ଚିତ୍ରକୋଣ୍ଡା,୧୯।୧(ଡି.ଏନ୍.ଏ.): ଦୀର୍ଘ ଦଶନ୍ଧି ଧରି ଆଦିବାସୀ ଅଧ୍ୟୁଷିତ ମାଲକାନଗିରି ଜିଲା ଚିତ୍ରକୋଣ୍ଡା ବ୍ଲକ ଅଧୀନ ନାଗଲୁରୁ, ପାପୁଲୁର ଏବଂ କୁରୁମାନୁର ପଞ୍ଚାୟତର ୧ ହଜାରରୁ ଊର୍ଦ୍ଧ୍ୱ କୋଣ୍ଡାଦୋରା ସମ୍ପ୍ରଦାୟ ତଫସିଲଭୁକ୍ତ ଜନଜାତିର ମାନ୍ୟତା ନେଇ ଦାବି କରିଆସୁଥିଲେ। ହେଲେ ତାଙ୍କୁ ନିରାଶ ହେବାକୁ ପଡୁଥିଲା। ବର୍ତ୍ତମାନ କୋଣ୍ଡାଦୋରା ଜନସାଧାରଣଙ୍କ ପାଇଁ ଏକ ଖୁସିର ଖବର ଆସିଛି। ଗରୁବାର କୋଣ୍ଡାଦୋରମାନଙ୍କୁ ତଫସିଲଭୁକ୍ତ ଜନଜାତିରେ ସାମିଲ କରିବା ପାଇଁ ତଦନ୍ତ ପ୍ରକିୟା ଆରମ୍ଭ ହୋଇଛି।
ଜାତୀୟ ଜନଜାତି ଆୟୋଗ ସଦସ୍ୟ ଅନନ୍ତ ନାୟକଙ୍କ ସହ ଡେପୁଟି ଡାଇରେକ୍ଟର ଆରଖକେଦୁବୋ, ସଦସ୍ୟ ପିକେ ପଲାଇ ପାପୁଲୁର ଏବଂ ନାଗଲୁର ଗ୍ରାମକୁ ଆସି କୋଣ୍ଡାଦୋରା ଲୋକଙ୍କ ଚାଲିଚଳଣି ଅନୁଧ୍ୟାନ କରିବା ସହ ଆଲୋଚନା କରିଥିଲେ। ଅନ୍ୟପକ୍ଷେ କୋଣ୍ଡଦୋରାମାନଙ୍କୁ ତଫସିଲଭୁକ୍ତ ଜନଜାତିରେ ସାମିଲ କରିବା ପାଇଁ ବର୍ତ୍ତମାନ ଏକ ପ୍ରକାରର ପ୍ରସ୍ତୁତି ଆରମ୍ଭ କରାଯାଇଥିବା ସୂଚନା ମିଳିଛି। ତଦନ୍ତ ପରେ ଅଧିକାରୀ ମାଲକାନଗିରି ଫେରି ଆସିଛନ୍ତି। ତାଙ୍କ ସହ ନବରଙ୍ଗପୁର ସଂସଦୀୟ କ୍ଷେତ୍ରର ପୂର୍ବତନ ଏମ୍ପି ବଳଭଦ୍ର ମାଝୀ ମଧ୍ୟ ତଦନ୍ତ ପ୍ରକ୍ରିୟାରେ ସକ୍ରିୟ ଅଂଶ ଗ୍ରହଣ କରି ସହାୟତା କରିଥିଲେ। ପ୍ରଶାସନ ପକ୍ଷରୁ ଚିତ୍ରକୋଣ୍ଡା ତହସିଲଦାର ଟି. ପଦ୍ମନାଭ ଦୋରାଙ୍କ ସମେତ ଚିତ୍ରକୋଣ୍ଡା ବିଡ଼ିଓ ରଘୁନାଥ ମୁଣ୍ଡାରୀ ପ୍ରମୁଖ ଉପସ୍ଥିତ ଥିଲେ।