକ ଉଦ୍ଦେଶ୍ୟ ପ୍ରଣୋଦିତ ବୋଲି ଭାରତ ପ୍ରତ୍ୟାଖ୍ୟାନ କରିଛି।