ନୟାଗଡ ଅଫିସ,୩୦।୧୨: କିଛି ଦିନର ନୀରବତା ପରେ ଏସ୍ଆଇଟି ପୁଣି ତଦନ୍ତକୁ ତ୍ୱରାନ୍ବିତ କରିଛି। ଏସ୍ଆଇଟି ଯଦୁପୁର ଗଁାକୁ ନ ଯାଇ ନୟାଗଡରେ ଯଦୁପୁରର କିଛି ଲୋକଙ୍କୁ ଡକାଇ ଜେରା କରୁଛି। ଏଭଳି ସ୍ଥଳେ ଜେରା କରାଯାଉଥିବା ଲୋକମାନେ ଗଣମାଧ୍ୟମ ସମ୍ମୁଖରେ ମୁହଁ ଖୋଲୁ ନାହାନ୍ତି। ପଚାରିଲେ ଉତ୍ତର ମିଳୁଛି କେବଳ ଡାକିଥିଲେ କିନ୍ତୁ ପଚାରିଲେ ନାହିଁ, ବସି ବସି ଫେରିବାକୁ ପଡିଲା। କିନ୍ତୁ ଜଣେ ବ୍ୟକ୍ତି ନିଜ ନାମ ଗୋପନ ରଖି କହିଛନ୍ତି ଜେରା ବେଳେ ଏସ୍ଆଇଟିର ସଦସ୍ୟମାନେ ବିଭିନ୍ନ ପ୍ରକାର ପ୍ରଶ୍ନ ପଚାରି ଅସ୍ତବ୍ୟସ୍ତ କରି ପକାଉଛନ୍ତି। ଅନ୍ୟପକ୍ଷେ ଯଦୁପୁର ଗଁାର ୧୦ଜଣ ଦାଦନ ଯିବାକୁ ପ୍ରସ୍ତୁତି ଚଳାଇଛନ୍ତି। ପରୀ ହତ୍ୟାକାଣ୍ଡର ତଦନ୍ତରେ ସହାୟତା କରିବାକୁ ଯାଇ ଅଧିକାଂଶ ଲୋକଙ୍କ ଘର ଚଳିବା ମୁସ୍କିଲ ହୋଇଗଲାଣି। ଏଣୁ ରୋଜଗାର ଉଦ୍ଦେଶ୍ୟରେ କେରଳ ଯିବାକୁ ପ୍ରସ୍ତୁତି ହେଉଛନ୍ତି। ଏନେଇ ଗଁାର ସଭାପତି ଜୟକୃଷ୍ଣ ପରିଡା କୁହନ୍ତି, ମୁଁ ଓ ମୋ ସହ ୧୦ ଜଣ କେରଳ ଯିବୁ। କେବଳ ଅପେକ୍ଷା ରହିଛି ଜାନୁୟାରୀ ୧୨ ତାରିଖ। ଆମେ ଗଁା ତରଫରୁ ଏସ୍ଆଇଟିକୁ ସବୁ ପ୍ରକାରର ସହଯୋଗ କରି ଆସିଛୁ। ଏଣୁ ତଦନ୍ତ ଶୀଘ୍ର ଶେଷ କରି ଦୋଷକୁ ଦଣ୍ଡ ଦେବା ପାଇଁ ଅନୁରୋଧ କରୁଛୁ। ତେବେ ତଦନ୍ତରେ ନିର୍ଦ୍ଦୋଷକୁ ଫସା ନ ଯାଉ ବୋଲି ସେ କହିଛନ୍ତି।